Tag: em 2007

OK, teir høvdu tveir við í 50 metra finaluni, so tað var kanska ikki heilt av leið at klára seg væl í stafettini eisini. Men altso, gull og heimsmet  til Svøríki í allarseinastu kappingini á EM í Debrecen, við tíðini 1:24.19. Tvey evropeisk met vórðu eisini sett í dag, tá ið ungi ungarski Dani Gyurta vann 200 bringu í tíðini 2:05.49, og russiska Yuliya Efimova vann 100 bringu í tíðini 1:04.95.

Continue reading Heimsmet til Svøríki í 4×50 frí (!)

So er EM av hvat føroyingum viðvíkur, og vit kunnu staðfesta at okkara hava svomið skjótt í Ungarn. Ella í øllum førum upp til sítt besta. Her niðanfyri er eitt yvirlit yvir hvussu tey hava svomið í mun til tær tilmeldingartíðir sum tey komu við, og í hvønn mun tey hava sett met.

Grein	Svimjari	Tilmelding	Úrslit	Viðmerking
50 frí menn	Dánjal Martin Hofgaard	24.74	24.40	persónligt met
100 frí menn	Dánjal Martin Hofgaard	54.12	53.54
200 frí menn	Pál Joensen	1:51.92	1:51.79	føroyskt met
400 frí menn	Pál Joensen	3:54.64	3:55.94
1500 frí menn	Pál Joensen	15:24.50	15:10.02	føroyskt met
50 rygg menn	Kári J. á Høvdanum	26.95	26.83	føroyskt met
100 rygg menn	Kári J. á Høvdanum	57.76	57.41	føroyskt met
200 rygg menn	Kári J. á Høvdanum	2:06.44	2:07.16
50 frí kvinnur	Shaila millum Garðarnar	27.66	27.02	persónligt met?
100 frí kvinnur	Shaila millum Garðarnar	1:01.18	59.41	persónligt met
400 frí kvinnur	Mona Simonsen	4:35.68	4:36.18
800 frí kvinnur	Mona Simonsen	eingin tilm.tíð	9:13.50
50 firvald kvinnur	Shaila millum Garðarnar	30.13	30.04

Pál svam teinin í tíðina 1:51.79, sum er 13 hundraðpartar skjótari enn føroyska metið sum hann setti á NJM fyri 14 døgum síðani. Ein flott forbedring, tá ið man hugsar um at hann tá, á NJM, gjørdi eitt tikaralop til at fara frá bronsu- til gull-heiðursmerki.

SSF dagførir ikki sína heimasíðu longur, og metið á ssf.fo er tí enn teir 1:53.60 sum hann vann gull við á Rhodos í summar. Kiksað SSF, men fantastiskt Pál at betra seg næstan 2 sekund á 200 metra teininum uppá eitt hálvt ár!

Shaila millum Garðarnar svam eisini eina virkuliga flotta tíð í morgun, tá ið hon svam 50 frí uppá 27.02 sekund. Hon vildi tó sikkurt gjarna svomið einar tríggjar hundraðpartar skjótari, so at tíðin fór niður um 27 sekund, ella kanska 1-2 tíggundapartar til at fara niður um metið hjá Elspu á 26.71 (ella er tað 26.91?).

Á sport.fo stendur annars at lesa at Kári J. á Høvdanum eisini kláraði kravtíðina til HM í gjár, tá ið hann setti føroyskt met í 100 rygg. Tey eru nú trý sum eru klár at fara til HM í Manchester í apríl 2008: Elspa Mørkøre, Pál Joensen og Kári J. á Høvdanum.

Eg yvirsá at tær týsku Janine Pietsch (27.19), Janne Schaefer (29.64), Annika Mehlhorn (26.52) og Britta Steffen (23.32) settu nýtt heimsmet í 4×50 blandað í dag, tá id tær svumu teinin í tíðini 1:46.67 á EM í Debrecen. Niðurlond áttu gamlad metið frá 2005 á 1:47.44.

Aftur í dag eru góðir samandráttir at lesa á SwimInfo og SwimNews. Tað virkar sum um allir svimjiheimurin bara er heima og heldur ondini, meðan tey svimja sum ongantíð fyrr á Evropeisku Meistarastevnuni.

Kroatiska Sanja Jovanovic setti beint nú heimsmet í 50 rygg á stuttbana, við at svimja teinin í Debrecen á 26.50 sekund. Hví halda føroyingar áfram at tvæssa við fótbólti, tá ið heimsmet verða sett hvønn dag á EM í svimjing, og øll orsøk er hjá føroyingum at vera stoltir bæði sum tjóð og norðurland?

Tveir sviar og ein dani vóru í finaluni í 100 frí hjá monnum, har tann eini sviin vann silvur.  Ein dani í finaluni í 1500 frí. Ein finsk vann 100 blandað hjá kvinnum. Tveir norðmenn í finaluni í 50 bringu hjá monnum, har tann eini vann bronsu silvur. Og beint nú eru bæði Danmark og Noregi og Svøríki í finaluni í 4 x 50 blandað hjá kvinnum. Svøríki vann silvur.

Í hesum selskapi luttaka føroyingar og gera seg ikki fyri skommum. Føroysk met hvønn dag, og úrslit sum fáa stóru svimjitjóðirnar at undrast. Ein føroyingur er ovast á evroparanglistanum fyri juniorar, hóast evropeiska svimjingin sum heild er á so høgum støði, at heimsmet sum nevnt verða sett hvønn dag á innanhýsis meistarastevnuni.

