Tag: FINA World Cup 2009

Tíðindaskriv frá Svimjisambandið Føroya

Triðja norðurlendska metið uppá 9 dagar

Seinasta føroyska luttøkan í FINA World Cup á hesum sinni var finalan í 1500 frí í Berlin. Í einum dysti av teimum heilt stórum var Pál á seinasta hundraðmetrinum lagdur aftur um, av einum sera vælsvimjandi italiumanni Frederico Colbertaldo. Olympiski- og heimsmeistarin Mellouli møtti ikki upp til finaluni, so kappingin var millum Colbertaldo og Pál. Eingin ivi var um, at Pál hevði lúrt italiumannin av til kappingina í Stockholm. So tá Colbertaldo royndi at fara frá Pál við 900 metrum, so svaraði Pál aftur, og helt italimannin aftanfyri seg. Endaliga avgerðin fall so heldur ikki fyrr enn á seinasta hundraðmetrinum, har Colbertaldo gav alt hann átti og kom heim við 0:26.95 og 0:26.94 ímóti 0:28.06 og 0:28.24 hjá Pál. Colbertaldo vann gull við 14:29.46 og Pál fekk silvur við 14:32.15. Við hesari tíð setti Pál á triðja sinni í 9 dagar nýtt norðurlendskt met.

Continue reading Pál Joensen, kongur av norðurlendskum langteini

Pál setti í dag sítt triðja norðurlendska met uppá góða viku, og hevur sementerað sítt navn sum norðurlendski kongurin á 1500 metra teininum, við fyrst at svimja 14:32.64 og vinna gull í Moskva, fyri síðani at svimja 14:32.59 og vinna silvur í Stockholm, og so aftur svimja 14:32.15 og vinna silvur í Berlin. Hvørja ferð skjótari og skjótari, undir tað nú lítið sigandi fyrrverandi norðurlendska metið hjá Mads Glæsner frá EM í Rijeka í 2008, sum var 14:38.87. Einasti sum Pál hevur tapt ímóti, í 1500 metrar frí á hesum trimum World Cup stevnum, er sjálvur forsvarandi evropameistarin frá Rijeka 2008, Federico Colbertaldo úr Italia, sum í Stockholm rykti frá Pál við umleið 1000 metra markinum, fyri síðani nú í Berlin at skula kempa líka til 1350 metra markið, áðrenn hann slapp frá føroyinginum. Sí úrslit

Continue reading Pál norðurlendskt met og silvur á World Cup í Berlin

Venjarin hjá Michael Phelps, Bob Bowman, hevur sambært SwimNews.com ætlanir at brúka ‘superdraktir’ eisini eftir 31. desember 2009, sjálvsagt ikki sum draktir at brúka í kapping, men sum venjingartól serliga fyrst á svimjiárinum, til at venja við hægri ferð og betri teknikki, enn hvat ið svimjararnir uppá tað tíðspunkt kunnu svimja uttan superdrakt. “I will be changing one thing: I will be using the suits in training … to give them the neuro-muscular feel for racing fast early in the season.”

Continue reading ‘Superdraktirnar’ fara at verða brúktar eisini eftir 2009

Pauli Ø. Mohr úr Fuglafjarðar Svimjifelag setti nú í morgun persónligt met í 50 frí á stuttgeil, við tíðini 23.24, har hansara besta tíð til nú frá Oyggjaleikum í summar var 23.33. Føroyska metið hjá Páli Joensen er 23.19, og spennandi skal tí vera at síggja, um Pauli klárar at vinna eisini hasar síðstu 5 hundraðpartarnar, til dømis á landsdystinum millum Føroyar og Ísland um smáar tvær vikur, ella á EM í Istanbul í desember.

Continue reading Pauli bestu tíð aftur í morgun

Danski Mads Glæsner er ikki longur á startlistanum til finaluna í 1500 frí, sum verður á World Cup stevnuni í Berlin nú seinnapartin kl 14:00. Harvið er tað at kalla staðfest nú, at norðurlendski kongurin á 1500 metra frí teininum nú er Pál Joensen, eftir at Pál fyrst vann á Mads í bæði Moskva og Stockholm, fyri at danin síðani trekkir seg nú. Og tað er ikki tí at Glæsner ikki er í form, við tað at hesin jú vann fyrst silvur í 400 frí í Moskva, fyri síðani at vinna gull og seta norðurlendskt met á teininum í Stockholm, og so at enda vinna silvur og seta norðurlendskt met á teininum í Berlin í gjár. Mads er skjótari á 400, og Pál er nú skjótari á 1500.

