Year: 2007

Tey bestu svimja nú millum klokkan 10 og 12, og tað gongur uppá stás. Amerikanska Leila Vaziri hevur sett heimsmet í semifinaluni í 50 rygg við tíðini 28.16, meðan hvítarussiska Alexksandra Herasimenia tók silvur og japanska Reiko Nakamura bronsu. Og síðani knústi Michael Phelps heimsmetið hjá sær sjálvum í 200 firvald, við at svimja 1:52.09 (gamlað metið var 1:53.71). Har varð Wu Peng úr Kina nummar 2 og russiski Nikolay Skvortsov nr 3.

Síðani ‘hevndi’ franska Laure Manaudou seg inn á italsku Federica Pellegrini, sum í gjár dittaði sær at seta heimsmet í 200 frí. Manoudou svam beint nú teir 200 frí á 1:55.52, sum er næstan eitt sekund betri enn teir 1:56.47 hjá Pellegrini í gjár. Týska Annika Lurz vann silvur og Pellegrini bronsu.

3 finalur, 3 heimsmet. Um nakar ivast í hví eg kann sita og skriva í morgun, hóast eg segði at eg varð upptikin av arbeiði, so er tað tí at eg keikti fótin á veg út í gjøgnum hurðina í morgun. Havi nú læknaboð uppá at eg skal binda frið, hava fótin hægst og skifta millum ís og hita hvønn hálva tíma. Tað riggar fínt at gera á sofuni, frammanfyri sjónvarpið 🙂

50 bringu gav tíverri ikki nýtt heimsmet. Ukrainski Oleg Lisogor vann, amerikanski Brendan Hansen varð nummar 2 og suðurafrikanski Cameron van der Burgh nummar 3.

800 frí er faktiskt ófatiliga spennandi at hyggja at sum ‘live timing’ á omegatiming.com. Grant Hackett er ikki fremst, men heldur ikki langt aftanfyri teir tríggjar fremstu (Craiq Stevens, Oussama Mellouli og Federico Cobertaldo). Jú nú dragnar hann eitt sindur. Og meira. Oussama fer frá hinum.  Og Przemyslaw Stanczyk úr Póllandi kemur knappliga uppí leikin, og framum, nú teir hava svomið einar 300 metrar. Hann er á geil 7. Hinir dragna, Hackett vinnur so í øllum førum ikki. Og úrslitið varð at Oussama Mellouli úr Tunesia vann, Przemyslaw Stanczyk varð nummar 2 og Craiq Stevens nummar 3. Hackett varð nummar 7, uha uha.

Fyrsta heimsmet nakrantíð til Tunesia, viðmerkja tey á live-síðunum hjá eurosport.com. Vinnaratíðin á 7:46.95 var tó langt í verðini frá heimsmetinum hjá Grant Hackett á 7:36.65

Hatta var tað fyri í dag.

Sum tey ið fylgja eitt sindur við vita, so var eg ein av teimum sum settu spurnartekin við, um tað var rætt at fara til HM. Og eg haldi enn at tað lættliga kundi gingið nógv verri 🙂 Men Jón Bjarnason hevur so sanniliga fyrireikað svimjararnar væl, og stuðla teimum á kantinum í Melbourne, so at vit nú kunnu siga at Melbourne varð ein succés fyri føroyingar, hóast stevnan ikki er meira enn hálvrunnin.

Allir 4 svimjarar hava betrað seg væl og virðiliga, og tríggir hava sett flott føroyskt met. Fjórði svimjarin eru umskyldaður við, at hon og hin svimja somu kappingar. Tey vinna sína riðlar hóast tey sjáldan eru ‘seedað’ sum nummar 1 í riðlinum. Vit sleppa at síggja tey ‘live’ á Eurosport, og føroysku fjølmiðlarnir hava eisini víst stóran áhuga, hóast talan jú slettis ikki er um kjans at vinna heiðursmerki.

So saman um tikið er luttøkan ein stór succés. Og her má man ikki undirmeta bragdið hjá landsliðsvenjaranum, Jón Bjarnasyni, at fáa svimjararnar at virka so væl, hóast hesar trykkjandi umstøðurnar, har alt er so stórt og heiðursmerkjamøguleikarnir (enn) so ófatiliga smáir. Hetta er ‘coaching’ á høgum stigi, at fáa svimjararnar at fokusera so væl á at betra seg sjálvi og føroyska støðið, heldur enn at fella saman ella royna eftir onkrum ógjørligum.

