Tag: melbourne 2007

Videobrot á Eurosport.com og YouTube

Eurosport.com hevur eitt áhugavert mediasavn her, har man í løtuni kann síggja “all the action from day two of the World Championships in Melbourne” og “Highlights from the morning session on day two when VDH set the fastest qualifying time in the men’s 200m freestyle heats”. Ikki so galið, um man ikki hevur atgongd til fylgisveinasendingarnar.

Bartal sendi mær eisini leinki í morgun til video á YouTube, har man til dømis her kann síggja 17 ára gamla Tae Hwan Park vinna gull í 400 frí hjá monnum við einum øgiligum endaspurti, og her kann síggja ymiskt sum onkur portugisi hevur lagt upp á alnetið. Til ber eisini at finna video, við til dømis at leita eftir “Fina World Championships 2007” á Google Video.

Eisini ‘live’ á eurosport.com

Heimasíðan hjá Eurosport hevur eisini eitt slag av ‘live’ sending frá svimjingini í Melbourne, har tey skriva smáar tíðindastubbar her so hvørt sum svomið verður. Tíverri bara tekstur, uttan ljóð ella mynd, og spurningurin er tí um ikki Omega Live Timing er betra loysnin, við tað at man har sær úrslitatalvuna við starttíð og millumtíðum hjá øllum svimarum, ‘live’. 

Finalurnar eru í gongd beint nú, har Brendan Hansen til dømis akkurát vann á Kitajima í 100 bringu, meðan norðmaðurin Alexander Dale Oen tíverri følnaði fullkomiliga eftir at hava verið nummar 3 í vendingini. Hann varð nummar 8 av 8 í finaluni, sum ikki kann vera annað enn bitturt, tá ið man hugsar um at hann í innleiðandi svam skjótari enn tann sum her vann HM-bronsu.

Nathalie Coughlin man vera næstan líka skuffað eftir sínar 100 firvald, sum hon førdi inntil teir síðstu 25 metrarnar. Hon fekk gott nokk eitt heiðursmerki, úr bronsu, meðan avstralsku Libby Lenton og Jessicah Schipper fóru við gull og silvur.

50 firvald hjá monnum vann suðurafrikanski Roland Schoeman á Ian Crocker, meðan danski Jacob Andkjær fekk bronsu. Woohoo Danmark! Svenski veteranurin Lars Frölander varð einans nummar 7 av 8, so hansara tíð man nú endiliga vera við at vera av, eftir at hann hevur verið á toppinum í eina svimjiøld.

200 blandað hjá kvinnum vann Kathy Hoff úr USA á Kirsty Coventry úr Zimbabwe og Stephanie Rice úr Avstraliu. Danska Julie Hjorth-Hansen varð her nummar 5, sum eisini má sigast at vera nokk so gott (í øllum førum í mun til stakkals Oen).

Viðvíkjandi tíðum, so tykist hylurin tíverri ikki at vera heilt so skjótur sum fólk væntaðu og ynsktu. Ella eru svimjararnir ikki heilt so væl fyri sum ætlað. Tí inntil víðari seta tey ‘bara’ meistaraskapsmet, uttan at nakar fer við teimum lovaðu 140.000 krónunum fyri (hvørt) heimsmet.

Tekur nakar uppá video ?

Ella enn betur: DVD? Eg vil ikki uppfordra til ólógligheitir her, men man sær altso føroyingarnar á Eurosport um náttina, og tað er tí gull vert at fáa hetta á goymslu. Til eftirtíðina og sum svimjisøgu og so framvegis. Bartal tók 200 frí hjá Pál uppá DVD í nátt; men man sær tíverri illa Pál, av tí at hann svam á geil 8 og varð nr 4 í riðlinum, har Eurosport bara nær at fáa ‘close-up’ av nr 1. Sunnunáttina sá man sikkurt bæði Pál og Monu, men tá tóku vit ikki uppá :”-S

Nakar sum kann skriva ?

