rokur

Herferð móti føroysku luttøkuni á HM

Nikki Dryden á swimnews.com hevur seinastu tríggjar dagarnar talað rættiliga harðliga at politikkinum hjá FINA, at veita fíggjarligan stuðul til veikari lond at luttaka á HM. Í tveimum teimum fyrstu greinunum (29. og 30. mars) sleppa vit føroyingar rættiliga snikkaleysir, við tað at hann fyrst og fremst leggur á ‘turistunum’ úr Afrika. Men í gjár er álopið rættað móti teimum 5 londunum sum FINA hevur stuðlað hóast tey ikki eru góðkend av Olympisku nevndini, og tá verður álopið jú beint á Føroyar, bæði so og so.

Fyrsta greinin eitur “Where are all the Women?“, har hann kritiserar at FINA ikki hevur kravt javnt býti millum menn og kvinnur á liðunum. Eftir øllum at døma betalir FINA fyri uppihald og flogferð hjá 4 svimjarum og 2 hjálparfólkum úr hvørjum landi, uttan at krevja at talan skal vera um t.d. 2 menn og 2 kvinnur. Og tí luttaka ein rúgva av londum bara við monnum.

Her er eingin orsøk hjá okkum at føla okkum rakt, við tað at Føroyar luttaka við 2 gentum og 2 dreingjum.

Næsta greinin eitur “Quantity Not Quality: FINA’s Strategy“, har hann leggur á at summi lond luttaka við reinum turistum. Nevnir onkran svimjara úr Ghana, føddur ár 1975, sum akkurát kláraði at svimja undir 4 minuttir í 200 bringu, bara fyri at verða kolldømdur. Og at nógvir rímiliga gamlir luttakarar fóru til Avstraliu fyri síðani at strika sína luttøku í seinastu løtu.

Nøkur citat:

“Why is there a 32 year old who goes a 3:58 in the 200 breast competing at the World Championships? How on earth is that helping to develop swimming in Ghana? I do not think it is. Instead, I think it’s a nice free trip to Australia for a bunch of men.”

“Of those 11, there were three 32 year olds, one 30 year old, and one guy aged 29. Why are they scratching from the 50 free? Too much shopping?”

Men aftur her er eingin orsøk hjá okkum at føla okkum rakt. “So all together, Faroe Isles are doing very, very well” 🙂

Triðja greinin “Money Can Be Spent More Wisely” rakar tó nógv meira plett, á eitt mál sum er ógvuliga eymt fyri okkum føroyingar. Nevniliga at vit ikki hava olympiskan limaskap. Dryden heldur her at FINA-pengarnir eru burturblakaðir, um stuðulin allíkavæl ikki kann føra til OL-luttøku, og tað kann man so diskutera. Talan er sambært Dryden um 5 lond, sum merkir at vit eru 20% av trupulleikanum.

Eg veit hvørki um maðurin er liðugur at skriva um hetta mál, ella um tað hevur nakran týdning fyri hvat fólk halda um politikkin hjá FINA. SwimNews er gott nokk ein tann størsta svimjiheimasíðan í heiminum, sum hevði til dømis 55.405 ‘pageviews’ í gjár, sambært mátingunum hjá Alexa. Men eingin sigur at fólk eru einig, bara tí at Dryden skrivar soleiðis. Vit føroyingar mugu bara royna at hava argumentini klár, ífall at onkur týðandi skuldi sett okkum somu spurningar.

Ella fáa okkum IOC-limaskap 🙂

Franska L’Equipe ákærir Thorpe fyri doping

So er tað tað, er svimjingin ‘rein’? Franska avísin L’Equipe skrivar sambært Eurosport at ein dopingroynd hjá avstralska Ian Thorpe vísir óvanliga høg virði av testosteron (mannligt kynshormon) og onkrum øðrum hormon kallað ‘leutenising’, sum tó bæði eru náttúrlig at hava í kroppinum, í lægri nøgdum. Thorpe mótmælir sjálvsagt harliga, og sigur seg hava sett eina æru í netupp at hava verið ‘reinur’ og arbeitt móti doping.

Eurosport skrivar tó í øðrum tíðindum, at avstralsku antidoping-myndugleikarnir siga onga orsøk vera til halda at Thorpe var dopaður. “Media reports that an athlete has failed a drugs test are simply incorrect.”.

