Pál Joensen svam seg í morgun trygt í HM-finalu í 800 metra frísvimjing, tá ið hann í Palau Sant Jordi høllini í Barcelona svam teinin uppá 7:50.81. Tað var næstbesta tíð í triðseinasta riðli, og rakk tað til eitt samanlagt sættapláss á startlistanum til finaluna. Sí úrslitalistan her.
Her er ein stutt samrøða við Pál sum eg gjørdi tá ið vit vóru komnir aftur á hotellið. Má blíva betur til hetta við at interviewa.
Eitt heilt stutt prát við Pál Joensen eftir fyrstu venjing í Palau Sant Jordi kappingarhylinum har HM í svimjing 2013 skal verða.
Svimjiserfrøðingurin John Lohn skrivar her á SwimVortex um 800 og 1500 metra frísvimjing fyri menn á HM í Barcelona, at Sun Yang er greiður favorittur til gullið í báðum greinum, meðan Ryan Cochrane, Connor Jaeger, Gergo Kis, Gregorio Patrinieri og Pál Joensen fara at kappast um hini heiðursmerkini í 800 frí, og Ryan Cochrane, Connor Jaeger, Oussama Mellouli, Gergo Kis, Pál Joensen og Jordan Harrision um gullið í 1500 frí.
(Sun Yang og Pál á HM í Shanghai 2011)
Hetta er rættiliga merkisvert fyri okkum, ikki bara tí at ‘tað vanliga’, at Pál kemur úr einum pinkalítlum oyggjasamfelag og alt hatta har, men eisini tí at Pál í veruleikanum ikki hevur svomið nakra serliga sterka tíð í hesum greinum á langgeil, hetta seinasta árið. Stuttskygdi journalisturin vildi hugt niður eftir startlistanum og sagt at Pál er uttanfyri heiðursmerkjavón, meðan teir garvaðu sum Lohn hugsa, at um tú einaferð hevur prógvað teg í eini grein sum 1500, so mást tú ikki avskrivast.
Continue reading Pál millum favorittarnar til 800 og 1500 frí á HM í Barcelona
Brot úr tíðindasendingini hjá Útvarpi Føroya (Kringvarpi Føroya) hin 4. juli 2013 klokkan 18:00. Prát við Pál Joensen og Rók í Jákupsstovu um donsku meistarastevnuna á langgeil 2013, um Barcelona 2013 og um Magnus Jákupsson.
Pál Joensen megnaði í dag at vinna sær enn eitt dansk meistaraheiti, tá ið hann í finaluni í 200 metra frísvimjing svam teinin uppá 1:50.63, frammanfyri silvurvinnaranum Daniel Skaaning á 1:50.85 og bronsuvinnaranum Sebastian Ovesen á 1:53.50. Tað var annars Skaaning sum legði harðast út, so at hann lá eitt hálvt sekund ella hálva kroppslongd frammanfyri Pál eftir 100 og 150 metar, men Pál kom so aftur síðstu metrarnar. Sí úrslitalistan her.
Splitt-tíðir
Pál 26.67 – 28.21 – 28.29 – 27.46
Daniel 26.55 – 27.75 – 28.26 – 28.29
Teir báðir Magnus og Pál megnaðu harvið at vinna tilsamans 5 gullheiðursmerki á DM 2013, í teimum 7 kappingunum sum teir luttóku í; Magnus í 50, 100 og 200 rygg, og Pál í 200 og 400 frí. Pál svam eisini skjótast í 800 frí, men svam har vegna ov seina tilmelding ‘uttanfyri kapping’, og Magnus varð nummar fimm í 50 firvald, umframt at vera við til at vinna gull í 4×100 blandað og silvur í 4×100 frí. Magnus var tað mannfólkið sum vann mest á DM 2013.
Pál Joensen svam seg í morgun víðari til finalu seinnapartin, tá ið hann í innleiðandi riðlunum í 200 metra frísvimjing á donsku meistarastevnuni á langgeil svam bestu tíð av teimum 64 sum luttóku, 1:53.57 har argasti kappingarneytin Daniel Skaaning svam 1:55.54. Allar súðir eru ikki syftar enn – Daniel Skaaning er nevniliga rættiliga skjótur á hesum stutta, og hevur fyrr koppað Páli á netupp hesum teini. Har eru aðrir eisini, sum til dømis Jacob Cartensen, gullvinnari í 400 metra frí á HM á stuttgeil í Gøteborg 1997; men tað verða nokk teir báðir Skaaning og Pál sum skulu kappast um gullið ‘live’ á dr.dk kl 17:15 danska tíð í dag.
Magnus Jákupsson og Pál Joensen á DM 2013, Jákup Jacobsen eigur myndina.
Pál Joensen varð í dag danskur meistari í 400 metra frísvimjing, tá ið hann á DM á langgeil í Bellahøj í Keypmannahavn vann finaluna í tíðini 3:54.17, frammanfyri silvurvinnaranum Daniel Skaaning á 3:59.58 og bronsuvinnaranum Laust Moesgaard á 4:06.61. Tað var ongantíð nakar ivi um hvør sum at fór at vinna; Skaaning datt hálva kroppslongd afturum Pál longu fyrstu longdirnar, og lá so har upp til 200 metrar, tá ið Pál fór at draga meira og meira frá. Hinir vóru væl aftanfyri. Sí úrslitalistan her.
Teir báðir Pál Joensen og Magnus Jákupsson seta so avgjørt síni fingramerki á donsku meistarastevnuna á langgeil, nú teir aftur í morgun vóru skjótastir av øllum í sínum kappingum. Fyrst svam Pál 4:00.76 í innleiðandi riðlunum til 400 metra frísvimjing, har hin næstskjótasti svam 4:10.01, og síðani svam Magnus 57.67 í innleiðandi riðlunum til 100 metra ryggsvimjing, har hin næstskjótasti svam 59.21. Teir eru tí sjálvsagt víðari til finalu, seinnapartin, við góðum møguleika at vinna sær heiðursmerki.
Finalurnar byrja klokkan 17 danska tíð, sum er kl 16 her í Føroyum. Til ber at síggja finalurnar sum ‘live stream’ her á dr.dk.
(Jákup Jacobsen eigur myndina)
Pál Joensen spældi seg í dag til ein knúsandi (moralskan) sigur á donsku meistarastevnuni á langgeil, tá ið hann í 800 metra frísvimjing svam teinin uppá 8:03.77, har hin næstskjótasti og nú danski meistarin Marc Bach Nielsen svam teinin uppá 8:32.79. Sí úrslitalistan her, Pál stendur sum EXTRA niðast, vælsagtans tí at hann ikki er danskur men føroyskur svimjari.