Eg verði tíverri rættiliga upphongdur av arbeiði og føðingardegi o.t. í øllum førum fram til mikudagin, og fái tí illa skrivað frá svimjingini í Melbourne. Í øllum førum ikki fyrr enn einaferð seint um kvøldið. So um onkur annar hevur tíð og hug at skriva her, eru tey meira enn vælkomin. Tað krevur ikki annað enn at tú stovnar teg sum brúkara, ritar inn og velur ‘Stovna innihald’ í síðubjálkanum til vinstru, fyri síðani at velja ‘Frásøgn’.

Manaudou vil undir 4 í 400 frí

Nógv verður tosað um Michael Phelps í hesum døgum, og um hvussu vítt hann verður fyrsti svimjari sum vinnur 8 gull á HM. Men hansara skrá er lítið av miklum í mun til tær 9 tilmeldingarnar hjá fronsku Laure Manaudou, sum við innleiðandi og semifinalum kann viðføra at hon hesar sjey dagarnar skal svimja kappast 7450 metrar tilsamans.

Hon hevur longu vunnu teir 400 frí í dag, í eini tíð sum hon bestemt ætlar sær at betra um seinni. Segði her í vikuni, at hon fór ikki at umhugsa at gevast við svimjingini fyrr enn hon svam undir 4 minuttir í 400 frí. Hon er eisini rættiliga vís í at vinna teir 800 frí, um ikki Otylia Jedrzejczak klárar at koppa henni. Og so eru tað 200 frí og 1500 frí, umframt 50 og 100 rygg, og stafettir.

Tit kunnu lesa um ætlanir hennara her á eurosport.com og her á swimnews.com. Laure Manaudou er forrestin ein øgilig gella, sjálvt eftir fronskum mátistokki. Tá ið fjølmiðlarnir ikki skriva um hennara brøgd – sum til dømis at hon í fjør tók 18 ára gamla heimsmetið hjá Janet Evans í 400 frí – so er tað um hvussu hon klandrast við venjarar og svimjisamband, ella bara vinnur í italienskari svimjihettu tí at sjeikurin er haðani.

So er svimji-HM byrjað

HM byrjaði fyri einari viku síðani, við kaving og synkronsvimjing og tílíkum; men nú eru so okkara slag av svimjing byrjað. Á OMEGA Live Timing ber til at fylgja við tíðunum so hvørt sum svomið verður, við tilskilan av reaktiónstíðum og sikkurt millumtíðum eisini, tá ið tey koma til at svimja annað longri enn hesar fyrstu 100 firvald.

Sá, nú svam Pál Joensen sum fyrsti føroyingurin. 400 frí í riðli 3 í kapping 2. Seedaður sum nummar 3 í riðlinum. Tilmeldingartíð 4:10.76. Reaktiónstíð 0.77 (triðbest). 28.47 (nr 2), 59.37 (nr 1), 1:30.60 (nr 1), 2:02.79 (nr 1), 2:34.84 (nr 1), 3:06.75 (nr 1), 3:38.56 (nr 2), 4:08.40 (nr 1). Pál vann riðilin og betraði sína tíð við 2.3 sekundum, so tað byrjar bara OK 🙂

Pál, Mona og Jutta svumu 400 frí hendan fyrsta morgunin. Úrslitið varð at Pál sum omanfyri nevnt svam teir 400 á 4:08.40, sum er nýtt føroyskt met. Hann var tilmeldaður sum nr 62 av 83 men endaði sum nummar 52 av 76 (fýra munnu hava meldað frá áðrenn kapping, og 3 møttu ikki á kantinum). Sí úrslitalistan fyri 400 frí innleiðandi hjá monnum her.