Eisini áhugavert , at hálendski venjarin Jaco Verhaeren traðkar fram og verjir Thorpe, hóast tað sum so ikki er nakað beinleiðis samband millum teir báðar (Verhaeren er venjari hjá m.ø. Pieter van der Hoogenband). Hann skeldar avísina út fyri at skriva sovorðið bara fyri at dálka um karrieruna hjá Thorpe, uttan yvirhøvur at hava kontakta Thorpe fyrst.

Phelps náddi ikki tey 8 HM-gullini

Katastrofa! Michael Phelps kom so ræðuliga nær at seta met í tal av gullheiðursmerkjum á éinari stevnu, tá ið hann fyrst vann einstaklingakappingina í 100 firvald á Ian Crocker og síðani nú setti heimsmet í 400 blandað. Men áttanda og trygga heiðursmerkið í 4 x 100 blandað reyk vegna kolldøming, tá ið Ian Crocker tjóvstartaði í innleiðandi riðlinum.

Spurningurin er so hvør sum átti feilin í riðlinum: Firvaldasvimjarin Ian Crocker sum tjóvstartaði, ella bringusvimjarin Scott Usher sum svam beint áðrenn. Venjarar plaga at siga at ábyrgdin er hjá tí sum svimur áðrenn, við tað at næsti svimjari meira ella minni startar ‘blindt’, tá ið hin er komin so og so nær at vegginum, og tann sum svimur tí ikki má slækka av ella kiksa seinasta innslag. Men eg havi ikki sæð riðilin enn, og Eurosport tykist so avgjørt at geva Crocker skyldina.

Drápuliga ærgeligt hjá Michael Phelps, sum bara kundi sita og hyggja at. Hann svam nevniliga ikki innleiðandi riðilin (sum vanligt er, um man hevur nóg nógvar góðar til taks), og sat tí á áskoðaraplássunum meðan hinir kolldømdu seg. Skuldi sjálvsagt svimja í finaluni, tá ið teir komu so langt. Men OK, hann náddi so tey sjey, sum er tangering av gamla metinum hjá Mark Spitz.

Lesið upprunatíðindini á Eurosport

Popov flytir til Føroya

Eg frætti nú frá okkara liði í Avstraliu, at ein tann kendasti svimjarin yvirhøvur, Alexander Vladimirovich Popov, seriøst umhugsar at flyta til Føroya og búseta seg í Runavík. Hetta tí at hann ynskir at vera meira saman við gentuni hjá sær, sum býr í Føroyum.

Alexander Popov var ‘kongur’ í sínum døgum, sum faktiskt ikki eru so nógv ár síðani. Vann OL gull í 50 og 100 frí í Sydney 1992, og í 50 og 100 frí í Atlanta 50 og 100 frí, umframt silvur í 100 frí í Sydney 2000. Hann er eisini fleirfaldur heimsmeistari, og vann m.a. 50 og 100 frí í Barcelona so seint sum í 2003. Og hevur enn heimsmetið í 50 frí á langbana (50 metrar).

Popov verður ofta brúktur sum demonstratión av ‘perfektari’ sprint-frísvimjing, sum hann lærdi uppá tann harða mátan í Moskva, ta tíð hann vandi har. Venjarin Gennadij Touretski var sum ein heykur yvir honum, og plagdi faktiskt at senda hann upp og heim frá venjing, um ikki hann svam 100% rætt. Og tað kastaði so væl av sær seinni.

Seinni flutti hann (og venjarin) til Avstraliu, at venja nøkur ár saman við millum øðrum polsk-avstralska Michael Klim. Og seinni flutti hann (og Touretski) so aftur til Sveits, har hann er búsitandi í løtuni.

Tað var í Sveits at hann og unnusta hansara møttust, fyri umleið einum ári síðani. Adina Aprijlnova er eisini úr Russlandi, men hevur seinastu árini arbeitt á Bakkafrost á Glyvrum, har hon trívist væl. Nú ynskja tey so at flyta saman; men hvørgin av teimum vil flyta aftur til Russlands, og Adina fær ikki loyvi at búseta seg í Sveits. So tí verður tað Runavík.

