Tag: Danish Open 2009

Jakob Andkjær tosar um venjing í 25m/yard hyli í mun til venjing í 50m hyli. Um møguleikarnar hjá Pál Joensen í altjóða kapping nú og so um hann fekk ein 50m hyl at venja í.

Shaila svam seg til eitt innleiðandi 9. pláss í 50 frí, við tiðini 27.54, 6 hundrapartar frá hennara bestu tíð, og er harvið komin víðari til hálvfinalurnar seinnapartin. Hildur á Fløtti svam eisini ógvuliga skjótt, 28.87 sekund, har kravtíðin til Oyggjaleikir er 28.28. Jón Hofgaard og Dánjal Martin Hofgaard svumu ikki heilt upp til sínar tilmeldingartíðir í 50 bringu; men Elspa er so víðari sum nr 2 í 50 rygg, og Poula Ø. Mohr betraði í somu grein um sína bestu tíð, frá 34.21 í januar til 33.27 í dag.

Í 100 bringu gekk tað eitt sindur misjavnt hjá føroysku kvinnunum, í øllum førum um man hyggur at tilmeldingartíðunum. Katarina betraði gott nokk meira enn 1 sekund um sína bestu tíð, frá 1:21.54 til 1:20.17, men Malan dragnaði frá 1:17.30 til 1:21.43, og tær høvdu nokk báðar ætlað sær at svimja um oyggjaleikakravtíðina á 1:17.56. Tað gekk heldur ikki so væl hjá Monu, sum svam 4:39.17 í 400 frí, har hennara besta tíð er 4:34.47. Men Elspa kom so víðari sum nummar 1 í 400 frí hjá kvinnum, frammanfyri Lotte Friis, ið sum kunnugt vann bronsu í 800 frí á OL í Beijing.

Seinnapartin verða tað altso Pál Joensen í 1500 frí finalu ímóti Mads Glæsner kl 16:00, Shaila millum Garðarnar í 50 frí hálvfinalu umleið kl 17:10, og Elspa Mørkøre í 400 frí finalu ímóti Lotte Friis umleið kl 18:14. Fylgið við á www.svimjing.com/live

Tíðindaskriv frá SSF

Shaila millum Garðarnar setti í dag, hósdag 9. apríl, føroyskt met í 100 metra firvald, tá ið hon á donsku meistarastevnuni svam teinin í tíðini 1:08.36, har metið hjá henni frá Reykjavík International í januar var 1:08.52. Harvið hava føroyingarnir nú sett 5 met á Danish Open 2009: Pál í 100, 200 og 400 frí, harav 200 tvær ferðir í innleiðandi og finalu, og Shaila í 100 firvald. Lesið annars frágreiðing frá Jón Bjarnasyni, venjarum teirra, á www.susvim.com
Continue reading Shaila setti føroyskt met, 3. dag á DM 2009

Tíðindaskriv frá SSF

Pál Joensen hevur nú av álvara prógvað seg sum gullmerkjakanditat í 1500 frí, eftir at hann í morgun, hósdag 9. apríl, helt Mads Glæsner aftanfyri seg, allar teir 1500 metrarnar í innleiðandi riðlunum av 1500 frí. Finalan verður í morgin, fríggjadag 10. apríl kl 16:00, har millum annað Jón Bjarnason, venjari hjá Pál, væntar at vinnarin fer at seta í minsta lagi norðurlendskt met, og kanska enntá fer at fara undir 15 minuttir í 1500 metrar á langhyli, sum fyrsti norðurlendingur nakrantíð.

