Magnus Jákupsson megnaði aftur í morgun at svimja seg víðari til finalu, tá ið hann í innleiðandi riðlunum á MOM Marseille 2014 svam 100 firvald uppá 56.34 sekund, sum var 10. besta tíð í innleiðandi og nokk til eitt pláss í B-finaluni í kvøld. Frans Johannesen royndi seg í 400 metra frísvimjing, har hann megnaði at svimja 4:08.27 og 18. bestu tíð. Og teir báðir donsku føroyingarnir royndu seg eisini í 50 frí, har teir endaðu á júst somu tíð, 24.59 og eitt 21. pláss.
Tag: Magnus Jákupsson
Magnus 26.47 og bronsu í 50 rygg á MOM Marseille 2014
Magnus Jákupsson megnaði í kvøld at vinna sær eitt bronsuheiðursmerki á MOM 2014 stevnuni í Marseille í Fraklandi, tá ið hann í 50 metra ryggsvimjing svam teinin uppá 26.47 sekund. Og tað vóru ikki hvør sum helst sum vóru frammanfyri, nevniliga heimsmeistarin frá 2009 og 2011 Liam Tancock úr Bretlandi á 25.48, og franski Benjamin Stasiulis á 26.05. Aftanfyri vóru so millum annað hinir ‘stóru danirnir’, Daniel Steen Andersen, Daniel Skaaning og Morten Bak Hansen. Sí úrslitalistan her.
Magnus roynir seg á MOM Marseilles 2014
Magnus Jákupsson er sum kunnugt í Fraklandi nú um vikuskiftið, har hann skal royna seg á 3e Meeting Open Méditerranéen i Marseille, saman við ‘Great Danes’ liðnum. Og tað sær út til at ganga ókey,tí í innleiðandi 50 rygg svam hann 27.07 og fjórbestu tíð av øllum, sum væl merkir at hann er víðari til A-finaluna í kvøld. Sambært luttakaralistanum skal Magnus royna seg í 50 rygg í dag, 100 firvald og 50 frí í morgin, og 50 firvald og 100 rygg sunnudagin. Til ber at fylgja við her á liveffn.com.
Ein annar føroyingur á ‘Great Danes’ liðnum er Frans Johannesen, sum hevur roynt seg í 200 frí í morgun, har hann við tíðini 1:52.88 svam seg til eitt 10. pláss og B-finalu í kvøld. Hann skal royna seg eisini í 800 metra frísvimjing í dag, umframt 50 og 400 frí í morgin, og 100 og 1500 frí sunnudagin.
Pál 3:54.64 í 400 frí og gull á Østdanske Langbanemesterskaber
Pál Joensen megnaði í kvøld at vinna gull á eysturdonsku meistarastevnuni á langgeil, tá ið hann í 400 metra frísvimjing svam teinin uppá 3:54.64, har silvurvinnarin Anton Ørskov Ipsen svam 3:58.16 og triði Magnus Sloth Poulsen 4:10.91. Tað var Pál fremst allan vegin, og eisini væl skjótari enn tilsvarandi finalan á vesturdonsku meistarastevnuni, har Viktor B. Bromer vann við 4:01.10, Frans Johannesen vann silvur við 4:03.16 og Anton Bromer varð nummar trý við 4:09.70.
Magnus Jákupsson, Frans Johannesen og Pál Joensen á Danish Open 2012 í Bellahøj. René Thomsen eigur myndina.
Frans Johannesen vann sær eisini eitt bronsuheiðursmerki í 50 metra frísvimjing, tá ið hann svam teinin uppá 24.44, har Emil Skovfoged Gregersen vann við 24.05 og Kasper Schultz varð nummar tvey við 24.44. Magnus Jákupsson var á eysturdonsku meistarastevnuni tilmeldaður í 50 frí og 50 rygg, har hann tó av einhvørjari orsøk endaði við ikki at luttaka.
Pál ætlar at svimja sínar skjótastu tíðir nakrantíð á EM í Herning 2013
Her er eitt innslag úr ítróttarsendingini 3-2 hjá Kringvarpi Føroya hin 18. november 2013, har tey tosa við Pál Joensen og avstralska venjara hansara Shannon Rollason, um útlitini nú upp undir EM á stuttgeil í Herning hin 12. til. 15. desember 2013. Verturin tosar eisini um úrslitini hjá Páli og Alva og Magnusi á DM á stuttgeil 14. – 17. november 2013, og um tað at Magnus fer at umboða Danmark á EM í Herning.
Magnus og Frans úttiknir til at umboða Danmark á EM 2013 í Herning
Danska svimjisambandið kunngjørdi nú meistarastevnan á stuttgeil endaði í kvøld, teir tilsamans 29 svimjararnar sum skulu umboða Danmark nú í desember, tá ið EM á stuttgeil verður á heimavølli í Herning. Tað eru øll tey 28 sum kláraðu kravtíð, umframt Mathias Andersen sum setti danskt met í 50 bringu men akkurát var for stuttur til at náa kravtíðina eisini. Hann er úttikin til at styrkja stafettirnar.
