2195 luttakarar og 1455 dómarar fara at luttaka úr 173 londum, sum er væl meira enn seinasta ‘highscore’ á 157. Hetta eru fleiri lond enn tey sum luttaka í øllum ítróttargreinum á Olympisku leikum tilsamans. Størstu luttakarlondini eru Kina (109 svimjarar), USA (95), Avstralia (93) og Russland (89). Meira enn 105.000 bilettir eru longu seldar til tiltakið, og útselt varð longu í gjár til finalurnar á vippu.Sí annars melbourne2007.com.au.
Author: rokur
Nólsoyarsvimjingin hesu megin summarferiuna í ár
Gev gætur at tíðindini her eru enn bara leysatíðindi frá fyrireikarunum av; men eg frætti herfyri at tey ætla sær at skipa fyri Nólsoyarsvimjingina áðrenn summarferiuna í ár, sum jú er mikið áhugavert fyri kappsvimjarar. Vanliga hevur nólsoyarsvimjingin jú ligið á Ovasøku, eina til tvær vikur eftir Ólavsøku, tá ið flestu svimjarar hava verið burturi frá svimjingini í minst ein mánaða. Men í ár umhugsa tey at hava tiltakið kanska longu leygardagin 26. mai, sum burdi ligið væl fyri hjá bæði motionistum og kappsvimjarum.
Hetta verður tó ikki endaliga avgjørt fyrr enn einaferð á páskum, tá ið tey sum vara av fara at hava fyrireikandi fund um tiltakið. Altso um hvussu vítt leygardagurin 26. mai skal verða dagurin, ella um tey skjóta tað út til seinni. Tað eru Evald Rasmussen, Erlendur Simonsen og Jákup av Skarði sum eru fremstu fyrireikarar, um onkur er eyka forvitin. Tit kunnu vænta at fyriskipanin verður tann vanliga, at man skal skaffa sær vátdrakt, bát og hjálparfólk sjálvur, og so annars bara melda til og møta upp.
Sjónvarpsskrá fyri HM í Melbourne
Sum tit kunnu síggja undir Les meira her, so havi eg roynt at sjussa saman eina skrá fyri nær Eurosport sendir frá HM. Eitt sindur biksut, við tað at skráin á eurosport.com ikki vísir so langt út í framtíðina enn, og eg tí mátti brúka ta donsku í staðin… sum undarliga nokk ikki altíð vísti somu tíðir (altso út yvir at hon brúkar DK-tíð heldur enn GMT).
Men skráin fyri sjálva HM-stevnuna er jú langt síðani fastløgt, og tí kunnu vit væl ganga út í frá at Eurosport sendir umleið somu tíð, um teir senda ‘live’. So her niðanfyri síggja tit fyrst nær innleiðandi og finalur eru føroyska tíð sambært skránni, og síðani nær Eurosport (sambært eurosport.dk) ætlar sær at senda ‘live’ og endursendingar.
| Sun 25/3 | Mán 26/3 | Týs 27/3 | Mik 28/3 | Hós 29/3 | Frí 30/3 | Ley 31/3 | Sun 1/4 |
| Melbourne: . Innleiðandi 00:00-03:00 . Finalur 10:00-12:00 . |
Melbourne: . Innleiðandi 01:00-03:00 . Finalur 10:00-12:00 . |
Melbourne: . Innleiðandi 01:00-02:00 . Finalur 10:00-12:00 . |
Melbourne: . Innleiðandi 01:00-03:00 . Finalur 10:00-12:00 . |
Melbourne: . Innleiðandi 01:00-03:00 . Finalur 10:00-12:00 . |
Melbourne: . Innleiðandi 01:00-03:00 . Finalur 10:00-12:00 . |
Melbourne: . Innleiðandi 01:00-04:00 . Finalur 10:00-12:00 . |
Melbourne: . Innleiðandi 01:00-03:00 . Finalur 10:00-12:00 . |
| Eurosport: . LIVE 00:00-04:30 . . Eyka 17:00-18:30 . . . . |
Eurosport: . LIVE 01:00-03:00 10:00-12:00 . Eyka 00:15-01:00 17:30-18:00 . . . |
