Óli Mortensen – Page 6

Morgunvenjing í Dubai

Teir báðir Óli Mortensen og venjari Kristian Martin Joensen komu fram til Dubai í gjár, har næsta kapping í World Cup røðini verður nú hósdagin og fríggjadagin 17. og 18. oktober. Her á myndini hjá Kristian Martini eru teir til morgunvenjing í glæstriligu Hamdan bin Mohammed bin Rashid svimjihøllini í Dubai, har HM á stuttgeil var í 2010. Myndin er úr upphitingarhylinum, har tað ikki er so høgt til loftið, vegna nøkur ventilatiónsrør ella hvat hatta er sum hongur uppi undir loftinum.

(Kristian Martin Joensen eigur myndina)

Óli 15:31.79 í 1500 frí á World Cup í Moskva

Óli Mortensen luttók í morgun í 1500 metra frísvimjing á World Cup stevnuni í Moskva, og varð hann har nummar 5 av teimum 11 sum svumu uttanfyri sjálva finaluna, ella 13 av 19 um vit telja finaluna við. Tíðin hjá honum 15:31.79 var aftur í dag ikki so langt frá hansara bestu tíð, sum er 15:24.32 frá NJM í Vaasa í fjør.

Óli Mortensen til World Cup í Moskva, Dubai og Qatar

Næsta røð av World Cup stevnum byrjar í Moskva í morgin, har eisini Óli Mortensen úr Havnar Svimjifelag luttekur. Tey kappast í Moskva nú 12. og 13. oktober, í Dubai hósdagin og fríggjadagin 17. og 18. oktober, og so aftur í Qatar sunnudag og mánadag 21. og 21. oktober. Sum skilst verður Óli einasti føroyski luttakari á World Cup stevnum í ár. Til ber at fylgja við úrslitunum her á omegatiming.com og síggja kappingina á FinaTV

Óli 8:25.69 í 800 frí á EJM 2013, Alvi 8:36.35

Teir báðir Óli Mortensen úr Havnar Svimjifelag og Alvi Hjelm úr Ægir luttóku í morgun í 800 metra frísvimjing á evropeisku meistarastevnuni fyri ung, sum er í Poznan í Pólandi. Óli megnaði at seta nýtt føroyskt juniormet við tíðini 8:25.69, har hansara besta tíð til og juniormetið var 8:30.32 frá íslendsku meistarastevnuni í apríl 2013. Alvi svam teinin uppá 8:36.35, har hansara besta tíð er 8:34.96 frá Danish Open í mars mánaða. Sí úrslitalistan her.

Føroyingarnir eru nú lidnir við at svimja fyri í dag, eftir er bara morgindagurin har Eyðbjørn skal royna seg í 50 frí, og at enda teir fýra í 4×100 blandað.

Óli 16:13.45, Alvi 16:38.38 í 1500 frí á EJM 2013

Teir báðir Óli Mortensen úr Havnar Svimjifelag og Alvi Hjelm úr Ægir luttóku í morgun í 1500 metra frísvimjing á EJM 2013 í Poznan, og svumu teir har ávíkavist 16:13.45 og 16:38.38. Teir ruku beinanvegin eitt sindur afturum høvuðsfeltið, og Alvi so longur aftur meðan Óli stríddist við at fylgja við hinum, einar 2-3 kroppslongdir aftanfyri feltið, inntil hann eisini mátti sleppa. Bestu tíðir hjá teimum eru ávíkavist 16:08.20 hjá Óla frá íslendsku meistarastevnuni í apríl, og 16:11.88 hjá Alva frá Danish Open í mars. Skjótasti riðil svimur í kvøld, fyribils sær tað út til at Óli verður nummar 17 og Alvi nummar 20, sí úrslitalistan her.

Føroyar 3:47.78 og nr 14 í 4×100 frí á EJM 2013

Teir fýra Eyðbjørn Joensen, Alvi Hjelm, Óli Mortensen og Markus Joensen luttóku í morgun í 4×100 metra frísvimjing á evropeisku juniormeistarastevnuni í Poznan, og gjørdust teir har nummar 14 við tíðini 3:47.78. Splitt-tíðirnar vóru Eyðbjørn 55.09, Alvi 55.71, Óli 57.44 og Markus 59.54; teir eiga sjálvir føroyska juniormetið sum er 3:46.49 frá NMU í fjørsummar. Sí úrslitalistan her.

Føroyingarnir eru nú lidnir við fyrsta dag á EJM 2013, sum heldur áfram til og við sunnudagin.