(Danska EM-landsliðið til Herning 2013. Á myndini vænta Mads Glæsner sum er farin til USA aftur at venja, umframt vist nokk Lotte Friis sum legðist sjúk í dag)
Magnus Jákupsson 51.75 og danskur meistari í 100 rygg
Tað bleiv ein yvirbevísandi sigur til Magnus Jákupsson, tá ið hann og Andreas Schiellerup møttust til ‘revanche’ í 100 metra ryggsvimjing, nú aftaná at teir báðir fríggjakvøldið vunnu gull og settu danskt met á hálva teininum. Magnus tók nevniliga beinanvegin leiðsluna við 24.93 sekundum eftir fyrstu 50 metrarnar í mun til Andreas á 25.20, og helt so heim til at vinna í óføru tíðini 51.75 sekund, har Schiellerup svam 52.07. Hetta er stórt persónligt met hjá Magnusi, í mun til hansara 52.62 frá Eysturdonsku Meistarstevnuni á Stuttgeil í oktober, og heldur ikki so langt frá danska metinum hjá Anders Jensen á 51.54, ella norðurlendska hjá svenska Pontus Renholm á 51.35, sum bæði eru frá tíðini við superdraktum afturi í 2009. Tíðin er sambært SwimRankings hin triðbesta í Evropa, hetta svimjiárið, og langt undir kravtíðini hjá dønum til EM í Herning, á 53.16. Sí úrslitalistan her.
Løtu seinni bleiv Magnus nr 4 í 50 firvald, við tíðini 24.59, uttanfyri kravtíðina hjá dønum á 23.69 til EM í Herning. Í innleiðandi svam hann annars 24.05, sum hevði rokkið til eitt triðjapláss í finaluni, so hann fór altso ‘all in’ í hasari fyrstu kappingini, og betaldi prísin nú í firvald.
Magnus, Pál og Frans víðari til finalu seinnapartin
Aftur nú seinnapartin verða føroyingar at síggja í finalu, á donsku meistarastevnuni á stuttgeil. Magnus Jákupsson fær út at gera, tí hann hevur bestu tíð í 100 rygg, nú aftaná innleiðandi riðlarnar, og síðani næstbestu í 50 firvald bara eina kapping seinni. Frans Johannesen hevði næstbestu tíð 1:49.07 í innleiðandi 200 frí, og Pál Joensen har sjeyndbestu 1:49.66. Hetta er síðsti dagur á donsku meistarastevnuni, finalurnar byrja klokkan 16 føroyska tíð, og fylgjast kann við her á livetiming. DR hevur stroymað frá øllum finalum, men tað var feilheft í fyrstuni, og er eftir øllum at døma avmarkað til bara at kunna síggjast í Danmark.
Magnus 1:54.90, DM-gull og á danska landsliðið til EM í Herning
Magnus Jákupsson varð nú seinnapartin danmarksmeistari í 200 metra ryggsvimjing á stuttgeil, tá ið hann í finaluni svam teinin uppá 1:54.90, greitt frammanfyri næstskjótasti Anders Jensen á 1:56.87 og triðskjótasti Mads Knoblauch á 1:58.29. Tað var ongantíð nakar ivi um at Magnus fór at vinna, tí hann førdi frá fyrsta floyti til síðsta innslag. Magnus kláraði eisini lættliga donsku kravtíðina til EM 2013 í Herning, sum er 1:55.27, og burdi tí heilt sikkurt verið við á liðnum hjá teimum har, nú í desember. Tíðin 1:54.90 er eisini greitt skjótasta tíð sum Magnus hevur svomið á teininum, haldi at skjótasta áðrenn hetta var 1:57.33 frá hesi stevnu í fjør. Sí úrslitalistan her.
(Jákup Jacobsen eigur myndina)
Pál og Magnus gull á eysturdonsku meistarastevnuni á stuttgeil
Teir báðir Pál Joensen og Magnus Jákupsson vunnu sær hvør sítt gull á eysturdonsku meistarastevnuni á stuttgeil, tá ið Pál í 800 frí svam teinin uppá 7:52.68, og Magnus 100 rygg uppá 52.62. Tíðin hjá Pál er nakað væl frá hansara bestu tíð á 7:36.24 frá Duel in the Pool stevnuni í USA í 2011, meðan tíðini hjá Magnusi er persónligt met við éinum hundraparti, í mun til hansara 52.63 frá Swedish Swim Games herfyri. Pál varð hartil nummar 4 í 200 frí, við tíðini 1:49.14, har hansara besta tíð er 1:46.61 frá EM í Rijeka í 2008, og 1:47.56 uttan superdrakt.
(Jákup Jacobsen eigur myndina, frá DM á langgeil í vár)
Astrið Foldarskarð og Markus Joensen royndu seg eisini í dag, fyri felagið VAT sum tey skiftu til her við svimjiársbyrjan. Astrið var í finalu í 50 frí og firvald, har hon í 50 frí varð nummar 5 við tíðini 26.92, og í 50 firvald nummar 6 við tíðini 29.09. Markus varð nummar 10 í 50 firvald við tíðini 26.37, og so seinni kolldømdur í 100 blandað fyri at svimja meira enn 15 metrar undir vatni. Astrið varð eisini nummar 7 sum partur av stafettini hjá VAT í 4×50 blandað, og Markus nummar 6 fyri somu stafett hjá monnum.