Eitt áhugavert nú í sambandi við eysturdonsku meistarastevnuni á langgeil, er at Pál Joensen er væl skjótari í ár, samanborið við í fjør. Har er gott nokk bara tann éina kappingin sum vit kunnu samanbera, og man skal nokk ansa eftir ikki at leggja for nógv í úrslit so mikið tíðliga á árinum … men munurin í 800 frí er allíkavæl so mikið avbera stórur, at vit í øllum førum kunnu staðfesta at Pál ikki er komin illa frá byrjan:
8:05.62 og gull í ár, samanborið við 8:25.77 og gull í fjør.
Pál Joensen vann sum væntað gull eisini í 1500 metra frísvimjing á eysturdonsku meistarastevnuni á langgeil, tá ið teir fyri løtu síðani avgreiddu hesa kapping í ‘East Kilbridge Badet’ í Ballerup. Hann førdi allan vegin til endaliga úrslitið 15:26.86, frammanfyri Anton Ørskov Ipsen á 15:39.38 og Mads Holm á 16:35.14. Sí úrslitalistan her.
Frans Johannesen luttók ikki í 1500 frí á tilsvarandi vesturdonsku meistarastevnuni í Odense, men vann hinvegin silvur í 100 frí við tíðini 53.31, og silvur í 200 blandað við tíðini 2:09.82.
Magnus Jákupsson hevur sambært vælvitandi keldu valt ikki at luttaka á hesum landsparta-meistarastevnum, fyri heldur at fokusera uppá fyrst luttøku við Great Danes liðnum á Mom Meet Marseilles í Fraklandi, komandi vikuskiftið, og síðani Danish Open síðst í mars mánaða.
Hann luttók tó í 4×100 blandað stafettini hjá Sigma nú seinnapartin, har hann sum fyrsti svimjari svam 100 rygg uppá 58.45 sekund, sum var klárt skjótasta tíð av teimum sum svumu rygg, og har samlaða liðið hjá honum endaði við at vinna silvur.
Pál Joensen vann sum væntað kappingina í 800 metra frísvimjing á eysturdonsku meistarastevnuni á langgeil, tá ið hann í kvøld svam teinin uppá 8:05.62, frammanfyri Anton Ørskov Ipsen á 8:12.37 og Mads Holm á 8:44.77. Tilsvarandi úrslit á vesturdonsku meistarastevnuni vóru Viktor B. Bromer gull við 8:25.24, Frans Johannesen silvur við 8:37.06 og Nicolas Blanch bronsu við 8:41.46. Hetta er alt mitt í tungari venjing, fram í móti Danish Open í mars mánaða, sum samstundis er úttøkustevna hjá dønum til EM í Berlin í august.
Pál Joensen svam seg fyri løtu síðani til eitt silvurheiðursmerki á eysturdonsku meistarastevnuni á langgeil, tá ið hann í 200 metra frísvimjing svam teinin uppá 1:52.87, eitt vet aftanfyri Magnus Westermann á 1:52.68 og knøpp 2 sekund frammanfyri Sebastian Ovesen á 1:54.72. Á vesturdonsku útgávuni av somu stevnu vann Frans Johannesen hesa kapping við tíðini 1:53.44, frammanfyri Anton Bromer á 1:56.78 og Kasper Schultz á 1:58.38. Pál og Frans skulu eftir ætlan báðir royna seg í 800 metra frísvimjing um eina løtu, har Pál hevur bestu tilmeldingartíð í eystri, og Frans á sama hátt í vestri.
Pál Joensen megnaði í kvøld at vinna gull á eysturdonsku meistarastevnuni á langgeil, tá ið hann í 400 metra frísvimjing svam teinin uppá 3:54.64, har silvurvinnarin Anton Ørskov Ipsen svam 3:58.16 og triði Magnus Sloth Poulsen 4:10.91. Tað var Pál fremst allan vegin, og eisini væl skjótari enn tilsvarandi finalan á vesturdonsku meistarastevnuni, har Viktor B. Bromer vann við 4:01.10, Frans Johannesen vann silvur við 4:03.16 og Anton Bromer varð nummar trý við 4:09.70.
Magnus Jákupsson, Frans Johannesen og Pál Joensen á Danish Open 2012 í Bellahøj. René Thomsen eigur myndina.
Frans Johannesen vann sær eisini eitt bronsuheiðursmerki í 50 metra frísvimjing, tá ið hann svam teinin uppá 24.44, har Emil Skovfoged Gregersen vann við 24.05 og Kasper Schultz varð nummar tvey við 24.44. Magnus Jákupsson var á eysturdonsku meistarastevnuni tilmeldaður í 50 frí og 50 rygg, har hann tó av einhvørjari orsøk endaði við ikki at luttaka.
Fyriskipararnir av Nýggjárssendingini 2013 avdúkaðu fyri løtu síðani, at Pál Joensen er ársins føroyska ítróttarnavn 2013. Ein nokk ikki heilt óvæntaður heiður, eftir at hann vann silvur í 1500 metra frísvimjing á EM í Herning, og silvur í 800 metra frísvimjing sum partur av evropeiska úrvalsliðnum á ‘Duel in the Pool’ stevnuni ímóti USA.
Hygga síggj, fyriskipararnir aftanfyri nýggjársendingina 2013 kunngera nú á Facebook, at tey ætla at kjósa “Ársins føroyska ítróttarnavn 2013”. Ein dómsnevnd hevur tilnevnt fimm føroysk ítróttarfólk, sum hava útmerkað seg í 2013, og Pál Joensen er sjálvsagt eitt av teimum.
Tátturin at kjósa ársins ítróttarfólk varð annars niðurlagdur í 2010 ella har á leið, aftaná at fyrst Elspa Mørkøre hevði vunnið í tvey ár og Pál síðani í trý. Men gott at síggja at hann nú verður uppafturtikin.
(Image courtesy of svoem.dk, CC BY 2.0)
Tað er væl lítil ivi um hvør ið eg haldi eigur at fáa æruna. Silvur í harðastu kapping á EM, og silvur í dysti ímóti USA eisini. Tit kunnu atkvøða fyri Páli við at senda “itr 3” sum SMS til 224000.
Tíðindaskriv frá Vágs kommunu, 22. desember 2013
Mánadagin 23. desember kl. 16:00 skipar Vágs kommuna fyri móttøku av Páli Joensen, sum vann silvur við EM á 1.500 m. frí í Herning og silvur á 800 m. frí á Duel in the Pool stevnuni í Glasgow.
Móttøkan verður í VB-húsinum kl. 16.00.
Øll eru hjartaliga vælkomin.
Vágs kommuna
Tit vita tað longu, men latum okkum bara staðfesta tað aftur. Pál Joensen vann í gjárkvøldið silvurheiðursmerki í 1500 metra frísvimjing, við tíðini 14.35.99 aftanfyri Ungarska Gergely Gyurta 14:30.26 og frammanfyri Italska Gabriele Detti 14:36.43. Eg tók feil; 400 meturin og 1500 meturin vóru verri enn so líka, og í staðin sóu vit ein nýggjan Pál Joensen svimja við ørvísi og heilt øgiliga undirhaldandi taktikki, har hann legði varliga út og so legði press á mótstøðuna í ‘miðróðrinum’. Fantastiskt.
Mynd: Pia Ellegaard. Gev gætur at hon ikki kann endurnýtast uttan loyvi frá henni
Portal.fo hevur í dag lagt út hesa áhugaverdu videoupptøku har Kaj Joensen tosar við Pál um skiftið til at venja í Danmark, og um útlitini nú til Evropameistarastevnuna í Herning í desember.