Jutta Thomsen hevði tíðina 4:36.15, sum er næstan 5 sekund frá hennara egna føroyska met á 4:31.38 (sí ssf.fo), men tó betri enn hennara tilmeldingartíð á 4:36.52. Mona Simonsen vann á Juttu við 4:34.47 sum var væl betri enn hennara tilmeldingartíð á 4:40.94. Í plasering fluttu báðar seg fram (Jutta frá 58 til 49 og Mona frá 59 til 46), men eisini her vóru nokk so nógv sum ikki svumu av teimum upprunaliga tilmeldaðu (73 vóru á startlistanum, 6 meldaðu síðani rættstundis frá, og tvær møttu ikki á kantinum, so at veruliga talið á luttakarum varð 65). Sí úrslitalistan her.

Tey bestu eru tó øgiliga sterk í mun til føroyingarnar. Éitt er at teir fýra skjótastu mennirnir svimja undir 3:47, og sostatt høvdu verið um eina longd framman fyri Pál, um teir svumu í sama riðli. Men tær átta skjótastu genturnar svumu eisini skjótari, hóast øll hesi fremstu munnu hava spart seg í innleiðandi svimjingini.

Finalurnar í 400 frí hava longu verið svomnar, og úrslitið varð at koreanski Tae Hwan Park við tíðini 3:44.30 vann á Oussama Mellouli og Grant Hackett (heimsmetið eigur Ian Thorpe við 3:40.08), meðan franska Laure Manaudou sum væntað vann á Otylia Jedrzejczak og japonsku Ai Shibata 4:02.61 (heimsmetið eigur Manaudou við tíðini 4:02.13).

Tit finna allar úrslitalistar her, so hvørt sum svomið verður. Eurosport skrivar um 17 ára gamla Tae Hwan Park her, at hann var nr 4 í síðstu vending men vann kappingina við einum øgiligum spurti, og harvið fyrsta HM-gull nakrantíð til Korea. Grant Hackett var forsvarandi meistari, men har er ikki alt sum ætlað… Eurosport skrivar her at hann mundi ikki komið við í finaluna.

Amerikanarar munnu hava verið eitt sindur skuffaðir har á 400 metrum, við tað at hvørki Klete Keller ella Peter VanderKaay, Kathryn Hoff ella Kate Ziegler megnaðu at vinna nakað heiðursmerki yvirhøvur. Eisini man tað stressa, at japanski Kosuke Kitajima bæði í innleiðandi og semifinalu vann á heimsmethaldaranum Brendan Hansen, sum einasti ið kom undir 1 minutt (forrestin ØGILIGT her, at norski Alexander Dale Oen fekk triðbestu tíð á 1:00.69 í semifinaluni… HEJA NORGE!!).

Suðurafrikanski Roland Schoeman varð eisini skjótari enn amerikanski Ian Crocker í semifinaluni. Avstralsku genturnar vunnu á USA og Niðurlond í 4 x 100 frí. Men Michael Phelps kann hinvegin gleðast um at hava fingið fyrsta gull um hálsin, av teimum ætlaðu met-nógvu 8, tá ið hann saman við Neil Walker, Cullen Jones og Jason Lezak vann 4 x 100 frí hjá monnum.

Nú sæst riðlabýtið á omegatiming.com

HM-startlistar við riðlabýti síggjast nú á omegatiming.com, út fyri hvørja kapping á skránni. Vit síggja t.d. her at Pál Joensen skal svimja 50 metrar frí í riðli 7 móti 7 svimjarum úr Myanmar, Namibia, Albania, Zambia, Palestina, Cambodia og Togo. Landakotur kunnu forrestin síggjast her á heimasíðuni hjá FINA.
Continue reading Nú sæst riðlabýtið á omegatiming.com

FINA innført peningavirðislønir í HM

FinaÍ ár er fyrstu ferð at altjóða svimjisambandið FINA gevur heiðursmerkjavinnarunum peningavirðislønir afturat heiðursmerkjunum. US$12.000 fyri gull, 7.000 fyri silvur og 5.000 fyri bronsu, umframt US$25,000 bonus fyri heimsmet. Umroknað við dagskursinum altso einar 67.000 krónur fyri gull, 39.000 fyri silvur, 28.000 fyri bronsu og  140.000 fyri heimsmet. Alt í alt gevur sambandið einar 2 milliónir amerikanskir dollarar til heiðursmerkjavinnararnar, ella 11,2 milliónir danskar krónur.