Michael Phelps gjørdist einans nummar 5 í sínum riðli, og nummar 12 av teim tilsamans 77 sum svumu, og er harvið úti úr kappingini sum skuldi vera høvuðsattraktión í Berlin; nevniliga holmgongan millum Phelps og týska Paul Biedermann. Serfrøðingar og fjølmiðlar eru sum heild samdir um, at her síggja vit munin millum at svimja í ‘superdrakt’ og ikki, men vit frætta eisini at Phelps er ikki heilt í form. Sum til dømis tá ið tey á SwimNews.com her citera Phelps sjálvan fyri at hava sagt: “”I’m doing some best times and for doing it when not having done the training or not having done the amount of training. I’m not in an awful place”. Danski Mads Glæsner gjørdist nummar 11 í riðlinum, og er harvið heldur ikki við finaluni, meðan týski Paul Biedermann við einum skaddum læri varð nummar 1, við tíðini 1:42.73. Heimsmetið hjá Biedermann er 1:40.83, frá hesari World Cup stevnu í Berlin í fjør. Sí úrslit

Russiski Fesikov setti sum kunnugt eitt í morgun, við 50.95 í 100 blandað, og fimm vórðu so sett afturat í finaluumfarinum av World Cup í Berlin, seinnapartin. Suðurafrikanski Cameron van der Burgh betraði um sítt heimsmet í 50 bringu á stuttgeil, við at svimja 25.25, har hansara met frá í august mánaða var 25.43. Avstralska Leisel Jones tók heimsmetið frá amerikansku Jessica Hardy, við at svimja 1:03.00, har heimsmetið frá í fjør var 1:03.72. Hardy var sjálv eisini undir heimsmetið, við 1:03.30. Týski Paul Biedermann svam 3:32.77, og knústi sostatt heimsmetið hjá Grant Hackett frá 2002, sum var 3:34.58. Mads Glæsner varð nummar tvey í hesi kapping, við flottum norðurlendskum meti á 3:37.75. Japanska Shiho Sakai setti heimsmet í 200 rygg við tíðini 2:00.18, har metið hjá simbabvisku Kirsty Coventry frá HM í Manchester í 2008 var 2:00.91. Og týski Steffen Deibler slapp at vera tann ið setti heimsmet nummar 113 í ár, tá ið hann í 50 firvald akkurát vann á suðurafrikanska Roland Schoeman, við tíðini 21.80 har Schoeman svam 21.87, og har heimsmetið hjá Deibler sjálvum frá í oktober mánaða var 22.06. Les swimmingworldmagazine.com

Russiski Sergey Fesikov gjørdist fyrsti maður undir 51 sekund í 100 blandað, nú hann á World Cup stevnuni í Berlin svam teinin uppá 50.95 sekund, har heimsmetið hjá amerikanska Ryan Lochte frá 2008 var 51.15. Sí úrslit

Pál Joensen svam í morgun rættiliga væl frá síni bestu tíð í 400 frí, tá ið hann svam innleiðandi 400 frí á World Cup í Berlin. Tíðin 3:44.91 rakk bara til eitt 16. pláss í Berlin, har hann í Stockholm svam 3:41.60 í innleiðandi, og síðani í finaluni setti føroyskt met við 3:40.16. Men einki er so ringt at tað ikki gott fyri okkurt annað – hervið kann Pál spara seg, meðan kappingarneytarnir í 1500 frí finaluni í morgin, skulu svimja finalu í 400 frí í kvøld, í kókandi høll í Berlin.

Hinir føroyingarnir hava eisini verið í hylinum, og svumu avbera væl, tá ið man hugsar um at hetta eru tíðir á morgni. Mona Simonsen svam undir 9 minuttir í 800 frí, áðrenn kl 9 á morgni týska tíð, og Pauli setti síðani persónligt met við tíðini 52.64 í 100 frí. Nú klokkan nakað yvir 11, týska tíð, svam Shaila millum Garðarnar so 50 frí við tíðini 26.92, har hennara føroyska met er 26.49. Altso trý góð úrslit, nær við ella betri enn teirra bestu tíðir.
Continue reading Pál nr 16 í innleiðandi 400 frí í Berlin

Jón Bjarnason og Pauli Ø. Mohr tosa um startskamlar og annað gott. Thurid leitar eftir billettum? …

(video strikað)