Author: rokur

So byrjar mín dagbók

Eg bað í gjár svimjarar, venjarar og triathletar um persónligar frásagnir frá Rhodos, og má tí heldur grípa í egnan barm. Skal við sum venjari og ferðaleiðari hjá triathletunum, og ætli mær so bestemt eisini at síggja ógvuliga føroyskur út við svimjihylin, nú føroyingar liggja til at fáa eina rúgvu av heiðursmerkjum. So her byrjar mín persónliga dagbók frá Oyggjaleikum, 5 dagar áðrenn vit sleppa avstað.
Continue reading So byrjar mín dagbók

Tíðindi ynskjast frá Rhodos

Ja, nú fara svimjararnir longu mánadagin, og vit onnur nakrar dagar seinni. Útlitini fyri at fáa tíðindi heim úr Rhodos eru ivasom, og vit her á svimjing.com vilja tí heita á allar svimjarar og triathletar um endiliga at lata frætta tíðindi gjøgnum hesa heimasíðu, líka mikið hvussu banal tey kunna tykjast.

Kringvarpið fer óivað at senda frá Oyggjaleikum, bæði í útvarpi og sjónvarpi. Svimjisambandið lovar eisini at frætta frá sær, og kanska vit kunnu frætta okkurt eisini á almennu heimasíðuni hjá Oyggjaleikum á Rhodos. So tað almenna er faktiskt í ordan, men kanska tey her heima eisini ynskja eitt sindur av inside’ara-vitan, frá venjarum og svimjarum.

Tey sum skráseta seg sum brúkarar á svimjing.com, kunnu frítt skriva almennar frásagnir (tvs. tíðindi), blogg postar (dagbøkur) og forum evni. Øll kunnu viðmerkja. So ein dreymafrásøgn vildi til dømis verið at onkur av okkara svimjarum setti seg at skriva dagliga frá Oyggjaleikum, um hvussu tað gekst viðkomandi á leikunum.

Tað er rímiliga lætt at seta myndir inn í postarnar, og enn lættari bara at viðfesta tær. Stóri trupulleikin er sjálvsagt, um vit finna nakað brúkiligt internetsamband á leikunum, so at vit fáa skrivað heim. Og tí hesa áheitan, tí eg veit fyri meg; at eg skal út at leita eftir sambandi, til at fáa sent tíðindi heim.

Eg havi møguleika fyri at fáa sett skipanina soleiðis upp, at man bara skal senda ein teldupost til onkra ávísa adressu, til at fáa til dømis blogg postar á síðuna. Fari nokk at seta meg at fáa hetta at rigga nú í vikuskiftinum, um ikki ov nógv annað kemur í vegin. Tað snilda við tí er nevniliga ikki at man so kann skriva frá einum vanligum teldupost-forriti sum Outlook, men heldur at man tá kann skriva frá hesum nýggjaru fartelefonunum, sum hava møguleika at senda teldupostar. Man kann enntá taka myndir við fartelefonini, og so bara senda tær til eina adressu sum t.d. post@svimjing.com, til at fáa tær á heimasíðuna.

Men tað skal líkast setast upp fyrst.

Í øllum førum haldi eg at vit og onnur svimjiáhugaði høvdu verið ógvuliga glað fyri at kunnað fingið bæði almennar frásagnir frá Rhodos, og meira persónligar ‘dagbøkur’ frá svimjarum, venjarum og triathletum. Sjálvur eri eg ófatiliga spenntur uppá at hoyra hvussu umstøðurnar eru har suðuri, í hylinum og annars, longu nú týsdagin tá ið tit svimjarar eru komnir upp á pláss.

Latið frætta frá tykkum, líka mikið um tað verður her ella aðra staðni 🙂

Køla tey vatnið á Rhodos ?

