UM og Nólsoyarsvimjing í vikuskiftinum

Tað hevur verið ógvuliga lítið at frætta um svimjing seinastu vikurnar, men nú brennur so á aftur. Árliga unglingameistarastevnan verður í Vági fríggjakvøld og leygardag, umframt at fólk leypa á bláman við húsini hjá radioamatørunum í Havn kl 12:00 leygardagin, at svimja til Nólsoyar.

Eg havi ikki sæð nakra innbjóðing til UM enn, men tit kunnu lesa um tiltakið til Nólsoyar her á hesari heimasíðu, umframt á www.triathlon.fo. Fólk kunnu melda til her á triathlon.fo, og annars síggja hvørji sum longu eru tilmeldaði her. Inntil víðari eru yvirhøvur triathletar, men vónandi leggjast fleiri afturat komandi dagarnar.

Minnist til at melda til DÅM

Eg veit ikki hvat og hvussu, men freistin at melda til Danske ÅrgangsMesterskaber er altso í dag, 21. mai. Talan er um tilmelding til danska svimjisambandið, so her nyttar nokk einki at umbera seg við ‘føroyskari præcisheit’ ella líknandi. Sí annars ssf.fo og gomul tíðindi her á heimasíðuni, umframt meistaraskapsyvirlit hjá dønum her á svoem.dk.

Eru fronsku dopingmyndugleikarnir bara eftir amerikumonnum?

SwimmingWorldMagazine leggur eftir WADA og fronsku rannsóknarstovuna LDNN í greinini her, har tey longu í innganginum kalla LDNN fyri korrupta, og WADA og LDNN fyri eina hóttan móti svimjing og ítrótti yvirhøvur.

LDNN var uppíblandað tá ið amerikanski súkklarin Lance Armstrong fyri nøkrum árum síðani varð lagdur undir at hava dopað seg, umframt nú tá ið Ian Thorpe eisini fekk ákærur frá fjølmiðlunum av. Í báðum førum lóku tíðindini á onkran hátt út frá rannsóknarstovuni, til fronsku avísina L’Equipe, áðrenn tað egentliga var nakað hald í málinum.

Nú eru tey so uppí kanningini av Floyd Landis, sum vann Tour de France í fjør, men sum hareftir varð knallaður fyri doping. SwimmingWorld leggur tí ikki fingrarnar ímillum, men ákærir beinleiðis fronsku myndugleikarnar fyri at vera eftir amerikumonnum:

With Americans winning the Tour de France seven out of the last seven years, and 10 out of the last 19 years, combined with the LNDD still smarting from the independent report, the French now had another American winner on its hands, this time named Floyd Landis in 2006. Perhaps that was too much to take for French national pride

…

Unfortunately, no American now should ever expect to get a fair hearing from the French anti-doping officials. They “KNOW” the Americans are guilty. The French sport media mentality has no room for comebacks, over coming cancer and superstar athletes. “They must be cheating. They’re too good.”

…

Ten years of Americans winning the Tour de France, (their Tour) was too much to tolerate combined with the U.S. going it alone into Iraq. It’s “all the same thing.”

Vit fáa at síggja hvat hald er í pástandunum hjá SwimmingWorld, nú sakarmálið móti Floyd Landis av álvara byrjar. Tey hava so í øllum førum tikið partí við amerikumanninum, hóast bæði A og B prøvin frá rannsóknarstovuni vístu misnýtslu av syntetiskum, mannligum kynshormonum.

So er klárt at fara til DÅM

Sum tit síggja her á ssf.fo, so hevur svimjisambandið nú fingið formliga loyvið frá danska svimjisambandinum, um at føroyskir svimjarar kunnu luttaka á ‘Danske ÅrgangsMesterskaber 2007’. Tó bara ‘uttan fyri kapping’, og við í mesta lagi 2 svimjarum í besta riðli.

Tilmeldingarfreistin er 21. mai, og sjálv meistarastevnan vikuskiftið 15.-17. juni 2007. Vit hoyra óivað meira um hvussu SSF fyriskipar ferðina og so framvegis, so hvørt sum hon nærkast.

Lucas loysir frá posabandinum

Tann nú fyrrverandi venjarin hjá fronsku svimjistjørnuni Laure Manaudou, Phillipe Lucas, tosar nú veruliga út, í samrøðu við avísina L’Equipe. SwimNews hevur ein samandrátt við viðmerkingum her, sum tit burdu lisið, men eg kann kanska eisini stutt nevna tað mest saftiga, her í tí fylgjandi:

Hann stúrir nú fyri ‘mentalu vælveruna’ hjá Manaudou, nú hon er farin til Italia. Hann ræðist læknarnar í Torino, og ‘gamla medisinið úr Juventus’, og meinar við tí at Manaudou er móttakilig fyri at byrja at dopa seg, nú hon er flutt til Italia.

Hann flennir at teimum nógvu serfrøðingunum í nýggja felagnum hjá Manaudou (4 venjarar, 1 biomekaniskur serfrøðingur, 2 landvenjarar og ein lækni), og sigur at Canet (felagið hjá Lucas og til nú Manaudou) má hava gjørt kuppið, tí har er bara hann, Lucas.

Hon hevur sagt seg vilja broyta teknikkin, men Lucas sigur at tað fer bara at gera hana verri. Hann væntar trupulleikar tí at hon er ‘kompromisleys’, ‘intens’ og ‘kompleks’. Hann heldur at hon er farin fyri pengarnar, og grundar tað við at hann sjálvur varð bjóðaður at fara hartil longu í oktober.