Eurosport: . LIVE 01:00-03:00 10:00-12:00 . Eyka 00:30-01:00 07:30-08:15 15:45-16:30 . . |
Eurosport: . LIVE 01:00-03:00 10:00-12:00 . Eyka 00:00-01:00 07:30-08:15 16:45-18:00 . . |
Eurosport: . LIVE 01:00-03:00 10:00-12:00 . Eyka 00:30-01:00 07:30-08:15 16:45-18:00 23:30-01:00 . |
Eurosport: . LIVE 01:00-03:00 10:00-12:00 . Eyka 07:30-08:15 17:00-18:00 23:30-01:00 . . |
Eurosport: . LIVE 01:00-04:00 10:00-12:00 . Eyka 07:30-08:15 . . . . |
Eurosport: . LIVE 01:00-03:00 10:00-12:00 . Eyka 00:00-01:00 . Mán 2/4 … 13:00-14:30 . |
Spyr meg ikki hvussu Eurosport kann senda ‘live’ til kl 3 um morgunin, tá ið tey halda uppat at svimja kl 2. Møguliga feilur í skránni, sum eg so rætti tá ið tey rætta. Men annars spennandi at Eurosport sendir so nógv ‘live’ frá eisini innleiðandi, tí so sleppa vit kanska at síggja onkran føroying hesar dagarnar 🙂
Um tit vilja vita hvørjar greinar sum verður svomnar teir ymisku dagarnar, so farið á annaðhvørt melbourne2007.com.au, ella takið niður viðfestu offisiellu kappingarskrá.
Stór svimjistevna í Bergen í mai
Bergensvømmerne bjóða til stóra altjóða svimjistevnu í Bergen, dagarnar 4. – 6. mai 2007, sum passar nokk so væl við eina minicruise við Norrønu. Har er bólkabýti niður til árgang 1994, gávukort á 50 – 300 norskar krónur til nummar 1, 2 og 3 í hvørjari grein í hvørjum bólki, umframt 2500 – 10000 norskar krónur til nummar 1, 2 og 3 í FINA stigum.
Kappingin er í einum 25 metra hyli við 7 geilum og el-tíð. Tey hava til stuttleikar skipað allar 50 metra finalur sum ‘útskiljingsløb’, har tey pilka spakuligasta burturúr og so svimja um aftur og um aftur til bara vinnarin er eftir. Tað er fyri so vítt frítt at melda til, um man passar til aldursbólkarnar (87 og eldri, 88-91, 92-94, og handicappaði). Men tey hava ásett eitt mestamark av riðlum til hvønn tein, soleiðis at tað í mesta lagi 300 riðlar á 400 metrum, 6 á 200 metrum, 9 á 100 og 9 á 50. Dugi ikki at siga um hesi mestamørk eru fyri hvønn bólk sær, men tað burdi í øllum førum verið fyri hvørt kynið (altso minst 6 riðlar á 400 tilsamans).
Tey skipa fyri rímiliga bíligum innivisti eisini, har sjálv náttin kostar 100 norskar krónur fyri hvønn, morgunmatur 50 norskar kronur, og frokost og døgverði 80 norskar krónur. Hartil skal roknast eitt gjald á 75 krónur fyri hvønn start hjá einstaklingi, og 150 krónur fyri hvønn start hjá stafettum. Har er forrestin ein kapping millum feløgini eisini, har tey telja upp stig fyri hvørt 1. – 7. pláss, til at finna besta svimjifelag á stevnuni.
Stevnan er frá fríggjadegi kl 17 (upphiting kl 16) til sunnukvøld umleið kl 18:30, og hóskar tí sum sagt rímiliga væl til eina minicruise við Norrønu… um man kann liva við at missa sunnudagin og (í øllum førum) ein part av fríggjadegnum. Norrøna fer nevniliga úr Tórshavn kl 18 hóskvøld og kemur til Bergens kl 17 fríggjadag (sum kappingin byrjar), og siglur so tíverri hinvegin aftur longu sunnumorgunin kl 9. Væl at merkja um eg dugi at lesa álmanakkan hjá Smyril Line rætt.
4. – 6. mai er vikuskiftið eftir FM 27. – 29. apríl, og 3 vikur áðrenn UM.
Innbjóðingin er viðfest her niðanfyri.