Havið runt Rhodos er 24-26 stig Celcius hesa ársins tíð. Lufthitin er einar 32-36 stig um dagin, og 26-29 stig um náttina. Eg giti at svimjihylurin tí ikki verður kaldari enn 27-28 stig, og spurningurin er tí… hvat sørin ger man um hylurin verður heitari enn tey 25-28 stig sum FINA loyvir? Fer man tá at køla vatnið?

Vit kenna øll effektina av ov køldum vatni. Men ov heitt vatn hevur eisini eina ávirkan, við at ávirka ‘viskositetin’ í vatninum, ella hvussu væl man glíðir ígjøgnum tað. Tess heitari vatnið er, tess betri (og tí skjótari) glíður tú ígjøgnum tað; og tískil er eisini eitt evstamark fyri hvussu heitt vatnið má vera, um talan skal kunna vera um met. Eitt sindur sum tá ið frælsur ítróttur hevur krøv um at tað ikki má vera meira enn so og so nógvur viðvindur.

Eg veit ikki hvat man ger. Kanska einki. Kanska ignorerar man tað bara, og kallar tað met allíkavæl, tí at man allíkavæl einki fær gjørt við hitan. Kanska verður tað slettis ikki so heitt, tí at vatnið kemur úr undirgrundini eot.

Nakað annað er at eg hevði ynskt at vit høvdu hendan trupulleika í Føroyum 🙂

Kitajima ætlar sær at seta met í heyst

Japanska svimjisambandið lovar automatiska kvalifikatión til OL í Beijing 2008, um ein japanskur svimjari klárar at seta heimsmet á Japan Open International 2007, sum verður 21.-24. august í Narashino nær Tokyo. Kitajima ætlar at seta minst eitt, og stevnan verður yvirhøvur fylt við heimsstjørnum úr øðrum londum eisini.

Avstralska Libby Lenton ætlar sær at seta hatta heimsmetið í 100 frí, sum hon varð ‘snýtt’ fyri á stevnuni ‘Duel in the Pool’, beint eftir heimsmeistarastevnuna í vár. Heimsmeistarin í 400 frí hjá monnum, koreanski Park Tae-Hwan, kemur eisini til Japan, umframt suðurafrikanski Roland Schoeman, ukreinski Oleg Lisogor, polski Mateusz Sawrymowicz og bretski David Davies. Tilsamans 11 heimsmeistarar, umframt óivað nógv onnur góð eisini.

Lesið her á SwimNews.

Skjótasti havsvimjari fær eina flogferð

Sum tit kunnu lesa í tíðindunum her av tsvim.com, so bjóða fyrireikararnir av havsvimjingini á Jóansøku nú eina flogferð til skjótasta svimjara, og ‘spennandi vinningar’ til nr 2 og 3 eisini. Hetta man vera klárt tann størsti vinningur sum hevur verið lovaður í føroyskari svimjing nakrantíð, ella í øllum førum í nýggjari tíð

Ægir (Ísland) søkir eftir høvuðsvenjara

Sum tit kunnu lesa í viðfesta word-skjali, so søkir íslendska svimjifelagið Ægir nú eftir ambitiøsum og evnaríkum høvuðsvenjara, at standa á odda fyri størsta og besta svimjifelag í Íslandi. Felagið hevur 200 kappsvimjarar umframt svimjiskúla, harav 20 eru á elituliðinum, 2 hava olympiskar royndir, og 1 longu hevur kvalifiserað seg til OL í Peking 2008. Freistin at søkja er 1. juli.

Íslendska svimjisambandið hevur sent skjalið gjøgnum Svimjisamband Føroya til allar venjarar og svimjifeløg í Føroyum, og vit kunnu tí væl siga at vit longu síggja fruktirnar av nýggja samstarvinum millum sambondini bæði.

