rokur

Veruliga úrslitini frá triathlon á Rhodos

So komu tey allíkavæl fram, tey offisiellu úrslitini frá Rhodos. Ella tað vil siga, eg haldi at hetta eru tey røttu, hóast tey ikki koma frá fyriskiparunum á Rhodos. Evald hevur nevniliga fingið tey frá triathletinum Torquil á Orkney, men tey síggja altso nóg nágreinilig út, til at talan kann vera um tær offisiellu elektronisku tíðtakingarnar.

Viðfest er skjalið sum Torquil sendi Evaldi, men annars taki eg skjótt saman um her niðanfyri. Um eg samanberi við splitt-tíðirnar sum Evald tók, so sær tað út til at hesi offisiellu úrslitini rokna skiftið frá svimjing til súkkling uppí svimjingina (har Evald tók tíð til tey komu upp úr havinum, altso áðrenn tey fóru at skifta), og skiftið frá súkkling til renning uppí súkklingina.

	1500m svimjing	40 km súkkling	10 km renning	Samlað úrslit
Gudmundur	0.23.16	1.13.08	0.37.13	2.13.37
Andrass	0.28.02	1.10.12	0.37.38	2.15.52
Áslakur	0.31.36	1.08.47	0.37.22	2.17.45
Ottar	0.24.49	1.13.18	0.42.07	2.20.14
Karina	0.25.48	1.15.52	0.37.22	2.19.02
Súsanna	0.25.47	1.15.15	0.38.20	2.19.22
Joan	0.29.21	1.17.30	0.34.40	2.21.31

Legg forrestin til merkis rennitíðina hjá Joan nú… 10 km undir 35 minuttir 🙂

flot.info skift ham

Heimasíðan hjá Svimjifelagnum FLOT er nú skift út, frá gomlu Joomla heimasíðuskipanina til eina meira einfalda blogg-skipan av slagnum WordPress. Hin gamla var heilt einfalt ov tung at dansa við hjá okkum fáu sum skrivaðu, og eftir øllum at døma ómøgulig hjá øðrum FLOT-fólki at læra at skriva á.

Skiftið merkir eisini at flot.info nú verður ein meira rein FLOT heimasíða, sum skrivar og reypar um síni egnu. Vit fyrisitarar høvdu rótað okkum út í at skriva bæði fyri FLOT og føroyska svimjing annars, og fingu tí til tíðir ábreiðslur fyri ikki at velja síðu. Avleiðingin varð tí at vit stovnaðu svimjing.com til okkum øll, og nú lata flot.info verða fjepparasíðu hjá FLOT.

Nýggja flot.info er ein einfaldari heimasíðuskipan, sum tó er sterkari tá ið tað kemur til at kunna posta skjótt á síðuna, gjøgnum teldupost ella við fartelefonum. Sjálvur havi eg júst (endiliga) keypt mær eina grúðiliga fína mms-telefon, og væntandi verður tað tí mest sovorðið sum man fer at síggja á flot.info. Myndir og video frá svimjistevnum, í tann mun sum vit hava nakað at reypa um.

Um nakar skuldi saknað gomlu FLOT-heimasíðuna, so liggur hon nú á http://gamla.flot.info/

Føroysku úrslitini í triathlon á Rhodos

Tað eru tíverri ongar millumtíðir í offisiellu úrslitalistunum frá triathlon-kappingini á Rhodos, og eg brúki tí her niðanfyri tær tíðir sum Evald Rasmussen tók í leypi av kappingini, umframt endaligu offisiellu tíðina. Millumtíðirnar hjá Evaldi raka nokk ikki beint á har sum tær áttu at hava verið tiknar, men tað er so betri enn einki.