Pessimisturin í mær heldur enn, at tað líka so væl kundi endað í ein gang blaka pengar út úr vindeyganum, og vánaligari svimjing. Men tað er tað ikki blivið, og tí má man taka hattin av fyri teimum har suðuri, umframt teimum sum í gerandisdegnum hava verið um hesar svimjarar.

Vit hava fingið ein flottan, flottan start á HM-luttøkuni, og man kann væl næstan siga at næstu árini eru bjargað. Tí hóast Oyggjaleikir altíð eru spennandi, so eru Rhodos kanska ov spennadi, í mun til tað sum kemur aftaná. Ein svimjari sum hevur verið á Rhodos kann mest sannlíkt gerast rættiliga tungur at motivera til Áland (ella hvar tað nú er, næstu ferð).

Men nú hava vit HM! Longu næsta ár í stuttum hyli í Bretlandi, har vit í prinsippinum kunnu senda so nógv vit vilja (vegna prísin). Árið eftir í Rom, síðani árið eftir onkunstaðni sum eg ikki veit hvar er enn, og um 4 ár í Shanghai, Kina. Um tað ikki motiverar okkara bestu svimjarar, so eru teir ikki verdir at motivera 😉

Uha ja, men tað kostar jú nógv. Og mítt størsta kritikkpunkt var eisini, at hesir pengar kundi farið til so nógv annað. Avstralia er jú langt vekk og alt hatta har. Men her hevur FINA (og kanska okkara egni formaður, Palli Ziskason) gjørt tað bragd, at geva okkum oyramerktan fíggjarligan stuðul til luttøkuna. Vit fáa altso pengar frá FINA til at at fara til HM. Nú síggja vit so eisini, at teir við Jón kunnu seta met, og hvat er so eftir at brokka seg um?

Nei Jón og Palli, ein treytaleys umbering higani av Toftum. Tit høvdu rætt, ella í øllum førum dugdi tit at fáa tað at bera til.

Og til lukku tit fýra sum svimja í Melbourne. Tit eru knasandi góð !

Ein ukrainskur venjari í ‘útspring’ varð handtikin av avstralska politinum í gjár, eftir at sjónvarpsmyndir høvdu fangað hann í at sita á og sláa ein av sínum svimjarum, á kantinum av hylinum í Melbourne. Hetta var forrestin dóttur hansara, og myndirnar tykjast at vísa at hon var uppøst, slóg, og at hann so royndi at sissa hana, við at sláa aftur og seta seg á hana. Men tað kann sjálvsagt ikki góðtakast fyri tað.

Ein russiskur venjari í ‘útspring’ varð eisini tikin inn á politistøðina herfyri, fyri at hava følt uppá ein kvinnuligan trygdarvørð á hotellinum. Hann sigur seg ikki hava gjørt nakað, men hevur so fyribils fingið inndrigið passið (so at hann ikki kann rýma úr landinum), og skal siga løgregluni frá um hann ætlar sær út úr hotellinum.

Tíðindini eru funnin her og her á swimnews.com

Ella í morgun, avstralska tíð. Dánjal Martin Hofgaard úr TS átti føroyska metið við 55.54 sekundum. Men so tók fyrst Pál Joensen tað við 55.07, og síðani Kristian Olsen úr Klaksvík við flottum 54.43. Tey sum sótu uppi í nátt biðja heilsa, at man sá báðar væl á Eurosport, við nærmynd og tað heila 🙂

Á tsvim.com sæst ein frálík mynd av Kristiani á HM, har hann er avmyndaður saman við tiltikna (men nú givna) Alexander Popov. Sum eisini gevur eina hóming av hvussu stórir hesar bestu sprintararnir egentliga eru (onkur russiskur vísindamaður roknaði einaferð út, at skuldi man taka metið hjá Popov, so mátti man vera hægri enn hann… veit ikki um tað helt, men tað er nokk nakað um tað, sum við kappróðrarbátunum).

Man var líka sum byrjaður at ivast í, um hylurin í Melbourne nú var so skjótur sum t.d. Shane Gould og Dawn Fraser hildu, tá áðrenn heimsmeistarastevnuna. Bara eitt sløð av ‘championship records’, og einki heimsmet. Men í dag skrædnaði av álvara.
Continue reading Nú komu heimsmetini

Sum tit kunnu lesa á ssf.fo, so hava føroyingarnir svomið øgiliga væl í nátt. Jutta Thomsen setti nýtt føroyskt met í 200 frí við tíðini 2:10.81 (tilmeldingartíð 2:16.01), sum var 10. besta tíð hjá gentum í hennara aldursbólki. Pál Joensen setti nýtt føroyskt met í 800 frí við tíðini 8:30.31 (tilmeldingartíð 8:49.89), sum varð eitt 8. pláss í hansara aldursbólki. Og Mona Simonsen svam eisini nóg gott til at vinna sín riðil við tíðini 2:12.45 (tilmeldingartíð 2:17.28).