Annars eru krøvini sjálvsagt høg hjá íslendingum, til førleikarnar hjá komandi høvuðsvenjaranum. Frálíkar eginleikar innan svimjivenjing,  -umsiting og hvat viðfer av menniskjum viðvíkur. Áhuga at arbeiða við svimjarum á øllum førleikastigum. Góða praktiska vitan um svimjing, umframt gjarna útbúgving eisini. Og so lívbjargaraprógv eisini, við tað at venjarin í øllum førum til tíðir kemur at arbeiða einsamallur.

Kontaktupplýsingarnir síggjast í viðfesta skjali.

Brooke Hanson á sjúkrahús fyri elektriskan stoyt

Avstralski silvurheiðursmerkjavinnarin frá OL 2004 og fleirfaldi heimsmeistarin føldi ein undarligan stoyt í hondunum, tá ið hon royndi eitt boblibað, og kollapsaði so tá ið hon kom upp úr tí. Vísti seg at hon hevði fingið ein álvarsligan elektriskan stoyt í baðnum, tó so at eingin kundi staðfesta nakað brek í skipanini. Hon er stabil nú, men á sjúkrahúsi. Lesið her.

Kate Ziegler knúst 19 ára gamla metið hjá Janet Evans

Amerikanska Kate Ziegler setti í gjár nýtt heimsmet í 1500 metrar frí á langbana, tá ið hon á stevnu í Mission Vieho (USA) svam teinin á 15:42.54, ið er heili 10 sekund skjótari enn gamla metið hjá Janet Evans. Splitt-tíðirnar vóru 4:09.87 við 400 og 8:22.57 við 800 metrar. Evans setti sítt í Orlando (USA) tann 26. mars 1988.
Continue reading Kate Ziegler knúst 19 ára gamla metið hjá Janet Evans

Joan Bláfoss nr 3 í DM í triathlon á OL-teininum

Joan Bláfoss vann í dag bronsu í donsku meistarakappingini í triathlon á OL-teininum, sum eru 1500 metrar svimjing, 40 km súkkling og 10 km renning, ella sami teinur sum nýttur verður á Oyggjarleikum 2007 á Rhodos. Karina Ottesen varð nummar 5, eisini í elitu-bólkinum, meðan Sóley í Eyðansstovu varð nr 1 í aldursbólkinum 25-29 ár.

Úrslitini hjá elituni kunnu síggjast her á Ultimate Sport Index, og tey hjá aldursbólkunum her. Niðanfyri eru listaðar upp tíðirnar hjá teimum 6 skjótastu elitukvinnunum og Sóley:

  Felag Svimjing Skift Súkkling Skift Renning Tilsamans
Helle Frederiksen TRI4 0:19:46 0:55 1:08:07 1:12 0:37:54 2:07:52
Ann B.S. Banke KTK86 0:22:16 1:00 1:08:25 1.43 0:40:34 2:13:56
Joan Bláfoss KTK86 0:24:52 1:23 1:08:59 1:36 0:37:47 2:14:35
Anne Vagner TRI4 0:22:56 1:05 1:11:07 1:19 0:41:11 2:17:37
Karina Ottesen KTK86 0:23:22 1:01 1:10:49 1:33 0:43:00 2:19:42
Gitte Rømer Århus 1900 0:19:48 1:00 1:13:21 1:43 0:44:33 2:20:24
Sóley í Eyðansstovu KTK86 0:26:26 1:59 1:13:13 2:16 0:50:13 2:34:05

Sum fyrr nevnt so er tað torført at samanbera úrslit frá triathlon til triathlon, av tí at teinarnir eru uttandura, og tí ógvuliga skiftandi hvat veður og brekkum viðvíkur. Tær báðar Joan og Karina fingu eisini væl betri tíðir í Haderslev fyri 14 døgum síðani, enn tær nú fingu í Årshus, meðan Sóley faktiskt var væl betri hesuferð.

Men útlitini eru allíkavæl bara heilt hampuliga góð, nú Joan í tveimum kappingum innan 14 dagar hevur klárað betri tíð enn silvur á Oyggjaleikum á Guernsey í 2003, og gull á Isle of Man í 2001.