Altjóða svimjisambandið FINA avgreiddi í gjár og fyrradagin tríggjar aðalfundir her í Barcelona, fyrst í svimjiteknisku nevndini og masters-nevndini, og síðani sjálvan aðalfundin. Áhugaverdar avgerðir vóru millum annað at tey ikki fara at loyva firvaldaspørkum út á 15m í bringusvimjing, sum tekniska svimjinevndin hjá FINA annars ætlaði, og at tey nú fara at innføra eina stong til ryggsvimjarar at seta føturnar á og av frá í startinum.
Tekniska svimjinevndin og danska svimjisambandið royndi so saman við stuðli frá Írlandi, Avstralia, USA, Svøríki og øðrum á sjálvum aðalfundinum at fáa innført døming út í frá undirvatnskamera, til at minka um serliga trupulleikan við ólógligum firvaldaspørkum í bringusvimjing; men tað uppskotið fall á teprari atkvøðugreiðslu.
Sum tit síggja á myndini, so hevði Jon Hestoy eisini orðið, hetta til at tryggja at nevnda stong í ryggsvimjing ikki endar sum við fótkílanum á startskamlum, at bara éin fyritøka hevur loyvi at framleiða teir, vegna patent. Svarið var at tað fór tað ikki at verða, so vit vóna tað besta. Trupulleikin við monopoli er sjálvsagt, at so kann framleiðarin seta prísin næstan sum hann vil.