Nú fer hann at finna svimjarar sum kunnu vinna á henni í Beijing 2008. ‘Eg eri einasti persónur í heiminum sum veit hvussu man vinnur á Manaudou, hvussu man destabiliserar hana’.

Og har er eingin vegur aftur. Manaudou hevur ikki ein gang takkað hann fyri stríðið til nú (“She’s like that. She doesn’t even say good morning … how do you want her to say thank you?”), og konan hjá honum vil ikki longur vita av henni. Tey hava havt hana nærmast sum familjulim, hon er gumma at soni Lucas, men nú sigur konan at hon bara sleppur at síggja børnini á myndum.

Og hartil hevur hon longu mist 5 vikur av venjingini. Hon hevur spilt sær svimjiárið nú, og Lucas ivast tí í um hon fer at kunna svimja nóg skjótt longu næsta ár, og Lucas vil tí ikki vil risikera at taka hana aftur. ‘Ikki aftaná alt tað sum hon hevur sagt’.

Lesið á http://www.swimnews.com/News/displayStory.jhtml?id=5283

SSF gjørt langtíðarætlan fyri sínar uttanlanda stevnur

Svimjisamband Føroya hevur lagt út eina áhugaverda ætlan her, um hvørjar altjóða stevnur tey ætla at føroyskir svimjarar skulu luttaka í, fram til ár 2012. Oyggjaleikir eru lukkutíð enn á skránni, umframt ein rúgva av øðrum spennandi kappingum, so sum EJM, HM, EM og NUM.
Continue reading SSF gjørt langtíðarætlan fyri sínar uttanlanda stevnur

Aðalfundur hjá ÍSF í annaðkvøld

Svimjisambandið hevur sent niðanfyri standandi skriv til øll svimjifeløg:

“Hey tit øll !

Sum tit hava fingið at vita, so eru tvey evni stillaði upp til skrivara í starvsnevnd ÍSF’s – Katrin Joensen, sum Svimjisambandið stillar upp, og John Kjær, sitandi skrivari, sum er í afturvali.

Hvat Katrin viðvíkur, vita vit, at hon hevur gjørt eitt megnar arbeiði í Svimjisambandinum og í Oyggjaleikanevndini, umframt at hon var við til at skriva Ítróttarálitið.

Eisini er tað fyrstu ferð ein kvinna hevur bjóðað seg fram til starvsnevndina og haldi eg, at vit eiga at vísa henni álit og stuðla henni.

Eg vil gjarna heita á øll svimjifeløg um at møta til aðalfundin fríggjakvøldið á Hotel Hafnia og stuðla Katrin !

Vinarliga

Palli Ziskason, Form.” Continue reading Aðalfundur hjá ÍSF í annaðkvøld

Manaudou velur kærleikan fram um svimjing

Ok, nú hava tey slatrað glamour-aktigt í skjótt eina viku, og eg má tí heldur skriva okkurt um tað her eisini. Franska svimjistjørnan Laure Manaudou hevur valt at gevast við venjingini í Fraklandi, fyri heldur at búgva í Italiu og royna at fáa børn saman við sjeiki sínum. Hon roynir at finna eitt felag har at venja við, men tað er løgið nokk torført, hóast hon jú er heimsmeistari í 200 og 400 frí.

Leygardagin tráspurdu franskir fjølmiðlar Manoudou, í sambandi við at hon var farin at vitja sjeikin hjá sær í Italia. Hon segði tá at hon ikki ætlaði sær at flyta til Italiu, men longu mánadag væntaðu fjølmiðlar at fáa eina fráboðan um at hon fór at flyta. Stóri spurningurin var sjálvsagt eisini um hon fór at droppa venjaran Philippe Lucas, sum hon annars hevur vant hjá í nógv ár.

Týsdag fortelur hon so alment at hon gevst við venjingini í Frankaríki, fyri at búgva hjá sínum stóra kærleika Luca Marin, sum hon ætlar sær at fáa barn við. Og at hon nú leitar eftir einum nýggjum venjara í Italia. Sjeikurin svimur eisini á høgum støði, men venjarin har vil ikki røra Manaudou, fyri ikki at gerast óklárur við franska svimjisambandið. Í øllum førum ikki uttan so at hon skiftur nationalitet til Italia (sum um at tað skuldi gjørt franskmenn glaðari).

Tað nýggjasta er so at hon í dag flýgur aftur til Fraklands, í privatflogfari saman við sakførara sínum, fyri at fara at tosa við sín gamla venjara og umboð úr svimjifelagnum í Canet. Ein pressukonferensa verður so aftaná.

Nólsoyarsvimjingin 2007

Sum tit kunnu lesa í viðfestu innbjóðing, so verður árliga stuðulssvimjingin til Nólsoyar tann 26. mai kl 12:00, til frama fyri svimjihyli í Nólsoy. Í ár royna tey sum nakað heilt nýtt at hava bæði klassiska teinin á umleið 4000 metrar úr Havn til Nólsoyar, og at skipa fyri einum stytri teini á 1000 metrar, frá einum báti uttanfyri bygdina og inn til Nólsoyar.

Í innbjóðingini stendur alt tað praktiska um nær tilmeldingin skal vera inni, og um hvussu tiltakið annars gongur fyri seg. Luttakarar mugu skaffa sær vátdrakt, eitt seksmannafar ella størri við VHF og minst tveimum vaksnum persónum umborð, og annars vera í hampuligari venjing. Eitt luttakaragjald á 250 er ásett, og tilmelding fer fram á triathlon.fo.