Líggjas trífaldur danskur juniormeistari og gullnál við stjørnu

Líggjas Joensen megnaði í vikuskiftinum at vinna trý gullheiðursmerki og eitt úr silvuri á donsku juniormeistarastevnuni á stuttgeil 2024, við sera stórum betringum av sínum bestu tíðum.

Hartil svam hann tvær ferðir undir kravtíð hjá altjóða svimjisambandinum til heimsmeistarastevnuna á stuttgeil 2024, við tíðum sum rukku til gullnál við stjørnu frá Svimjisambandi Føroya.

Úrslitini vóru øgilig hjá Líggjasi:

• 1:48.24, 773 AQUA-stig og silvur í 200 frí, har kravtíðin til HM er 1:47.72
  – besta tíð hjá Líggjasi áðrenn hetta, var 1:50.62 frá VestDanske fyrst í oktober
  – vinnaratíðin á Oyggjaleikum 2023 á Guernsey, var 1:51.89
• 3:50.31, 782 AQUA-stig og gull í 400 frí, har kravtíðin til HM er 3:50.29
  – besta tíð hjá Líggjasi áðrenn hetta, var 3:54.34 frá VestDanske fyrst í oktober
  – vinnaratíðin á Oyggjaleikum 2023 á Guernsey, var 3:57.01
• 7:55.67, 793 AQUA-stig og gull í 800 frí, har kravtíðin til HM er 8:01.30
  – besta tíð hjá Líggjasi áðrenn hetta, var 8:13.20 frá VestDanske fyrst í oktober
  – vinnaratíðin á Oyggjaleikum 2023 á Guernsey, var 8:13.03
• 15:11.97, 800 AQUA-stig og gull í 1500 frí, har kravtíðin til HM er 15:20.42
  – besta tíð hjá Líggjasi áðrenn hetta, var 15:38.91 frá VestDanske fyrst í oktober
  – vinnaratíðin hjá Líggjasi á Oyggjaleikum 2023 á Guernsey, var 15:54.63

Øll hesi úrslit eru greitt undir kravtíðirnar til Norðurlendsku JuniorMeistarastevnuna í Vejle, fyrst í desember, umframt til Oyggjaleikir á Guernsey í juli 2025.

Og so var tað, tá ið hann svam seg til gullið í 800 frí, at hann samstundis svam seg undir kravið til gullnál við stjørnu frá Svimjisambandi Føroya, sum er 7:59.66. Tíðin í 1500 frí var eisini undir kravið á 15:17.38; men tá hevði hann longu gjørt tað í 800.

Líggjas er úr Gøtu og upprunaliga úr Svimjifelagnum Reysta, til hann fyri árum síðani skifti til Ægir, eins og systurin Jonna nakað áðrenn hann. Síðani í summar býr familjan Joensen í Aalborg, har tey bæði venja og kappast við Aalborg Svømmeklub.