Vit vita einki um hvussu vítt føroyska svimjingin fær nakað burtur úr, at Popov flytir hendan vegin. Í fyrstu atløgu ætlar hann sær bara at búgva her og annars arbeiða uttanlands, sum væl ber til við tað at hann mest fæst við at hava ráðstevnur um svimjing og ítrótt sum heild.

Men vit hava væl loyvi at vóna. Kanska tekur Runavíkar Kommuna sær um reiggj, nú tað fer at frættast at ein tann størsti svimjari nakrantíð býr í einari kommunu har størsti svimjihylur ikki rúmar meira enn ein hálvan fólkaskúlaflokk í senn. Kanska Popov fæst at virka sum okkurt slag av ítróttarráðgeva hjá SSF ella ÍSF, við tað at hann hevur universitetsprógv í ítrótti.

Og hvør veit – kanska flytir Touretski við 🙂

Ægir vann SUM 2007

Árliga SmáUnglinaMeistarastevnan var í Klaksvík nú í vikuskiftinum, har yngru bólkar okkara møttust úr øllum svimjifeløgum í landinum, at kappast um hvør ið skuldi verða føroyameistari ár 2007. Tað vórðu vertirnir úr Klaksvík sum vunnu flest heiðursmerki, við Reka á øðrum plássi og Vágs Svimjifelag á triðja. Serliga Alvi Hjelm úr Ægir gjørdi bart, við at vinna heili 9 gullheiðursmerki, harav ein rúgva var bólkamet.
Continue reading Ægir vann SUM 2007

SUM í vikuskiftinum

Árliga SmáUnglingaMestarastevnan er sum kunnugt í Klaksvík nú í vikuskiftinum, og tað er tí væntandi at hendan heimasíðan verður eitt sindur friðarlig komandi dagarnar, hóast HM, í øllum førum fyri mítt viðkomandi. Hetta tí at kappingarskráin er long har norðuri, og internetsambandið óvist.

Tað eru teir tríggir yngstu bólkarnir sum kappast, sum eru svimjarar frá umleið 1. til 6. klassa í fólkaskúlanum (tey elstu eru eini 12-13 ár). Vit byrja við upphiting nú kl 18, og kappast so frá 19 til 22 í kvøld, fyri síðani at byrja tíðliga í morgin, og so kappast aftur til einaferð út á kvøldið. Og so aftur sunnumorgunin til kl 10, og aftaná kirkjutíð til suðuroyingarnir mugu fara fyri at náa Smyril.

Væntandi verða serliga klaksvíkingar og leirvíkingar stinnir, umframt einstakir frá hinum feløgunum eisini. Men vit fáa at síggja; Reki og HS eru eitt sindur handicappað av at konfirmatión er í Leirvík og Tórshavn sunnudagin, og tað tí kann hugsast at tey missa onkran luttakara.

Kappingin er so vítt eg veit síðsti kjansur hjá teimum í hesum at kvalifisera seg til FM og DÅM (Danske ÅrgangsMesterskaber). Til FM krevst at man svimur minst eina bronsunálatíð, og til DÅM skal man klára donsku kvalifikatiónstíðirnar. Men um svimjarin kvalifiserar seg til FM, so er kanska ein eyka kjansur har at kvalifisera seg til DÅM.

Gev tó gætur, at tað ikki er 100% vist at SSF skipar fyri túri til DÅM aftur í ár. Ikki at eg veit at tey ikki gera tað, men eg veit heldur ikki um tey gera tað 🙂

Tvey heimsmet afturat í morgun

Tey eru nú komin uppá 12 heimsmet tilsamans, sum má vera nær metinum í heimsmetum á éinari stevnu. Amerikanski Ryan Lochte vann á heimsmethaldaranum Aaron Piersol (eisini úr USA), við at svimja 200 rygg á 1:54.32. Og amerikanska stafettin í 4 x 200 frí setti eisini heimsmet við tíðini 7:03.24.
Continue reading Tvey heimsmet afturat í morgun

Mona Simonsen sett met í 800 frí í nátt

Ja nú hava so øll fýra sett føroyskt met, sum eru til HM í Melbourne. Mona Simonsen úr TS svam teir 800 á 9:18.65, og betraði harvið gevaldiga um sína persónligu bestu tíð á 9:35.39. Hetta flutti hana eini 9 pláss fram á úrslitalistanum, frá 44 av 51 til 35 av 50. Kristian Olsen varð við 24.65 nýggju tíggjundapartar ov stuttur til at betra um sítt egna met í 50 frí, á 24.56.