Tíðir á Rhodos:

	1500m svimjing	Skift + 40 km súkkling	Skift + 10 km renning	Samlað úrslit
Gudmundur	0.22.08	1.13.32	0.37.57	2.13.37
Andrass	0.27.11	1.10.17	0.38.24	2.15.52
Áslakur	0.30.48	1.08.59	0.37.58	2.17.45
Ottar	0.23.37	1.13.47	0.42.50	2.20.14
Karina	0.25.11	1.15.55	0.39.56	2.21.02
Súsanna	0.24.45	1.15.25	0.41.12	2.21.22
Joan	0.28.30	1.17.25	0.37.36	2.23.31

Samanbera vit við úrslitini úr Haderslev, umleið ein mánaða áðrenn kappingina, so síggja vit at tað serliga er í svimjingini og súkklingini at íðkararnir dragna, meðan teir faktiskt renna ‘yvir evni’ í tí nógva hitanum. Hetta luktar eitt sindur av at svimjiteinurin var ov langt og renniteinurin ov stuttur, meðan súkklitíðirnar nokk eru rímiliga á leið (krevjandi ruta við vindi og brekkum, smølum vegum og krappum svingum).

Navn	1500m svimjing + skift	40km súkkling	Skift + 10km renning	Tilsamans
Joan Bláfoss	00:24.42	01:10:09	00:37:18	02:12:09
Karina Ottesen	00:22:23	01:10:01	00:40:30	02:12:54
Súsanna Skylv Sørensen	00:24.01	01:14:59	00:42:43	02:21:43
Sóley í Eyðansstovu	00:31.18	01:15:18	00:52:47	02:39:23
Áslakur Nesá	?	?	?	02:14:06
Andrass Joensen	00:25.42	01:08:23	00:42:41	02:16.41

Gev gætur at svimjingin í Haderslev er íroknað skift úr vátdrakt til súkkling, meðan skiftið á Rhodos er tikið uppí súkklingina.

Manaudou blakað av italska liðnum

Sambært tíðindunum her á SwimmingWorld, so hevur franska svimjistjørnan longu gjørt seg ópopulera í nýggja svimjifelagnum í Italia, eftir at hon fyri trimum mánaðum síðani fór frá sínum franska svimjifelag og venjaranum Phillipe Lucas. Nýggi fyrrverandi venjarin Paolo Penso skal hava sagt: “If Laure wants to work hard I can help her do great things but if she’s not ready to work hard, I’m not the right coach”

Sviar duga eisini

Stefan Nystrand (25 ár) og Therese Alshammar (30 ár) hava í dag hvør í sínum lagi sett næstbestu tíð í heiminum nakrantíð; Nystrand í 100 frí við tíðini 47.91, og Alshammar í 50 frí við tíðini 24.23 (báðar tíðir í 50 metra hyli). Bæði venja tey til dagliga í SK Neptun í Stockholm, og rættiliga áhugavert so eru bæði kend fyri at venja rættiliga lítið til dagliga.

Nystrand nevnir í tíðindunum her um sína venjing, at hann venur umleið 3000 metrar í hvørjari venjing, ongantíð meira enn 20 km um vikuna, umframt at venja tvær ferðir um vikuna á landi, eina ferð við medisinbólti og eina ferð vekttrening við fokus á at gerast sterkur uttan at gerast stórur. Hann venur bara lætt ella max í hylinum, og altso ongantíð við ferðum í millum lætt ella max.

Alshammar nevnir ikki nakað um sína venjing í tíðindunum her á SwimNews, annað enn at hon (sum Nystrand) hevur betrað um sín teknikk, og tí svimur við færri tøkum enn nakrantíð fyrr. Men tað er alment kent at hon í øllum førum í Hamburg sjáldan vandi meira enn 2000 metrar í hvørjari venjing, og tí óivað illa kann lokkast at venja nógv meira í Stockholm, um Nystrand ikki svimur meira enn 3000 metrar har.

Lesið upprunatíðindini her og her á SwimNews.

Dara Torres sett USA met í 50 frí, 40 ára gomul

Dara Torres vann OL bronsu 33 ára gomul í Sydney ár 2000, og setur nú amerikanskt met í 50 frí sum 40 ára gomul, við tíðini 24.53 (langbani). Hetta er næstbesta tíð í heiminum í ár, og sama tíð sum Libby Lenton vann HM í Melbourne við í vár. Tíðindini kunnu lesast her á SwimmingWorld, og í longdari útgávu við spekulatión um doping her á SwimNews.

