DM 2013 – Page 2 – svimjing.com

Magnus 24.72 og nr 5 í 50 firvald á DM 2013

Tað bleiv ikki til heiðursmerki til Magnus Jákupsson á donsku meistarastevnuni á langgeil, tá ið teir í kvøld svumu finalu í 50 metra firvaldasvimjing. Men tað var ikki tí at tað ikki var líka við, tí Magnus var bara 7 hundraðpartar frá bronsuni, 9 hundraðpartar frá silvurinum og 32 hundraðpartar frá gullinum. Sí úrslitalistan her, Andreas Schiellerup gull við 24.40, Søren Dahl silvur við 24.63, Morten Klarskov bronsu við 24.65, Daniel Steen Andersen nr 4 við 24.68, Magnus nr 5 við 24.72, og Viktor B. Bromer nr 6 við 24.76.

Pál luttók eftir øllum at døma ikki í kappingini í 200 metra frísvimjing, hóast hann upprunaliga stóð á startlistanum. Annars super løgið av dønum at hava 50 og 100 firvald í sama stevnuparti, ein avgerð sum í denn grad gekk útyvir luttøkuni í 100 metra firvaldasvimjing.

Magnus 24.99 og fjórskjótastur í innleiðandi 50 firvald í morgun

Magnus Jákupsson luttók í áðni í innleiðandi riðlunum av 50 metra firvaldasvimjing á donsku meistarastevnuni á langgeil, og varð hann har fjórskjótastur av teimum 45 sum luttóku, við tíðini 24.99 sekund aftanfyri Andreas Schiellerup á 24.64, Søren Dahl á 24.72 og Daniel Steen Andersen á 24.92. Teir vóru fimm undir 25 sekund, so tað verður ein sjón seinnapartin, tá ið finalan verður í Bellahøj Svømmestadion í Keypmannahavn. Sí úrslitalistan her.

Magnus 25.63 og danskur meistari í 50 metra ryggsvimjing

Magnus Jákupsson svam seg í dag til gullheiðursmerki á donsku meistarastevnuni á langgeil, tá ið hann í finaluni í 50 metra ryggsvimjing svam teinin uppá 25.63 sekund, har næsti maður Andreas Schiellerup svam 26.07. Hetta er stórt persónligt met hjá Magnusi Jákupssyni, og eisini greitt besta tíð millum danskar svimjarar yvirhøvur í ár, í mun til hansara til nú bestu tíð 25.92 frá Danish Open í mars mánaða. Føroyska metið hjá Magnusi er 26.34 frá donsku meistarastevnuni í fjør, so har hendir av álvara nakað hjá Magnusi. Danska metið hjá Matiasi Gydesen er 25.44, frá EM í Budapest í 2010. Sí úrslitalistan her

Pál hálvan minutt skjótast og ‘extra’ á DM 2013

Pál Joensen spældi seg í dag til ein knúsandi (moralskan) sigur á donsku meistarastevnuni á langgeil, tá ið hann í 800 metra frísvimjing svam teinin uppá 8:03.77, har hin næstskjótasti og nú danski meistarin Marc Bach Nielsen svam teinin uppá 8:32.79. Sí úrslitalistan her, Pál stendur sum EXTRA niðast, vælsagtans tí at hann ikki er danskur men føroyskur svimjari.

Magnus 26.61 og greitt bestu tíð í innleiðandi 50 rygg á DM 2013

So er danska meistarastevnan á langgeil byrjað – Fyri løtu síðani luttók Magnus Jákupsson í innleiðandi riðlunum í 50 metra ryggsvimjing, og var hann har greitt skjótastur av teimum 34 sum svumu, við tíðini 26.61 har hin næstskjótasti svam 27.07. Sí úrslitalistan her.

Pál skal í dag eftir ætlan svimja 800 metra frísvimjing, men eg veit ikki heilt hvussu danir roksa … í innleiðandi riðlunum stendur hann (uttan tíð og niðast) at vera ‘EXTRA’, og í skránni til í kvøld stendur hann ovast at vera ‘EFT’. Eftertilmeldt?

So er tað Danska Meistarastevnan á langgeil 2013

Danska svimjisambandið skipar fyri árligu donsku meistarastevnuni á langgeil, frá í morgin árini hin 1. juli og fram til leygarkvøldið hin 6. juli. Úr Føroyum luttaka teir báðir Pál Joensen og Magnus Jákupsson; Pál í 200, 400 og 800 frí, og Magnus í 50, 100 og 200 rygg, umframt 50 og 100 firvald. Startlistin sæst her á svoem.org, til ber at fylgja við úrslitunum so hvørt her á livetiming.dk, og hartil fer DR at sjónvarpa beinleiðis frá finalunum her á dr.dk. Innleiðandi riðlarnir byrja hvønn dag kl 09:00 danska tíð og finalurnar kl 17:00, sí skránna her.

Jákup Jacobsen eigur myndina.