Nú nærkast til Norðurlendsku Meistarastevnuna fyri Ung 2021, har eisini tveir føroyskir svimjarar fara at luttaka. Fyriskipararnir í Litava hava júst sent okkum hetta leinki til luttakaralistarnar, sum benda á eina rættiliga sterka kapping, sum tær báðar Lea og Jóhanna fáa í Klaipeda.
Tær báðar sum luttaka fyri Føroyar, eru Lea Osberg Højsted úr Ægir, umframt Jóhanna Ólavsdóttir úr Fuglafjarðar Svimjifelag.
Tær luttaka í hesum kappingum:
- K7 – 200 bringa gentur – Lea nr 14 av 16
- K11 – 400 blandað gentur – Jóhanna nr 12 av 16
- K15 – 100 rygg gentur – Jóhanna Nr 14 og Lea nr 15 av 16
- K17 – 50 frí gentur – Jóhanna nr 18 og Lea nr 19 av 19
- K23 – 400 frí gentur – Jóhanna nr 14 av 16
- K25 – 200 rygg gentur – Jóhanna nr 12 av 14
- K27 – 100 bringa gentur – Lea nr 12 av 17
- K29 – 200 blandað gentur – Jóhanna nr 17 av 18
Allar kappingarnar verða avgreiddar sum beinleiðis finalur, tvs. at úrslitini verða funnin beinanvegin, heldur enn við at skula svimja fyrst innleiðandi og síðani finalur.
So tað er bara at svimja so skjótt sum gjørt, beinavegin, til at verja sína styrkismeting 🙂
Við Leu og Jóhannu er nýggju landsliðsvenjarin hjá Svimjisambandi Føroya, Kristian Martin Joensen, umframt ferðaleiðarar Astrid Joensen og Danny Osberg Højsted.
NMU-landsliðið fer úr Føroyum 9. juli, og kemur heim aftur 12. juli. Koronatilmælini eru ikki so strong longur til Litava og aftur til Danmarkar, men hava luttakandi lond tó avgjørt sína millum, at hendan stevnan verður fyriskipað eisini í ‘boblu’, við koronatestum osfr.
Vegna SSF
Rókur