Nú síggjast úrslitini frá FM/JM/Føroyaleikum 2021 endiliga her á SwimRankings, sum ger tað lættari at síggja millum annað, hvussu tað gekst hjá hesum ymisku svimjarunum og feløgunum á Føroyameistarastevnuni og JuniorMeistarastevnuni 2021.
Myndafólk hjá Føroyaleikum var og tók myndir frá setanini av Føroyaleikum í Vági, umframt frá svimjistevnuni í Páls Høll. Eg meini at eg havi fingið allar við her, sum hava við Føroyameistarastevnuni og JuniorMeistarastevnuni í kappsvimjing á langgeil at gera, í myndasavninum niðanfyri
Her eru úrslitini frá FøroyaMeistarastevnuni og JuniorMeistarastevnuni á langgeil 2021, í Páls Høll í Vági hin 9. til 11. juli, sum partur av eisini Føroyaleikum 2021. Úrslitini síggjast eisini her á livetiming.se og her á SwimRankings
Okkara ungu svimjarar hava verið raskir aftur í dag, nú fyrst JuniorMeistarastevnan varð avgreidd fyrrapartin, samstundis sum øll svumu um at koma í FM-finalurnar seinnapartin, ið so aftur vórðu avgreiddar út á kvøldið. Nógvar góðar tíðir, og góður innsatsur frá øllum sum vóru til staðar, her suðuri í Páls Høll í Vági.
Hóast tey ikki á sama hátt sum onnur ár hava Róland Toftum at dúva á, so eru suðuroyingar øgiligir í bringusvimjing, nú teir í gjár tóku øll FM-heiðursmerkini í 200 metra bringusvimjing fyri menn, og síðani í gjár tóku eisini øll í 100 metra bringusvimjing fyri menn. Í morgin er so 50 metra teinurin eftir, har Róland eisini er á startlistanum, soleiðis at SuSvim eigur 4 tær bestu tilmeldingartíðirnar.
Suðuroyar Svimjifelag átti kanska eitt av størru yvirraskilsum á hesi Føroyameistarastevnu, tá ið tey í kvøld megnaðu at vinna gull bæði í 100 metra frísvimjing fyri kvinnur, og í 100 metra frísvimjing fyri menn.
Fyrst varð Alisa Vestergård føroyameistari í 100 frí fyri kvinnur
Og síðani varð Bartal Debess føroyameistari í 100 frí fyri menn
Hóast allar kappingargreinar sjálvsagt hava sama formella status í kappsvimjing, so eru vit í øllum førum summi sum hava hug at kalla 100 frí fyri ‘kongateinin’, tí at tað er ein hin mest elsta og mest populera greinin, til dømis á Olympisku Leikum.
Og her var SuSvim also best í dag, bæði hjá monnum og hjá kvinnum.
Høvuðsvenjarin Petur Heðin á Fløtti hevði roknað tað væl út, tá ið liðini hjá Ægir skuldu mannast í dag, til liðsvimjingarnar í 4 ferðir 100 metrar blandaðari svimjing fyri mix-lið: Fyrst setti onnur liðsvimjingin føroyskt juniormet í innleiðandi riðlunum í morgun, tá ið tey vunnu gull á JML 2021; og síðani settu báðar liðsvimjingarnar met í finaluni, onnur føroyskt met og hin føroyskt juniormet, tá ið tey vunnu ávikavíst gull og bronsu á FML 2021.
JML 2021 og innleiðandi til FML: “Ægir 2” 4:55.32 og føroyskt juniormet (og JM-gull) í 4×100 blandað fyri mix-lið, har HS átti juniormetið á 4:56.65 frá Atlantic Open 2021. Tey sum svumu fyri “Ægir 2”, vóru Heini M. Askham (rygg), Sofía Toftegaard (bringa), Róa Trygvadóttir (firvald) og Hanus Lydersen (frí)
Finalan á FML 2021: “Ægir 2” 4:49.13 og føroyskt juniormet (og FM-bronsu) í 4×100 blandað fyri mix-lið, har “Ægir 2” átti juniormetið á 4:55.32 frá innleiðandi riðlinum. Tey sum svumu fyri “Ægir 2”, vóru Líggjas Joensen (rygg), Sofía Toftegaard (bringa), Jonna Joensen (firvald) og Hanus Lydersen (frí)
Finalan á FML 2021: “Ægir 1” 4:29.30 og føroyskt met (og FM-gull) í 4×100 blandað fyri mix-lið, har SuSvim átti juniormetið á 4:35.11 frá Atlantic Open 2021. Tey sum svumu fyri “Ægir 1”, vóru Signhild Joensen (rygg), Heini M. Askham (bringa), Malan Jóhansdóttir (firvald) og Martin V. Sivertsen (frí)
Hóast í so nógvir av okkara bestu svimjarum eru givnir, hetta góða árið sum korona hevur herjað, so var hesin fyrsti dagurin avgjørt bæði spennandi og lovandi, á FøroyaMeistarastevnuni og JuniorMeistarastevnuni 2021. “HS Mix 1” trýsti føroyska metið eitt fitt petti niður í 4×100 frí fyri mix-lið, og teir yngru svimjararnir góvu í heilum teimum eldru skarpan gang, eisini í FM-finalunum.
Skjótasta liðsvimjingin hjá Havnar Svimjifelag setti í dag stórt nýtt føroyskt met í 4×100 metra frísvimjing fyri mix-lið, tá ið tey í finaluni á Føroysku Meistarastevnuni í kappsvimjing á langgeil 2021 svumu teinin uppá 3:56.41, har Ægir áttu metið frá Atlantic Open 2021 á 4:04.81. Tey sum svumu fyri “HS Mix 1”, vóru Ronja Ró í Dímun, Johan Nónskarð Dam, Villiam Marius Samuelsen og Vár Erlingsdóttir Eidesgard, sí úrslistalistan her
Svimjisambandið stroymar aftur í ár frá FøroyaMeistarastevnuni og JuniorMeistarastevnuni í kappsvimjing á langgeil, sum er í Páls Høll í Vági nú hin 9. til 11. juli 2021, og sum kunnugt er partur av eisini Føroyaleikum 2021.
Sí YouTube-rásina hjá Svimjisambandi Føroya
Hartil verða startlistar og úrslit sum vant løgd út her á LiveTiming.se, við møguleika fyri eisini at fylgja við tíðum frá kappingini beinleiðis.