Men nei nei, føroysku ítróttarjournalistarnir taka gott nokk undir við okkara ‘hype’ í løtuni, og nominera einmælt Pál Joensen sum størsta føroyska ítróttarnavn ár 2007, umframt Elspu sum nummar trý. Føroyska svimjingin hevur haft fast pláss millum nomineringarnar seinastu 4-5 árini. Og tó so halda teir áfram við at kalla fótbóltin fyri ‘nummar 1, 2 og 3 í føroyskum ítrótti’, tí at eitt ella annað.

Í løtuni er EM í svimjing sum sagt í Ungarn. Teir kundu sikkurt fingið sendirættindi úr Ungarn fyri lítið og lætt, men SVF velur heldur at senda bara frá finalunum á EM í hondbólti. Hóast opinbart bara Noregi hevur kvalifiserað seg sum norðurlendskt land. Og spara so óivað saman til at kunna senda frá EM ella VM ella hvat tað nú er í fótbólti, har alt norðurlendskt uttan Svøríki er útsligið.

Misskiljið meg ikki: Mær dámar væl at hyggja at bæði hondbólti og fótbólti. Og at øllum møguligum øðrum ítrótti eisini. Tað tíð eg hevði Eurosport var tað mest sannlíkt sjónvarpskanalin sum eg hugdi mest at, eisini tá talan var um curling ella skiskjóting.

Men mær dámar ikki bara at hyggja at hondbólti og fótbólti (og flogbólti, tá ið tey ikki finna okkurt um hondbólt ella fótbólt). Mær dámar ikki ítróttarsendingar sum leggja út við at kalla seg “3-2”, tí at ítróttarjournalistarnir hava valt fyri meg, at eg bara havi áhuga fyri bólt-ítrótti. Mær dámar serstakiliga væl at hyggja at fimleiki, og tey – fimleikafólkini – vilja sikkurt nærmast gjalda sjónvarpinum pengar fyri at senda frá sínum kappingum 😉

Kringvarpið misti eina løtu rættindini at senda frá føroyskum ítrótti, her í vikuni, av tí at tey ikki vilja kalla hondbólts- og fótbóltsligairnar fyri tey sponsoreraði nøvn sum tey hava selt seg til. Hey Sjónvarp og Útvarp – í svimjingini hava vit eingi sovorðin nøvn! Altjóða svimjisambandið FINA hevur beinleiðis reglur sum siga, at eitt sponsornavn á eini drakt ikki má fylla meira enn eitt meðal postkort. So higani kunnu tit senda við góðari samvitsku, uttan at risikera at selja tykkara journalistisku sál. Og so er tað hartil bæði gott og føroyskt !

Orsaka tit – nú fór eg for langt. Uppdagaði ov seint at eg vildi skriva ein subjektivan bloggupost, heldur enn eina objektiva frásøgn frá EM. Jovanovic setti heimsmet í 50 rygg á EM. Gloymið alt hitt sum eg havi skrivað 🙂

Stuttligt at fylgja við ‘live’ á debrecen2007.com. Heimafavoritturin Laszlo Cseh lá á odda men dragnaði týðiliga tá ið 2-3 longdir vóru eftir, og mannaði seg tí upp aftur tá ið polski Pavel Korzeniowski vendi samstundis sum hann til síðstu longd. Teir komu inn í senn, og á úrslitatalvuni stóð eina løtu sama tíð til báðar svimjararnar, til tey nú opinbart hava funnið ein eyka tíggjundapart til Cseh. Continue reading Sama tíð í 200 firvald 🙂

Ungarski Laszlo Cseh betraði um sítt egna met í 400 blandað, so at tað nú er 3:59.33 heldur enn 4:00.37. Harvið gjørdist hann eisini fyrsti maður undir 4 minuttir á teininum. Ikki so galið at seta heimsmet á heimabana, tveir dagar á rað 🙂

Niðurlendsku Inge Dekker, Hinkelien Schreuder, Ranomi Kromowidjojo og Marleen Veldhuis settu eisini heimsmet í 4 x 200 frí, við at svimja 1:34.82 har gamla metið hjá Niðurlondum var 1:36.27. Hendan kapping er tó ikki góðkend FINA grein, og tí ikki at síggja á metlistunum hjá FINA.

Annars er ein góður samandráttur av finalunum í dag at lesa her á SwimInfo. Saman um tikið hava tey sett eina rúgvu av nationalum metum, umframt at russiska Yuliya Efimova setti evropeiskt met í 200 bringu (2:19.08) og danska Lotte Friis mann hava sett norðurlendskt met í 800 frí við at vinna kappingina og seta danskt met í tíðini 8:12.27.

Aðrir svimjarar vóru heilt nær at heimsmetum, og svensku heimsmet-haldararnir Anna-Karin Kammerling (50 firvald) og Stefan Nystrand (100 frí) vardu saman við Lotte Friis okkara norðurlendsku litir. Hinvegin varð bringusvimjingin meira kontroversiel, við tað at dómararnir eru farnir at døma harðari, og til dømis russisku Dmitry Komornikov og italski Alessandro Terrin tí fullu fyri kolldømdingarreglurnar.

Tað sær út til at Kári J. á Høvdanum hevur sett nýtt føroyskt met í 50 rygg í morgun, á Evropeisku Meistarastevnuni í Debrecen (Ungarn). Tíðin varð 26.83 sekund, sum í øllum førum er væl skjótari enn metið á almenna metlistanum hjá SSF (27.29), og eisini skjótari enn hansara silvurvinnandi tíð á NJM 2007 (26.95).
Continue reading Føroyskt met til Kára ?