Man kann ikki siga annað, enn at ungarar gera sítt til at gera hetta EM serligt, hóast at korona-avmarkingarnar til dømis ikki loyva vanligum áskoðarum at koma í høllina. Eitt er at har er flott pallseting við ljósi og ljóði og so framvegis; men hartil fáa nýggju evropameistararnir persónligar heilsanir frá familjulimum á stórskíggja, beint sum teir hava vunnið og koma upp úr hylinum, sum týðiligvís ávirkar bæði kvinnur og menn.
Photos courtesy of Deepbluemedia/Insidefoto
Kliment Kolesnikov svam í gjár skjótari enn evropeiska metið í 100 metra ryggsvimjing á langgeil, tá ið hann sum fyrsti svimjari í 4×100 blandað fyri mix lið svam teinin uppá 52.09 sekund, har evropametið hjá franska Camille Lacourt frá EM í Budapest í 2010 er 52.11.
Men, tað telur ikki sum evropamet, tí at hetta ‘mix’ er kapping har bæði menn og kvinnur luttaka í senn, har altjóða svimjireglurnar ikki enn loyva at fyrsti svimjari kann seta met.
Ein samrøða við Signhild Joensen sum Hörður J. Oddfríðarson úr Sundsamband Íslands gjørdi, nú aftaná at hon hevði svomið sína næstu grein á EM 2021 í Budapest, sum var 100 metra ryggsvimjing.
Signhild Joensen royndi seg fyri løtu síðani í 100 metra ryggsvimjing á Evropameistarastevnuni 2021 í Budapest, og varð har við tíðini 1:04.72 nr 44 av teimum 48 sum luttóku í hesi kapping. Signhild eigur sjálv føroyska metið á 1:03.01, sum hon fyrst setti á Bergen Swim Festival í 2018 og síðani svam ájavnt við á somu stevnu í 2019. Sí úrslitalistan her
Russiski Kliment Kolesnikov varð í kvøld evropameistari í 100 metra frísvimjing, við nýggjum stevnumeti 47.37, har franski Alain Bernard átti hitt gamla á 47.50, frá afturi í 2008, tá ið sokallaðu ‘superdraktirnar’ enn vóru eitt ting. Eitt óført úrslit hjá hesum svimjara sum annars er mest kendur fyri sína ryggsvimjing.
Men, sjálvt Kolesnikov vísti seg sum eitt menniskja, tá ið hann einar 10 minuttir seinni skuldi royna at kvalifisera seg í hálvfinalu til finaluna í 100 rygg, og tá vísti seg at ikki hava fleiri skot eftir í byrsuni. Stakkalin varð tá so sýraður til, at hann small um og mátti fáa hjálp, við tí úrsliti at heiðursmerkjahandanin í 100 frí mátti útsetast.
Russiski Kliment Kolesnikov megnaði aftur í kvøld at seta heimsmet í 50 metra ryggsvimjing á langgeil, tá ið hann í finaluni á EM 2021 í Budapest varð evropameistari við tíðini 23.80 sekund, har hann í hálvfinaluni í gjár setti heimsmet við 23.93. Hann átti tað eisini áðrenn hetta, við 24.00 sekund frá EM í Glasgow í 2018; men nú er hann so sum sagt hin fyrsti nakrantíð undir 24 sekund í 50 rygg á langgeil, umframt at hann við evropameistaraheitinum er 10.000 evrur ríkari.
Photo courtesy of Deepbluemedia/Insidefoto
Altjóða ítróttardómstólurin CAS fer í næstu viku at taka upp aftur rættarmálið, um hvussu vítt Sun Yang skal dømast fyri brot á antidopinglógina ella ei, eftir at hægstirættur í Sveis á jólum í 2020 umstoytti dómin á 8 ár sum Yang hevði fingið í februar 2020, tí at ein av dómarunum hjá CAS hevði skrivað okkurt illsinnisglefs á Twitter um at Kina drap hundar. Sí AP
Ein samrøða við Signhild Joensen sum Hörður J. Oddfríðarson úr Sundsamband Íslands gjørdi, nú aftaná at hon hevði svomið sína fyrstu grein á EM 2021 í Budapest, sum var 50 metra ryggsvimjing. Hann spyr á enskum, og hon svarar á føroyskum 🙂
Av tí at alt er so serligt nú í sambandi við korona, so vóru vit eitt sindur í neyð herfyri, tá ið venjarin hjá Signhild mátti melda avboð, so mikið seint at tað var hopuleyst at fáa nakran annan inn.
Men, tíbetur hava vit góðar vinir í Íslandi, sum beinanvegin játtaðu av vilja hjálpa okkum, í tann mun sum tað nú einaferð fór at bera til har í ‘bobluni’. Tað eydnaðist ikki at flyta til teirra hotel, men tíbetur gongur tað viktigasta fyri seg í hylinum.
Her er tað Hörður J. Oddfríðarson, fyrrverandi formaðurin hjá íslendska svimjisambandinum, sum ger samrøðu við Signhild uttanfyri Duna Arena, nú fyri løtu síðani. Hann sigur at vit fáa eitt avrit av samrøðuni 🙂
Signhild Joensen royndi seg nú fyri løtu síðani í 50 metra ryggsvimjing á Evropameistarastevnuni 2021 í Budapest, og svam tá 29.89. Hetta er hennara 9. besta tíð nakrantíð, har hin besta er føroyska metið hjá henni á 29.54 frá EM í Glasgow í 2018. Sí úrslitalistan her
Tíðin hjá Signhild rakk til eitt 43. pláss millum tær 54 luttakandi, har hon áðrenn stevnuna var styrkismett til eitt 42. pláss, við tíðini 29.64 frá OL-stevnuni í Vejle í mars mánaða. Men, hetta er vanliga ikki sterkasta grein hjá Signhild, og nú eru vit so í øllum førum í gongd! 🙂