Pál Joensen og Jutta Thomsen hava eisini svomið væl, um enn meira ‘deyðiligt’ enn Mona. Pál betraði seg frá 26.88 til 26.03, og Jutta frá 9:33.64 til 9:32.79. Hetta gav Pál eina endaliga plasering sum nr 115 av 191, og Jutta eina sum nr 42 av 50. Kristian Olsen endaði sum nr 77 av 191.

Jutta Thomsen átti forrestin føroyska metið í 800 frí, við teimum nevndu 9:33.64, sum hon svam á EJM á Mallorca í 2006. Báðar svumu tískil undir føroyska metið, um enn Mona gjørdi tað væl ógvusligari enn Jutta.

Saman um tikið hava føroyingarnir nú sett 5 føroyskt met á HM í Melbourne. Jutta Thomsen í 200 frí við 2:10.81, Mona Simonsen í 800 frí við 9:18.65, Kristian Olsen í 100 frí við 54.43, og Pál Joensen í 400 frí við 4:08.40 og 800 frí við 8:30.31. Éin kapping er eftir at svimja, sum er Pál í 1500 frí, har hann mest sannlíkt kann seta føroyskt met eisini.

Hackett umhugsar at melda frá í 1500 frí

Hann hevur vunnið teir 1500 fýra HM á rað, men ivast nú í um tað loysir seg at royna fimtu ferð. Varð jú einans nummar 3 í 400 frí, og endaði sum nummar 7 í 800 frí. Samstundis hava aðrir stórir 1500 metra svimjarar sum t.d. Larsen Jensen bara hvílt seg, heldur enn at rokast á stytru teinunum.

Orsøkin er náttúrlig nokk. Hann varð opereraður í akslunum tíðliga í 2006, skifti venjara rímiliga stutt áðrenn HM, og helt sjálvur at tað ávirkaði hansara fyrireiking til HM.

Tað er heldur ikki tí at hinir eru farnir frá honum, tí allir vóru langt frá hansara meti í 800 frí (Mellouli vann við 7:46.95, Hackett hevur metið við 7:38.65), og heldur ikki í nærheitini av teimum 400 frí hjá Iani Thorpe (Park vann við 3:44.30, Ian Thorpe hevur metið við 3:40.08).

Men altso, hesu ferð er hann ikki væl fyri, og spurningurin er tí um tað loysir seg at yvirhøvur royna á teimum 1500. Hann ætlar sær tó eftir øllum at døma at svimja innleiðandi, áðrenn hann avger nakað.

Lesið tíðindini á eurosport.com

“So all together, Faroe Isles are doing very, very well”

Vónandi fái eg ikki Eurosport upp á nakkan fyri at vísa hetta lítla brotið her, har Jutta svimur 200 frí og setur føroyskt met. Haldi tað er áhugavert at síggja hvussu væl Eurosport tekur fram sjálvt hesar í alheims høpi smáu svimjarar, og hoyra hvussu kompetentur og áhugaður journalisturin hjá teimum er.

Hann gitir til dømis at hetta er ein roynd eftir føroyska metinum, og leggur til merkis at hon sparkar meira enn Mona Simonsen gjørdi í riðlinum beint áðrenn. Minnist til navnið ‘Simonsen’ eisini. Og tosar um ‘same swimming suit style’, hvat hann so meinar við tað. Aftaná riðilin nevnir hann hvussu stór betringin er í mun til tilmeldingartíðina.

Í riðlinum hjá Monu legði hann til merkis hvussu lítið hon sparkaði, sjálvt seinastu longdina, og gitti at hon mátti vera langteinasvimjari. Púra rætt, vita vit føroyingar, men man má altso taka hattin av fyri einum journalisti sum dugir og orkar hetta, at fylgja við í øllum riðlum, hóast at talan er um yvir 2000 svimjarar tilsamans.

Her er brotið (ca. 8 MB tilsamans). Eg vildi gjarna víst tað í betri góðsku – og veit eisini hvussu man ger – men tori ikki so væl, vegna copyright og alt hatta har. Hetta við copyright er fremsta orsøkin til at tað er so soltið við videoum her á síðuni.

Get the Flash Player to see this player.