Inge de Bruijn er givin
Tað kemur kanska ikki bak uppá nakran, nú hon hevur ikki luttikið á nakrari altjóða stevnu seinastu trý árini, síðani OL í Athen í 2004. Men nú er tað so offisielt. Inge de Bruijn vann gull í 50 frí á olympisku leikum í 2000 og 2004, umframt í 100 frí og 100 firvald í 2000. Hon hevur eisini sett heimsmet í 50 frí, umframt verið heimsmeistari og europameistari (sí wikipedia).
Fer Phelps at taka 8 gull ?
Eingin svimjari hevur nakrantíð vunnið 8 gullheiðursmerki á heimsmeistarastevnu, men Michael Phelps úr USA er eitt gott boð at gera tað hesu ferð. Hann skal luttaka í 5 einstaklingakappingum, harav hann eigur heimsmetið í 200 og 400 blandað, í 200 firvald, er næstskjótasti nakrantíð í 100 firvald, og forsvarandi heimsmeistari í 200 frí. Og ferðin burdi verið har, við tað at hann setti heimsmetið í 200 firvald so seint sum 17. februar í ár.
5 einstaklingakappingar eru sjálvsagt ikki nóg mikið til at vinna 8 gull. Men serfrøðingarnir vænta at hann skal luttaka í teimum trimum stafettunum eisini (4 x 100 frí, 4 x 100 blandað og 4 x 200 frí), um ikki onkur annar verður valdur í staðin fyri hann.
Amerikanar eru absolutt kvalifiseraðir til at taka gullheiðursmerki (og heimsmet) í serliga blandað stafettini, við tað at aktivir svimjarar hjá teimum eiga heimsmetini í bringu, rygg og firvald, umframt teir óivað eiga góðar crawlsvimjarar eisini.
Men trupulleikin hjá Phelps er akkurát hesin, at ‘hin’ firvaldasvimjarin, Ian Crocker, heimsmethaldari í 100 firvald, eisini er amerikani. Phelps jagstraði eisini heimsmet í heiðursmerkjum í Olympisku leikunum í Athen, men ‘gav’ tá firvaldaplássið til Ian Crocker, av tí at Phelps vísti seg ikki at vera heilt í stoytinum, meðan Crocker var flúgvandi. Og teir settu heimsmet og alt hatta har.
Viðvíkjandi kapping í einstaklinakappingunum, so er Phelps fullstendiga einaráðandi í 200 firvald, meðan hann kann fáa kapping frá t.d. Laszlo Cseh úr Ungarn í blandað, og frá t.d. Pieter van der Hoogenband og Grant Hackett í 200 frí. Ein lætti má tað tó vera, at heimsmethaldarin í 200 frí, Ian Thorpe, er givin, og Phelps tí er tann av hesum sum hevur svomið teinin skjótast.
Av øðrum ‘metum í heiðursmerkjum’ kann nevnast, at Grant Hackett hevur møguleika at seta met í flest heimsmeistaraheiti í somu grein á rað, við at hann til nú hevur vunnið 1500 frí gullheiðursmerki rað. Hann og Hoogenband fara eisini eftir hvørjum sínum meti á OL næsta ár, tá ið báðir kunnu gerast fyrsti maður sum vinnur OL-gull í somu grein 3 ferðir á rað, Hackett í 1500 frí og Hoogenband í 100 frí.
Stevna í Havn 16. – 18. mars 2007
HS og Norðoyar Sparikassi bjóða til svimjistevnu í Havn, komandi vikuskiftið 16. til 18. mars 2007, fyri bólk 3 og eldri. Kappingin byrjar við upphiting fríggjakvøldið kl 19:30, og endar so aftur sunnumorgunin áðrenn kirkjutíð. Tilmeldingarnar skulu vera inni mikukvøldið 14. mars kl 21:00. Innbjóðing og tilmeldingarfíla eru viðfest her niðanfyri.
Danir vænta sær IKKI heiðursmerki í Melbourne
Mette Jacobsen er givin, og Louise Ørnstedt er nýliga byrjað aftur eftir at hava hildið pausu rættiliga eingi. So danir halda seg til varliga at vænta sær eini 3-4 finalupláss, persónligar betringar, og kanska onkra OL kvalifikatión eisini. Sí grein í Ekstrablaðnum og heimasíðuna hjá danska svimjisambandinum.