Pál og Frans Johannesen, á DM í Esbjerg. © Jón Bjarnason 2009
Continue reading Pál bestu tíð í 1500 innleiðandi á DM í Esbjerg

Elspa Mørkøre vann sum væntað silvurheiðursmerki í 100 rygg á donsku meistarastevnuni í Esbjerg í dag, men kláraði tíverri ikki at náa kravtíðina til HM í Rom í summar. Hon skuldi svimja 1:01.86, men svam 1:02.74. Allar súðir eru tó ikki syftar enn, við tað at hon hevur bæði 200 rygg og 400 frí eftir á skránni, umframt serliga stafettina í 4×100 blandað, har hon sum ryggsvimjari fær eisini eina offisiella einstaklingatíð, í 100 rygg.

Hetta heldur Jón Bjarnason, í viðmerking her á svimjing.com, og spurningurin er tí mest um hvør av teimum nær at verða fyrsti norðurlendingur undir 15 minuttir í 1500 frí í langhyli. Bjarnason heldur sjálvur at Pál sá frískari út eftir 1200 í teimum 1500, enn Mads, og vit kunnu eisini staðfesta at munurin á teimum í 200 og 400 frí er tódnaður so mikið nógv, at grafurin hjá mær frá november í fjør kanska fer at halda allíkavæl.

(Her stutthyljatíðir, sum eru nakað væl skjótari enn langhyljatíðir)
Continue reading Pál og Mads fara eftir norðurlendska metinum í morgin

Teir svumu ikki við fullari ferð, og splitt-tíðirnar siga tí ikki so nógv annað, enn at Mads valdi at liggja undir liðini á Pál allan vegin, inntil Pál at enda dró frá. Kanska tí at Mads ikki ætlaði sær meira enn 2. pláss, ella kanska tí at Mads mátti uppgeva at taka Pál í spurtinum. Latum okkum vóna, at talan var um tað seinna 🙂
Continue reading Pál bestu tíð í 1500 innleiðandi

Tíðindaskriv frá SSF

Pál Joensen er av sonnum væl fyri, nú tey kappast á donsku meistarastevnuni í Esbjerg. Fyrst svam hann seg til finalupláss í morgun, við at svimja 200 frí í tíðini 1:51.91, har føroyska metið hjá honum frá Reykjavík International í januar var 1:53.53. Og síðani vann hann bronsuheiðursmerki í finaluni nú seinnapartin, við at betra um metið frá í morgun til 1:50.04. Og fyri at tað ikki skal vera lygn, so var splitt-tíðin eftir 100 metrum eisini føroyskt met, 53.55 sekund, har metið hjá Kristani Olsen frá HM í Melbourne í 2007 var 54.43 sekund. Altso trý føroyskt met til Pál, annan dag á DM, umframt eitt í 400 frí í gjár.
Continue reading Pál sett trý met á øðrum degi av Danish Open 2009

Tað er lagt upp til ein sannan gysara í 200 frí, seinnapartin í dag, nú Pál við 1:51.91 hevur næstbestu tíð frá innleiðandi, umringaður av Mads Glæsner við 1:51.31 og Jon Rud við 1:51.97. Tíðin hjá Pál var hartil nýggj flott betring av føroyska metinum hjá honum, frá teimum 1:53.53 sum hann svam í Reykjavík í januar.

Elspa Mørkøre svam seg eisini í finalu í 100 rygg seinnapartin, við at svimja 1:02.74 í morgun, har bara danska svimjistjørnan Pernille Larsen svam skjótari við tíðini 1:02.29. Triði svimjarin svam 1:05.31, og Elspa skuldi tí verið rímiliga trygg at vinna heiðursmerki aftur í kvøld. Men fokus er nokk fyrst og fremst á at klára 1:01.86, sum er hennara kravtíð til HM.

Mona Simonsen svam seg til eitt 9. pláss í 800 frí við tíðini 9:25.32, sum tíverri sær út til at akkurát ov lítið til at sleppa í finalu hósdagin. Tey eru nevniliga bara 8 sum sleppa í A-finaluna, og sambært innbjóðingini er eingin B-finala í 800 frí, sum tí merkir at Mona verður akkurát ov stutt, um ikki onkur annar meldar frá.
Continue reading Pál og Elspa víðari til finalur aftur í dag