Birita Debes luttók fyri løtu síðani í 50 metra ryggsvimjing á HM í Barcelona, og megnaði hon har at svimja seg til eitt 40. pláss av 51 luttakandi, við tíðini 30.57. Hetta er fjórbesta tíð sum hon (ella nøkur onnur føroysk kvinna) nakrantíð hevur svomið, har føroyska metið hjá henni er 30.12 frá Danish Open í mars mánaða. Sí úrslitalistan her.
Birita Debes luttekur her í 100 metra ryggsvimjing á HM á langgeil í Barcelona. Hon er í svartari hettu á geil 0, allarnærmast okkum. Tíðin 1:05.64 er nýtt føroyskt met.
Birita Debes setti í morgun eitt flott nýtt føroyskt met í 100 metra ryggsvimjing, tá ið hon á heimsmeistarstevnuni í Barcelona svam teinin uppá 1:05.64, har hennara føroyska met frá Danish Open í mars mánaða var 1:06.19. Tíðin var nóg góð til at hon bleiv nr 40 av 50, sí úrslitalistan her.
Her er Birita akkurát komin upp til okkum aftaná teir 100. Eg burdi kanska líka hava givið henni eina løtu til at summa seg áðrenn upptøku, men tað er so tað.
Bara eitt lítið brot frá fyrstu venjing hjá okkum í Palau Sant Jordi kappingarhylinum her í Barcelona. Birita trenar ‘yvirfart’, har Kristian Martin hálar hana fram.
HS-stevnan byrjaði í morgun eftir ætlan, og riðlarnir blivu avgreiddir skjótt sum teir plaga. Men tá kapping 3, ið var 200 bringusvimjing hjá kvinnum, byrjaði, hoyrdist “Taki støðu” hjá startdómarinum illa í hátalarinum. Tveir svimjarir stóðu eftir á skamlunum, tá startskotið ljóðaði. Riðilin bleiv løtu seinni steðgaður.
Av úrslitum í morgun kann nevnast, at Birita Debes úr Ægir vann 50 rygg við tíðini 29.02, har metið hjá henni er 28.51. Alvi Hjelm (Ægir) vann 50 rygg og 100 blandað hjá monnum við ávikavist 29.11 og 1:02.71. Annika S. Olsen (HS) vann 200 bringu hjá kvinnum við tíðini 2:54.35. Poula Ø. Mohr (HS) vann 50 firvald og 100 blandað við ávikavist 28.74 og 1:05.46. Marius Ihlen Gardshodn (HS) vann 50 firvald og 400 frí hjá monnum við ávikavist 28.62 og 4:25.62. Victoria Wigant Eysturdal (Ægir) vann 400 frí hjá kvinnum við tíðini 4:36.66.
Kappingin byrjar aftur kl 16.30 17.30 nú seinnapartin. Allir riðlarnir í morgun uttan tann fyrsti (50 rygg hjá kvinnum, riðil 1) verða í løtuni lagdir á Youtube, og síggjast seinni á svimjing.com.
So er endaúrslitið alment, Sigma vann bestu deildina í “Danmarks Mesterskaber for hold 2013”, í tøttum dysti ímóti Aalborg og Esbjerg. “Sigma Swim 1” fekk tilsamans 52776 stig, “Aalborg 1” 52559 og “Esbjerg 1” 52232 stig, meðan “VAT CPH 1” við einum sættaplássi akkurát helt seg yvir niðurflytingarstrikuni við 45094 stigum. Birita, Alvi og Frans fingu sostatt eitt bronsuheiðursmerki fyri stríðið, meðan Pál kann ergra seg um at hann allarhelst hevði gjørt munin til at Aalborg varð danmarksmeistari, og Magnus nokk í liðhøpi mest má gleða seg um ikki at flyta niður. Sí samlaðu støðuna her.
Birita Debes var fyrsti svimjari hjá Esbjerg, tá ið tey á “Danske Mesterskaber for Hold 2013” endaðu við 4×100 frí. Tíðin 58.11 er mær vitandi hennara besta tíð yvirhøvur, har besta tíð hjá henni áðrenn hetta var 58.20 frá Ægir-stevnu í november. Stafettin hjá Esbjerg gjørdist nummar 3, aftanfyri Sigma og Aalborg.
Frans Johannesen svam skjótastu fyrstu 100 hjá monnum, tá ið hann í 4×100 frí svam fyrsta strekkið uppá 49.66, fyri Esbjerg sum eisini vann ta stafettina. Magnus Jákupsson var fyrsti svimjari hjá VAT, og megnaði hann har at svimja fyrsta strekkið uppá 50.65 sekund. VAT varð nr 7, Esbjerg nr 1, Sigma nr 2 og Aalborg nr 3.
Birita Debes luttók nú seinnapartin í 50 metra frísvimjing á “Danske Mesterskaber for Hold 2013”, og varð hon har nummar 8 av teimum 18 luttakandi við tíðini 26.63. Besta tíð hjá Biritu er 26.46 frá Ægir-stevnu í Klaksvík 2012, meðan Guðrun Mortensen eigur føroyska metið á 26.04. Sí úrslitalistan her.
Birita Debes luttók í morgun í 200 metra ryggsvimjing á “Danske Mesterskaber for Hold 2013”, og varð hon har nummar 6 av teimum 18 luttakandi við tíðini 2:18.00, góð 2 sekund frá hennara bestu tíð á 2:15.97. Sí úrslitalistan her.
Birita Debes luttók í áðni í 100 metra ryggsvimjing á “Danske Mesterskaber for Hold 2013”, og gjørdist hon tá nummar 3 av 18 luttakandi við tíðini 1:02.63. Føroyska metið hjá henni er 1:01.46 frá NJM 2010 í júst somu høll; men á DMH er tað allarviktigasta at man yvirhøvur fær eina tíð, so at Esbjerg fekk hesi 685 stigini afturat í kappingini ímóti Sigma og hinum. Sí úrslitalistan her.