Hygg ein røð av svimjivideoum á Dagbladet.no og NSF
Norska svimjisambandið og avísin Dagbladet hava gjørt eina áhugaverda røð av teknikk-videoum saman, sum kunnu síggjast fyri einki á svomming.no og dagbladet.no. Talan er tó um nokk so grundleggjandi øvilsi, sum tey flestu av okkum hava roynt, um vit yvirhøvur hava verið í nærheitini av einum svimjifelag. Men góðskan er góð, svimjararnir tveir bestu í Noregi, og tað er jú heldur ikki so galið at vita at man ger tað hampuliga rætt 🙂
Alt er so mikið opið hjá teimum, at eg faktiskt fái lagt tað her á heimasíðuna. So her er fyrsti partur í røðini …
Gev gætur at myndin er her rættiliga nógv minni enn tann sum verður víst á dagbladet.no, men líka stór sum tann á svomming.no. Tey hava gjørt 9 partar inntil nú, og ætla sær at leggja sær ein part út afturat hvønn sunnudag, fram til 1. apríl, so at teir verða 13 tilsamans.
Hetta er liður í einum motiónstiltaki kallað “Svøm deg til Island“, sum norska svimjisambandið skipar fyri á hvørjum ári, til at fáa fleiri fólk at svimja. Øll áhugað kunnu fáa eitt kort í svimjihallunum runt landið, har tey síðani fáa skrásett hvussu ofta tey svimja, í so og so nógva tíð. Aftaná er lutakast millum tey luttakandi, har børnini kunnu vinna ein túr til okkurt ‘vandland’ í Noregi, og tey vaksnu ein túr til Íslands (pheew, so skuldu tey ikki svimja haryvir allíkavæl).
Partarnir eru upplistaðir á hasari fyrrnevnu síðuni á svomming.no. Men við tað at myndin sum sagt er eitt sindur størri á dagbladet.no, og valmyndarskipani har tíverri syndarlig, so havi eg leitað tær fram og listi tær upp her niðanfyri:
- “Basisøvelser“
- “Brystbensparket“
- “Bryst – armtakets første del“
- “Bryst – armtakes siste del“
- “Brystsvømning i hele teknikken“
- “Vending i brystsvømning“
- “Crawl – rotasjoner og pusting“
- “Crawl – bensparket“
- “Crawl – armtaket“
- “Saltovending“
- “Ryggsvømming – grundprinsipper“
- “Ryggsvømming – armtaket“
- “Gratis treningstips fra Norges beste svømmere!“
Hackett metir at minst 6-7 fara undir 15 í 1500 frí
Verandi heimsmethaldari og OL gullvinnari á 1500 frí, Grant Hackett, metir at teir 1500 í Melbourne verða "the most competitive in history". Hann metir ikki at heimsmetið er í vanda, men at teir verða nakrir sum fara undir 14:40, og einir 6 ella 7 sum fara undir 15 minuttir.
Atvoldin til at hann sigur so, er at amerikanski 1500 metra svimjarin Larsen Jensen eitt sindur nasadjarvt hevur sagt, at Grant Hackett bara kemur við umskyldningum, um at hann (Hackett) ikki er í so góðum formi sum vanligt. Hackett skifti venjara fyri einum mánaða síðani, og hevur sambært sær sjálvum undirmett hvussu tað fór at ávirka formin.
So Hackett metir altso ikki at hann kann taka metið sjálvur, og spurningurin er tí hvussu góðir hinir eru. Viðvíkjandi Larsen Jensen er hann (Hackett) tó nokk so bersøgdur: "I hope he competes as well as he talks".
Upprunalig tíðindi á heimasíðuni hjá heimsmeistarastevnuni
Myndin er fingin av Flickr kontoini hjá ‘vanou’, og vísir frá vinstru Larsen Jensen (USA), Yuri Prilukov (RUS) og Grant Hackett (AUS), eftir 1500 frí finaluna á síðstu heimsmeistarastevnu í Montreal (Kanada) í 2005. Hackett vann gull, Jensen silvur, David Davies (GBR) bronsa, og Prilukov varð nr. 4 (almennur úrslitalisti sum pdf-fíla).