Um vit til stuttleikar rokna eitt sindur uppá møguleikan hjá Michael Phelps at taka 7 gull, so eru tað altso einar 469.000 krónur frá FINA, umframt sikkurt bonus frá amerikanska svimjisambandinum eisini, og frá sponsorum. Av teimum 7 greinunum eigur hann nýggj heimsmet í tveimum; so um vit varliga vænta at hann setur heimsmet aftur í teimum, verður tað 469.000 + 280.000 = 749.000 krónur frá FINA aleina, fyri luttøkuna á HM 2007. Ikki so galið.

Upprunaligu tíðindini á SwimNews

Startlistin klárur til HM 2007

Samlaði startlistin til HM 2007 er nú lagdur út á omegatiming.com. Hann er 160 síður langur og inniheldur bæði tilmeldingarnar listaðar upp fyri hvørt land sær, umframt sjálvan startlistan við plasering av luttakarum í mun til teirra tilmeldingartíðir. Har er eisini avsett pláss til ‘live timing‘, so hatta verður nokk ein av teimum síðum sum vit svimjiáhugaðu fara at vitja nógv í komandi viku.

Niðanfyri havi eg listað upp allar tilmeldingar hjá føroyingunum, við viðmerking um hvønn dag tey svimja, og hvussu tey eru plaseraði í mun til samlaða talið av luttakarum í greinini. Gott at síggja at føroyingarnir verri enn so eru aftast, um enn tað eisini er langt upp á toppin:

Kap. Dagf. Grein Svimjari Tilm.tíð Plasering
2 25/3 400 frí Pál Joensen 4:10.76 62 av 83
5 25/3 400 fri Jutta Thomsen 4:36.52 58 av 73
5 25/3 400 frí Mona Simonsen 4:40.94 59 av 73
10 26/3 200 frí Pál Joensen 1:59.41 90 av 119
16 27/3 200 frí Jutta Thomsen 2:16.01 90 av 112
16 27/3 200 frí Mona Simonsen 2:17.28 97 av 112
17 27/3 800 frí Pál Joensen 8:49.89 40 av 47
19 28/3 100 frí Kristian Olsen 55.55 120 av 177
19 28/3 100 frí Pál Joensen 56.43 133 av 177
22 29/3 100 frí Mona Simonsen 1:04.33 112 av 136
28 30/3 50 frí Kristian Olsen 24.56 92 av 195
28 30/3 50 frí Pál Joensen 26.88 146 av 195
29 30/3 800 frí Jutta Thomsen 9:33.64 43 av 51
29 30/3 800 frí Mona Simonsen 9:35.39 44 av 51
36 31/3 1500 frí Pál Joensen 16:33.14 43 av 53

Viðhefta fílan er sjálvur listin av omegatiming.com.

Tær týsku so góðar at tær vilja dopingtestast meira

Týsku svimjigenturnar eru blivnar so góðar í seinastuni, at tær nú bjóða seg til at verða dopingtestaðar meira, til at sleppa undan óneyðugan mistanka. Landsliðsvenjarin Ørjan Madsen sigur at tær enntá eru gingnar við til at frysta niður blóðprøvar, til at kunna prógva at tær ikki eru dopaðar, nú tær svimja í Melbourne.

Týska landsliðið hevur annars ikki verið so gott seinastu árini, síðani stórheitstíðina í 70’unum og 80’unum tá ið tær vóru dopaðar… so mikið at einir 169 ítróttarfólk nú fáa endurgjald frá týska statinum. Men nú eru tær so sanniliga við aftur, eftir til dømis at hava sett 3 heimsmet á EM í fjør. Og serliga amerikanar hava tí (sambært Madsen) gruggast um, hvussu vítt tær eru dopaðar ella ei.

Les upprunaligu tíðindini á eurosport.com