Metnógvir føroyingar til Køge Open í ár

Frætti sum slatur í gjár at vit væntandi skulu við tveimum flúgvarum til Køge Open í ár, av tí at vit ikki passa í eitt. Flogførini hjá Atlantic taka upp í 96 fólk, so tað má merkja at vit vera í øllum førum um 100 fólk í Køge í oktober 🙂

Køge Open er árlig altjóða svimjistevna hjá Køge Svømmeklub, sum føroysk svimjifeløg hava luttikið á í fleiri ár eftirhondini. Í ár fara í øllum førum fýra svimjifeløg – tak meg ikki í tí, men eg meini tey eru FLOT, Fuglafjarðar Svimjifelag, Reki og Ægir.

Føroyingar hava klárað seg rættiliga væl á stevnuni, serliga í kraft av Elspu Mørkøre sum eigur heili 10 av teimum 17 metunum hjá gentum í ‘gruppe 2’. Føroyingar gjørdust nr 2 í kappingini í fjør, tá ið øll stig vórðu samanløgd, umframt at Elspa stendur upplistað fyri besta bragd hjá juniorgentum (747 stig í 200 frí).

Louise Ørnstedt givin

22 ára gamla Louise Ørnstedt boðar nú sambært Ekstrablaðnum frá, at hon nú gevst heilt við svimjingini. Hon helt eina longri pausu í fjør, men kom so aftur og royndi at venja í 4 mánaðir, áðrenn hon nú endaliga staðfestir at motivatiónin ikki er har longur. Ørnstedt hevur vunnið silvur á HM, verið í trimum finalum á OL, og eigur hartil eina rúgvu av donskum og norðurlendskum metum.

Innbjóðing til Metstevnuna 2007

Árliga metstevnan verður í Tórshavn 25.-26. august, har svimjarar fáa ein síðsta kjans at seta met í nú skjótt farna svimjiárinum 2006/2007, áðrenn vit skifta svimjiár tann 1. september. Hetta hevur týdning hjá serliga bólkasvimjarum, við tað at teir eldru av teimum skifta bólk tá ið svimjiárið skiftir.

Tvøroyrar Svimjifelag hevur lagt út hesa skrá á heimasíðu síni tsvim.com, sum eg tí loyvi mær at endurgeva her.

Leygarmorgun: Upphiting kl 8.00, kapping kl 9.00

  • Kapping:1   400 metur  blandað gentur
  • Kapping:2   200 metur bringa dreingir
  • Kapping:3   100 metur rygg gentur
  • Kapping:4   100 metur firvald dreingir
  • Kapping:5   200 metur frí gentur
  • Kapping:6   50 metur rygg dreingir
  • Kapping:7   50 metur firvald gentur
  • Kapping:8   400 metur frí dreingir
  • Kapping:9   200 metur bringa gentur
  • Kapping:10  200 metur blandað dreingir
  • Kapping:11  4×100 metur blandað gentur
  • Kapping:12  4×100 metur frí dreingir                                

Leygardag: Upphiting kl 15.00,  kapping kl 16.00

  • Kapping:13  200 metur rygg dreingir
  • Kapping:14  100 metur blandað gentur
  • Kapping:15  50 metur bringa dreingir
  • Kapping:16  100 metur firvald gentur
  • Kapping:17  100 metur frí dreingir
  • Kapping:18  50 metur rygg gentur
  • Kapping:19  200 metur firvald dreingir
  • Kapping:20  400 metur frí gentur
  • Kapping:21  100 metur blandað dreingir
  • Kapping:22  100 metur bringa gentur
  • Kapping:23  4×50 metur blandað dreingir
  • Kapping:24  4×50 metur frí gentur

Sunnumorgun: Upphiting kl 8.00,  kapping kl 9.00

  • Kapping:25  800 metur frí gentur
  • Kapping:26  1500 metur frí dreingir
  • Kapping:27  50 metur frí gentur
  • Kapping:28  100 metur bringa dreingir
  • Kapping:29  200 metur rygg gentur
  • Kapping:30  100 metur rygg dreingir
  • Kapping:31  4×200 metur frí gentur
  • Kapping:32  4×200 metur frí dreingir                                 

Sunnudag: Upphiting kl 14.00,  kapping kl 15.00

  • Kapping:33  200 metur frí dreingir
  • Kapping:34  200 metur firvald gentur
  • Kapping:35  50 metur firvald dreingir
  • Kapping:36  100 metur frí gentur
  • Kapping:36  100 metur frí gentur
  • Kapping:37  4×100 metur blandað dreingir
  • Kapping:38  4×100 metur frí gentur
  • Kapping:39  200 metur blandað gentur
  • Kapping:40  400 metur blandað dreingir
  • Kapping:41  50 metur bringa gentur
  • Kapping:42  50 metur frí dreingir
  • Kapping:43  4×50 metur blandað gentur                               

Tilmeldingarnar skulu sendast til lssa[kurla]post.olivant.fo mikudagin 23. august kl 21.

