Author: rokur

HM 2011 verður í Shanghai

FINA hevur avgjørt at HM 2011 á langbana (50m) verður í Shanghai (Kina). Altso HM 2007 nú í Melbourne, OL 2008 í Beijing, HM 2009 í Rom, HM 2011 í Shanghai, og so OL 2012 í London. Umframt at stuttbana-HM (25m) verður í Manchester (Bretlandi) í 2008, og í 2010 á einum enn ikki ásettum stað.

Tíðindini eru fingin her av eurosport.com. Sí eisini kalendaran hjá FINA og tilhoyrandi yvirlit yvir hvussu tiltøkini eru skemaløgd.

  • HM 2007 í Melbourne (50m)
  • HM 2008 í Manchester (25m)
  • OL 2008 í Beijing (50m)
  • HM 2009 í Rom (50m)
  • HM 2010 í ?? (25m)
  • HM 2011 í Shanghai (50m)
  • HM 2012 í ?? (25m)
  • OL 2012 í London (50m)

Nú sæst riðlabýtið á omegatiming.com

HM-startlistar við riðlabýti síggjast nú á omegatiming.com, út fyri hvørja kapping á skránni. Vit síggja t.d. her at Pál Joensen skal svimja 50 metrar frí í riðli 7 móti 7 svimjarum úr Myanmar, Namibia, Albania, Zambia, Palestina, Cambodia og Togo. Landakotur kunnu forrestin síggjast her á heimasíðuni hjá FINA.
Continue reading Nú sæst riðlabýtið á omegatiming.com

Jedrzejczak treytaðan dóm fyri ferðsluvanlukku

Polska Otylia Jedrzejczak er dømd 9 mánaðir treytað fongsul og 270 tímar samfelagstænastu (30 tímar um mánaðin í 9 mánaðir), umframt frádøming av koyrikortinum í eitt ár, fyri at hava verið atvold til ferðsluvanlukkuna sum drap beiggjan. Hon var ikki til staðar í rættinum, tí at hon fyrireikar seg til HM í Melbourne.

Jedrzejczak er forsvarandi HM og OL meistari í 200 firvald hjá kvinnum. Hon hevur sligið heimsmetið tvær ferðir, sum tó nú er í hondunum á avstralsku Jessicah Schipper, ið eisini skal kappast í Melbourne.

1. oktober 2005 royndi Otylia Jedrzejczak at yvirhála eina røð av lastvognum á einum tvey-sporaðum vegi nær Plock í Pólandi, tá ið hon mátti snara av vegna mótkoyrandi ferðslu og rendi á eitt træ. 19 ára gamli beiggin Szymon doyði av stoytinum, meðan hon sjálv fekk skaða í ryggjageislarnar og høvdið, og tí var burtur frá svimjingini í 2 mánaðar. Hon kann kæra dómin.

Tíðindini her eru sjóðað saman av tíðindum á eurosport.com, swimmingworldmagazine.com og swimnews.com

Innbjóðing til SUM 2007

Smáunglingameistarastevnan 2007 verður í Klaksvík í døgunum 30. mars til 1. apríl 2007. Gev gætur at bólkur 3 nú aftur kappast á SUM, saman við yngru bólkarnar 1 og 2, og at tilmeldingarnar skulu verða inni “áðrenn 28. mars”. Umframt at Svimjinevndin áðrenn kappingina skal hava kvittan uppá at startgjøldini eru goldin.

Continue reading Innbjóðing til SUM 2007

FINA innført peningavirðislønir í HM

FinaÍ ár er fyrstu ferð at altjóða svimjisambandið FINA gevur heiðursmerkjavinnarunum peningavirðislønir afturat heiðursmerkjunum. US$12.000 fyri gull, 7.000 fyri silvur og 5.000 fyri bronsu, umframt US$25,000 bonus fyri heimsmet. Umroknað við dagskursinum altso einar 67.000 krónur fyri gull, 39.000 fyri silvur, 28.000 fyri bronsu og  140.000 fyri heimsmet. Alt í alt gevur sambandið einar 2 milliónir amerikanskir dollarar til heiðursmerkjavinnararnar, ella 11,2 milliónir danskar krónur.

Um vit til stuttleikar rokna eitt sindur uppá møguleikan hjá Michael Phelps at taka 7 gull, so eru tað altso einar 469.000 krónur frá FINA, umframt sikkurt bonus frá amerikanska svimjisambandinum eisini, og frá sponsorum. Av teimum 7 greinunum eigur hann nýggj heimsmet í tveimum; so um vit varliga vænta at hann setur heimsmet aftur í teimum, verður tað 469.000 + 280.000 = 749.000 krónur frá FINA aleina, fyri luttøkuna á HM 2007. Ikki so galið.