Óli, Alvi og Eyðbjørn nr 50, 52 og 55 í 400 frí á EJM 2013

Teir tríggir Óli Mortensen, Alvi Hjelm og Eyðbjørn Joensen hava í morgun luttikið í 400 metra frísvimjing á evropeisku juniormeistarastevnuni á langgeil, og gjørdust teir har ávíkavist nummar 50, 52 og 55, við tíðunum 4:10.85, 4:12.58 og 4:19.68. Eitt sindur frá teirra bestu tíðum, har Óli á Reykjavík International í januar svam 4:06.44 og og Alvi á NMU í fjørsummar svam 4:08.18. Sí úrslitalistan her.

Bólturin um úrslitini í Føroyum og í Íslandi

Rókur var at hoyra í útvarpsendingini “Bólturin” seinnapartin í gjár, har hann tók samanum úrslitini hjá Óla Mortensen og Bartali Hestoy á íslendsku meistarastevnuni og frá metinum hjá Poulu Ø. Mohr í 100 firvald, umframt at fortelja eitt sindur um komandi kappingar í Føroyum og uttanlanda.

Óli bronsu í 400 blandað á ÍM 50m 2013, Bartal føroyskt met

Teir báðir Óli Mortensen og Bartal Hestoy endaðu sína luttøku á Íslandsmeistaramót í 50m 2013 við stíli, tá ið teir í kvøld svumu finalu í 400 metra blandaðari svimjing, Óli við tíðini 4:45.85 sum gav eitt bronsuheiðursmerki, og Bartal við nýggjum føroyskum meti 4:37.09. Metið hjá Bartali var annars 4:38.10 frá Actavis Open í Hafnafirði í mars mánaða, og tað hevði rokkið til eitt silvurmerki her á ÍM 50m 2013, um ikki hann vegna kolldøming um morgunin nú svam ‘uttanfyri kapping’. Sí úrslitalistan her.

Fyrr um kvøldið luttók Óli eisini í finaluni í 200 metra frísvimjing, har úrslitið gjørdist eitt fjórðapláss í tíðini 1:59.34, eitt sindur lakari enn hansara 1:59.06 frá um morgunin. Sí úrslitalistan her. Men vit skulu nokk ikki klaga – 2 íslandsmeistarar, 3 gull, 2 silvur, 1 bronsu, 2 føroysk met og 2 juniormet, tað er heilt ókey við bara 2 svimjarum á stevnuni 🙂

Óli

4:07.48 og silvur í 400 frí
16:08.20, silvur og juniormet í 1500 frí (metið hjá honum var 16:09.16)
8:30.32, gull og juniormet í 800 frí (metið hjá honum var 8:31.34)
4:45.85 og bronsu í 400 blandað

Bartal

2:10.34 og gull í 200 blandað
2:26.46, gull og føroyskt met í 200 bringu (metið hjá Páli var 2:26.59)
4:37.09 og føroyskt met í 400 blandað (metið hjá honum var 4:38.10)

Bartal kolldømdur í 400 blandað á ÍM 50m 2013, Óli víðari í finalu

Update! Tað sær út til at Bartal allíkavæl fer at luttaka í finaluni seinnapartin, men ‘uttanfyri kapping’. Tað vil siga at hann fær hendan eyka møguleika at svimja eina góða, offisiella langgeila-tíð, tó uttan at kunna kappast um heiðursmerki og heiðurin at verða íslendskur meistari.

Ups, Bartal Hestoy var fyri løtu síðani kolldømdur í innleiðandi riðlunum av 400 blandað á íslendsku meistarastevnuni í Reykjavík, sum merkir at hann ikki kemur at luttaka í finaluni seinnapartin. Hann hevði annars bestu tíð 4:44.90,og er sum kunnugt kanska sterkastur í akkurát hesari grein, so hatta var ein dyggur smeitur eftir nakrar annars ógvuliga imponerandi dagar í Laugardalslaug. Sí úrslitalistan her.

Hinvegin kom Óli Mortensen víðari til finalu við fjórbestu tíð í eisini hesi grein, 4:54.93 í mun til tilmeldingartíð 4:48.98, og hevur hartil góðan kjans at gera seg galdandi í heiðursmerkjastríðnum seinnapartin, serliga nú Bartal manglar. Finalurnar byrja klokkan 17:00 íslendska tíð, sum er klokkan 18:00 her í Føroyum. Fylgið við úrslitunum her á aegir.is.