Phelps øgiligur í rygg eisini

Phelps er til nú mest kendur fyri síni úrslit og heimsmet í firvald, crawl og blandað, men hann kann so sanniliga eisini svimja rygg. Á amerikansku meistarastevnuni svam hann herfyri triðbestu tíð nakrantíð í 200 rygg (1:54.65, Ryan Lochte eigur heimsmetið á 1:54.32), og í gjár hótti hann so aftur heimsmetið á einum ryggteini við at svimja næstbestu tíð nakrantíð í 100 rygg (53.01, Aaron Piersol eigur heimsmetið á 52.98). Continue reading Phelps øgiligur í rygg eisini

Replay hjá Crocker á amerikansku meistarastevnuni

Eitt ‘oooh’ fór gjøgnum høllina í Indianapolis í gjár, tá ið úrslitatalvan vísti DSQ út fyri Ian Crocker í finaluni í 100 firvald. Hann hevði tjóvstartað á sama hátt sum hann tjóvstartaði í innleiðandi 4 x 100 blandað í Melbourne, tá ið hann varð atvold til at Michael Phelps ikki kláraði metnógv 8 gullmerki á somu stevnu. Og fyri at gera tað enn meira surrealistiskt, so kláraði Michael Phelps allíkavæl akkurát at vinna á Crocker, á sama hátt sum hann vann í síðstu tøkum í finaluni í 100 firvald í Melbourne. Lesið her á SwimmingWorld.

Um nýggju superdraktirnar frá Speedo

SwimNews skrivar rættiliga áhugavert her um nýggju FS-Pro svimjidraktirnar frá Speedo, at ‘um eg var venjari ella svimjari á veg til Beijing, so hevði eg staðið við hurðina til høvuðsskrivstovuna hjá Speedo og bukað upp á hurðina, inntil onkur kom við einum posa av skræddaraseymaðum FS-Pros’.

Tiltikni amerikanski landsliðsvenjarin Mark Schubert kallar draktirnar fyri størsta tøkniliga lop innan svimjing síðani einaferð mitt í 70’unum, og svimjistjørnur sum Kate Ziegler og Ryan Lochte rósa teimum eisini óført:

“I don’t think the suit took off all 10 seconds,” Ziegler said. “But it definitely made a difference.” (um hvussu stóran týdning Kate Ziegler helt at draktin hevði, tá ið hon herfyri knústi heimsmetið hjá Janet Evans, sum annars hevði staðið líka síðani 1988)

Now she says: “I just didn’t believe it could be that good. I thought it was overrated.” After that 15:42.54, she intends to wear the FS-Pro “in all competition from now on”. Having never felt so fresh and void of heaviness of legs associated with hard distance events. Ziegler said. “It basically feels like a second skin”

“Every time I put on that suit, I know I’m going to fly,” said Ryan Lochte. “I’ve never felt this good in the water. It’s super thin, and it keeps you floating. If you try that suit once, you’re never going to put anything else on”

Draktin vigar bara helvtina av tí sum aðrar draktir viga, og strammar allíkavæl minst líka væl um kroppin. Hon upptekur lítið og einki vatn, og tornar tí eisini uppá bara 45 minuttir eftir ein tíma í vatni, har ein (Speedo) Fastskin brúkar 16 tímar.

Michael Phelps brúkar hana.

Greinin endar eitt sindur stuttligt, við at tey nevna at hendan draktin týðiligvís gevur svimjarunum fyrimun í vatninum, í mun til fólk uttan líknandi drakt… og at fyrireikararnir av Beijing tí mugu syrgja fyri at allir luttakarar hava atgongd til draktirnar, um tær ikki skulu vera ólógligar.

Nólsoyarsvimjingin 2007

Nólsoyingar bjóða til árligu svimjingina yvir um fjørðin, leygardagin 11. august kl 15:30, møta kl 14:30. Í ár kanst tú velja millum at svimja og renna annaðhvørt allan teinin á umleið 4000 metrar, frá niðanfyri hjá radioamatørunum í Havn til heiðursportrið í Nólsoy, ella ein stytri tein á umleið 1000 metrar, frá einum báti út fyri Nólsoy til heiðursportrið.

Hetta er tíggjunda árið at skipað verður fyri svimjing til Nólsoyar. Luttøkugjaldið er 250 krónur, og tú mást hartil sjálv/ur fáa til vega ein rímiligan stóran bát, tvey vaksin hjálparfólk í bátinum, VHF og vátdrakt. Tilmelding fer fram her á triathlon.fo. Sí annars viðfestu innbjóðing frá fyrireikarunum.