Splitt-tíðir og annað frá EJM 2007

Til allar áhugaðar svimjinørdar, so kunnu splitt-tíðir, frekvensur og tílíkt hjá Elspu Mørkøre síggjast og samanberast við úrslitini hjá hinum gentunum í semifinalu og finalu á EJM 2007, við at fara her og velja at síggja spjaldrasíðuna “WBAC50F”. Vit síggja at Elspa hevur næstbestu armtakslongd av øllum, men hinvegin ikki heilt frekvensin hjá teimum skjótastu.

Vinnarin C. Zenner hevur ein meðalfrekvens á 51 armcyklur/min yvir teir 50 metrar rygg, og harvið eina meðal armtakslongd á 1,95 metrar, meðan nr 2 hevur ávíkavist 47 og 2 metrar, nr 3 hevur 56 og 1,71 metrar, og ein til samanberingar innskotin heimsstøðissvimjari hevur 56 og 1,76 metrar. Elspa hevur so aftur til samanberingar 44 í frekvens og 2,09 metrar lang tøk, sum alt annað líka merkir at hon hevur ein teknikk á heimsstøði (við tað at hon kann svimja so langt í hvørjum armtaki), men ikki heilt krefturnar til at fáa armarnar so skjótt runt. Ella møguliga hugsar eitt vet ov nógv um armtakslongd, so at frekvensurin fellur eitt sindur ov nógv.

Men bíða nú, nr 5 hevði enn longri armtøk sum Elspa (2,1 metur), og næstan líka so spakuligan frekvens (45), so sum ikki einaferð er alt individuelt. Tað er ikki fyrr enn vit síggja Elspu tvær ferðir í slíkum kappingaranalysum, at vit veruliga kunnu byrja at samanbera.

Tíverri finnast splitt-tíðirnar bara hjá Elspu í 50 rygg, og ongar hjá hinum annars góðu EJM-luttakarunum hjá okkum, av tí at Rejn Haljand bara leggur analysurnar hjá semifinalu- og finalu-luttakarum út á heimasíðu síni.

Um Nólsoyarsvimjingina 2007

Sum tit óivað hava hoyrt í útvarpinum ella lisið her á sport.fo, so skipaðu nólsoyingar fyri 10. ferð á rað fyri svimjing um Nólsoyarfjørð, á Ovastevnu seinasta leygardag. Tvs. tey svumu ikki um Nólsoyarfjørð hesu ferð, men ‘bara’ 1500 metrar fram við Nólsoyarlandinum, av tí at mjørkin var so nógvur.

Continue reading Um Nólsoyarsvimjingina 2007

Ægir nú tveir høvuðsstuðlar

Tíðindaskriv frá Svimjifelagnum ÆGIR

 ÆGIR hevur tann 14 august,  fingið enn ein høvuðssponsor afturat felagnum, og er tað S.J.H. COMMERCIAL DIVERS.

Frammanundan hevur ÆGIR Norðoya Sparikassa sum høvuðsstuðul, og hevur N.S. verið tað í nógv árð.

 Avtalan fevnur fyri restina av hesum árið og árini 2008-2009

Hetta fer at hava ein sera tíðandi leiklut í menningini av felaginum, hvørs endamál er at gerast størsta og mest vinnandi felag í landinum.

Svimjingin er nú farin í gongd av álvara fyri kappsvimjararnar, og byrjar svimjiskúlin og svimjingin fyri børn 3. september.

ÆGIR

Aqua Clinic er ikki bara fyri venjarar

Danska svimjisambandið skipar hvørt ár fyri eini ráðstevnu um svimjing, sum serliga elituvenjararnir hava tikið til sín. Har eru áhugaverdir fyrilestrar, framvísingar í hyli og høll, gott kjak, umframt at luttakararnir dúgliga ‘networka’ í pausunum. Men leiðararnir eru eitt sindur trekari at fáa við, og svimjisambandsformaðurin Kaj Aagard rópar tí varskó í bloggi sínum á svoem.dk.