Uha tit báðir, Hackett og Jensen. Ungi suðurkoreanin Tae Hwan Park kløkkaði øll í gjár við at vinna teir 400 frí á Grant Hackett og restini; men nú sigur 17-ára gamli drongurin sjálvur her, at hann miðjar meira móti 1500 enn 400 frí ! Hackett hevur gott nokk sagt, at hann væntar at einir 6-7 fara undir 15 minuttir. Og hann burdi kent Park, við tað at hesin til dagliga venur í Avstralia. Men Jensen stakkalin, hann fær óivað úr at gera við at hyggja til høgru og vinstru.

Ekstrablaðið skrivar her at ‘følelserne sad udenpå’ Lotte Friis, eftir at hon hevði svomið ein framúr 1500 metur í innleiðandi í morgun. Hon svam teinin á 16:09.39, sum er nýtt norðurlendskt met og eitt 16. pláss á ‘alle tiders verdensrangliste’ (tað man merkja okkurt a la at hon 16. skjótasti 1500 metra svimjari nakrantíð). 1500 frí er ikki OL-grein, men hon svam eisini teir 800 so skjótt, at hon við tíðini 8:34.26 var undir kravtíðina til OL við 2 sekundum.

Eurosport.com hevur eitt áhugavert mediasavn her, har man í løtuni kann síggja “all the action from day two of the World Championships in Melbourne” og “Highlights from the morning session on day two when VDH set the fastest qualifying time in the men’s 200m freestyle heats”. Ikki so galið, um man ikki hevur atgongd til fylgisveinasendingarnar.

Bartal sendi mær eisini leinki í morgun til video á YouTube, har man til dømis her kann síggja 17 ára gamla Tae Hwan Park vinna gull í 400 frí hjá monnum við einum øgiligum endaspurti, og her kann síggja ymiskt sum onkur portugisi hevur lagt upp á alnetið. Til ber eisini at finna video, við til dømis at leita eftir “Fina World Championships 2007” á Google Video.

Heimasíðan hjá Eurosport hevur eisini eitt slag av ‘live’ sending frá svimjingini í Melbourne, har tey skriva smáar tíðindastubbar her so hvørt sum svomið verður. Tíverri bara tekstur, uttan ljóð ella mynd, og spurningurin er tí um ikki Omega Live Timing er betra loysnin, við tað at man har sær úrslitatalvuna við starttíð og millumtíðum hjá øllum svimarum, ‘live’. 

Finalurnar eru í gongd beint nú, har Brendan Hansen til dømis akkurát vann á Kitajima í 100 bringu, meðan norðmaðurin Alexander Dale Oen tíverri følnaði fullkomiliga eftir at hava verið nummar 3 í vendingini. Hann varð nummar 8 av 8 í finaluni, sum ikki kann vera annað enn bitturt, tá ið man hugsar um at hann í innleiðandi svam skjótari enn tann sum her vann HM-bronsu.

Nathalie Coughlin man vera næstan líka skuffað eftir sínar 100 firvald, sum hon førdi inntil teir síðstu 25 metrarnar. Hon fekk gott nokk eitt heiðursmerki, úr bronsu, meðan avstralsku Libby Lenton og Jessicah Schipper fóru við gull og silvur.

50 firvald hjá monnum vann suðurafrikanski Roland Schoeman á Ian Crocker, meðan danski Jacob Andkjær fekk bronsu. Woohoo Danmark! Svenski veteranurin Lars Frölander varð einans nummar 7 av 8, so hansara tíð man nú endiliga vera við at vera av, eftir at hann hevur verið á toppinum í eina svimjiøld.

200 blandað hjá kvinnum vann Kathy Hoff úr USA á Kirsty Coventry úr Zimbabwe og Stephanie Rice úr Avstraliu. Danska Julie Hjorth-Hansen varð her nummar 5, sum eisini má sigast at vera nokk so gott (í øllum førum í mun til stakkals Oen).

Viðvíkjandi tíðum, so tykist hylurin tíverri ikki at vera heilt so skjótur sum fólk væntaðu og ynsktu. Ella eru svimjararnir ikki heilt so væl fyri sum ætlað. Tí inntil víðari seta tey ‘bara’ meistaraskapsmet, uttan at nakar fer við teimum lovaðu 140.000 krónunum fyri (hvørt) heimsmet.