Upprunaligu tíðindini á SwimNews

Startlistin klárur til HM 2007

Samlaði startlistin til HM 2007 er nú lagdur út á omegatiming.com. Hann er 160 síður langur og inniheldur bæði tilmeldingarnar listaðar upp fyri hvørt land sær, umframt sjálvan startlistan við plasering av luttakarum í mun til teirra tilmeldingartíðir. Har er eisini avsett pláss til ‘live timing‘, so hatta verður nokk ein av teimum síðum sum vit svimjiáhugaðu fara at vitja nógv í komandi viku.

Niðanfyri havi eg listað upp allar tilmeldingar hjá føroyingunum, við viðmerking um hvønn dag tey svimja, og hvussu tey eru plaseraði í mun til samlaða talið av luttakarum í greinini. Gott at síggja at føroyingarnir verri enn so eru aftast, um enn tað eisini er langt upp á toppin:

Kap. Dagf. Grein Svimjari Tilm.tíð Plasering
2 25/3 400 frí Pál Joensen 4:10.76 62 av 83
5 25/3 400 fri Jutta Thomsen 4:36.52 58 av 73
5 25/3 400 frí Mona Simonsen 4:40.94 59 av 73
10 26/3 200 frí Pál Joensen 1:59.41 90 av 119
16 27/3 200 frí Jutta Thomsen 2:16.01 90 av 112
16 27/3 200 frí Mona Simonsen 2:17.28 97 av 112
17 27/3 800 frí Pál Joensen 8:49.89 40 av 47
19 28/3 100 frí Kristian Olsen 55.55 120 av 177
19 28/3 100 frí Pál Joensen 56.43 133 av 177
22 29/3 100 frí Mona Simonsen 1:04.33 112 av 136
28 30/3 50 frí Kristian Olsen 24.56 92 av 195
28 30/3 50 frí Pál Joensen 26.88 146 av 195
29 30/3 800 frí Jutta Thomsen 9:33.64 43 av 51
29 30/3 800 frí Mona Simonsen 9:35.39 44 av 51
36 31/3 1500 frí Pál Joensen 16:33.14 43 av 53

Viðhefta fílan er sjálvur listin av omegatiming.com.

HS vann HS-stevnuna

Svimjistevna var í Havn í vikuskiftinum, har svimjarar úr bólki í 3 og eldri kappaðust á øllum teinum upp til 1500 metrar. Úrslitið varð at HS greitt vann kappingina um flestu heiðursmerki, við FS á øðrum plássi og Ægir á triðja. Tað skal tó nevnast at suðuroyarfeløgini vóru skerd, av tí at tríggir teir bestu svimjararnir har suðuri vóru farnir til HM í Avstraliu.

Continue reading HS vann HS-stevnuna

Tær týsku so góðar at tær vilja dopingtestast meira

Týsku svimjigenturnar eru blivnar so góðar í seinastuni, at tær nú bjóða seg til at verða dopingtestaðar meira, til at sleppa undan óneyðugan mistanka. Landsliðsvenjarin Ørjan Madsen sigur at tær enntá eru gingnar við til at frysta niður blóðprøvar, til at kunna prógva at tær ikki eru dopaðar, nú tær svimja í Melbourne.

Týska landsliðið hevur annars ikki verið so gott seinastu árini, síðani stórheitstíðina í 70’unum og 80’unum tá ið tær vóru dopaðar… so mikið at einir 169 ítróttarfólk nú fáa endurgjald frá týska statinum. Men nú eru tær so sanniliga við aftur, eftir til dømis at hava sett 3 heimsmet á EM í fjør. Og serliga amerikanar hava tí (sambært Madsen) gruggast um, hvussu vítt tær eru dopaðar ella ei.

Les upprunaligu tíðindini á eurosport.com

Landsliðið komið fram til Melbourne

Fylgið við á tsvim.com og ssf.fo, har landsliðsvenjari og svimjisambandsformaður siga frá ferðini til Avstraliu. Eftir øllum at døma gongur tað fínt; tey hava ferðast frá fríggjakvøld til mánamorgun, við einum steðgi í Keypmannahavn har tey m.a. høvdu tíð til at venja. Nú komu tey so fram til Melbourne tíðliga mánamorgun, sum er sunnukvøld her hjá okkum.

Elvir svimjing til astma ?!?

Ofta verður sagt at svimjing er gott fyri astmatikarar, tí at luftin í høllini er so heit og slavin. Men í SvømmeKlubben SYD hava fleiri elitusvimjarar nú fingið staðfest astma; og orsøkin verður hildin at vera tann vánaliga luftútskiftingin í Svømmecenter Falster. Tit kunnu lesa um hetta á heimasíðuni hjá TV2 ØST, á heimasíðuni hjá Svømmeklubben SYD, og á heimasíðuni hjá Svømmecenter Falster.