Aagaard skrivar at hesar ráðstevnur eru neyðugar um donsk svimjing skal upp ‘í næsta gear’, tí at tað er her man heintar fakliga vitan, inspiratión og góð hugskot. Umframt at ráðstevnan er eitt gott høvi at skapa netverk til onnur svimjifeløg. Hann biður tí feløgini um at stuðla upp undir ráðstevnuna, við at luttaka eisini við leiðarum.

Nú havi eg persónliga ongantíð luttikið á leiðarapartinum, men kann sum venjari bara skriva undir uppá at venjaraparturin av ráðstevnuni í øllum førum livir upp til hasi lyftini. Inspiratiónin fer upp, tú fært altíð okkurt gott hugskot heim við tær aftur, og ‘netverkini’ vísa seg ofta at geva úrslit eisini leingi eftir ráðstevnuna, tá ið tú møtir hesum somu fólkum á stevnum í Danmark og aðra staðni.

Høvuðssíðan hjá Aqua Clinic er her á svoem.dk.

Jodie Henry ill inn á stranga dopingeftirlitið í Avstraliu

Olympiski meistarin í 100 frí orðar seg heldur løgið, tá ið hon ilskast inn á dopingeftirlitið í Avstraliu. Sambært SwimNews her so er hon nevniliga bangin fyri at Avstralia fer at hava tað hart á OL í Beijing 2008, av tí at onnur lond ikki hava líka strangt eftirlit. Ljóðar næstan sum hon kundi hugsað sær at dopað seg.

Nú kann tað væl vera at SwimNews leggur henni orð í munnin, spekulerar ov nógv ella útstillar hana ørvísi enn hon hevði ætlað. Men um vit hyggja at sitatum og orðaljóði í hasari greinini, so sær tað altso út sum um at Henry er meira ill inná at aðrar tjóðir hava lættari við at dopa seg, enn um tað at skula testast so ofta.

“Before the 2003 world champs over here, we had the girls watch us do our sample. In Barcelona, they just sent us into a room and we did our sample and came out. They wouldn’t watch us at all.” .. “That sort of stuff annoys you because you’d want to hope that athletes overseas are doing the same things as us”

Hesi sitat eru forrestin tikin beinleiðis úr eina samrøðu sum Jodie Henry hevði við The Sunday Telegraph, og sum tit kunnu lesa her. Tíverri nevna tosa tey ikki so nógv meira um hetta við dopingroyndunum har. So vit mugu bara gita um hon bara er stressað av øllum testunum, ella (vónandi) irriterað inn á at onnur sleppa at dopa seg, ella (puha) øvundsjúk inn á at onnur sleppa at dopa seg.

Veruliga úrslitini frá triathlon á Rhodos

DSC_0397So komu tey allíkavæl fram, tey offisiellu úrslitini frá Rhodos. Ella tað vil siga, eg haldi at hetta eru tey røttu, hóast tey ikki koma frá fyriskiparunum á Rhodos. Evald hevur nevniliga fingið tey frá triathletinum Torquil á Orkney, men tey síggja altso nóg nágreinilig út, til at talan kann vera um tær offisiellu elektronisku tíðtakingarnar.

Viðfest er skjalið sum Torquil sendi Evaldi, men annars taki eg skjótt saman um her niðanfyri. Um eg samanberi við splitt-tíðirnar sum Evald tók, so sær tað út til at hesi offisiellu úrslitini rokna skiftið frá svimjing til súkkling uppí svimjingina (har Evald tók tíð til tey komu upp úr havinum, altso áðrenn tey fóru at skifta), og skiftið frá súkkling til renning uppí súkklingina.

  1500m svimjing 40 km súkkling 10 km renning Samlað úrslit
Gudmundur 0.23.16 1.13.08 0.37.13 2.13.37
Andrass 0.28.02 1.10.12 0.37.38 2.15.52
Áslakur 0.31.36 1.08.47 0.37.22 2.17.45
Ottar 0.24.49 1.13.18 0.42.07 2.20.14
Karina 0.25.48 1.15.52 0.37.22 2.19.02
Súsanna 0.25.47 1.15.15 0.38.20 2.19.22
Joan 0.29.21 1.17.30 0.34.40 2.21.31

Legg forrestin til merkis rennitíðina hjá Joan nú… 10 km undir 35 minuttir 🙂